Read bura-pabir Zafaniya 2 Bible Online

Zafaniya 2 - bura-pabir bible

Zafaniya 2

¹Ngkahə girdzi, I ngkahə girdzi, giri na mji na kula səli,

²akəmata sakatə mdə thlamta ni ahara, akəmata mda atitiləmta giri apa ɓaɓiya tə shambar ana fiɓəla, akəmata ɗəffə bwarbwarkur ar MTHLAKU asə si ata kəra giri, akəmata tsa ancanta ɗəffə bwarbwarkurərni ata kəra giri.

³Bara gir MTHLAKU, shanga giri na ka tərghəi kər akwa tsəɗi ni, giri na ana ɓəla tsawayeri arni. Bara gir ndzi ka jirkur, ka tərghəikərkur, nuhum mda asə ɗuwamta giri ɓɗaku, akwa vir tə MTHLAKU ata pumta ɗəffari.

⁴Mji ata hwi ka təra kazhar Gaza, antə Ashkelon ata ndzi kula mji apa mtakəu. Mda ata kədləɓəla mjir Ashdod ata kərathlər pci, ka mdə kədləmta mjir Ekron kazhar diyir ɗa.

⁵Sha ku wutə giri, giri na ata mnya yimi, giri na mjir Kerethli! MTHLAKU akwa gari ni ata kəra giri. Kanana na tsəɗiyir Filistiya, tsa ata kurəmta giri karkar, tə wala mdə duku aɗi ata mbil wa.

⁶Antə mnya manda ata sə ndzi vəi ɓəla, tsa ata ndzi vəi na ɓɗaku aka mjir ɓəla, ka vəyayeri na ɓɗakɓɗaku ar pwi ciɓayeri.

⁷Mnya yimi ni ata ndzi kifa aka mjir Yahuda na ku mbili ka mpika, vəi tə da ata sə ɓəla mwaɓiyir ɗa akwa. Ma tahaku ku hara antə da ata ra pəpəi, akwa kəyayeri ar mjir Ashkelon. Kamnyar MTHLAKU na Hyelər ɗa ata sə wulwul ɗa ka jaktə ngka ala ɗa ka gənar ɗa apa na hwatu.

⁸“I ku nggatə kyartəkur ar mjir Mowab ka nggənggəla na ɗimi ar mjir Ammon laku tə da mnya ɗimi aka mjirna akwa, ka thlivərantə ɗa abbər da ata dlutsə tsəɗiyir ɗa.

⁹Antə I na MTHLAKU na ka Duna ta Shang, Hyelər Israila na ka mpika, akwa pəla, Apatə tə I aɗi, tar ma Mowab ndzi apa Sodom, ka mjir Ammon ndzi apa Gomora. Kusar mtəhəra an ata dlutsə vəi ni, tsa ata ndzi ncir kur una, ka ndzi hilhilari ba saka madi. Mji na mbil ka mpika ata sə famnya sur ɗa, mjirna an ata sə ndzi mthlakər tsəɗiyir ɗa.

¹⁰Ngəni an ata sə ndzi riɓar hirkərkur arɗa, kamnyar nggənggəla ka kyartəkur tə da hara aka mjir MTHLAKU na ka Duna ta Shang.

¹¹MTHLAKU ata ndzi ala ɗa sur thlivər ka duna, tsa ata higəlantə shanga haptayeri na akwa duniya. Antə shanga mji ata sə zuzuri akəmari kəlara mda akwa tsəɗiyirni.”

¹²Wala giri na mjir Ithliyopiya ma, mda ata kurəmta giri ka katsakarərna.

¹³MTHLAKU ata ndərar tsiyari təbwar yala, ka tsa kurəmta mjir Assiriya. Tsa ata titiləmta Nineva karkar apa fya, ka tsa uləmtadzi apa dəli hamada.

¹⁴Ciɓayeri ar mwaɓi ata sə pəpəi anda, ka shanga jili mwaɓi mtakəu. Kutəkcivəi kəga hwisa an ata sə ndzi akwa kəra zhimbwalayerari, ka tuwar ɗa səɓəla akwa gulayerari, ka ar zəlaku səɓəla ata nyarmbwayerari, Dawayeri ata sə huzamta udzəmayeri ar seda tə mdə hən kəgari ni ka da ndzi ata bəbal.

¹⁵Ngəni an su na ata wutə bərni na akwa karidzi, na kəta abbər su aɗi na ata wutə ni wa, ka namta apa bərni aɗi tə mda agira ka tsa wa. Amma nggədza kulini tsa ku ndzi su hilhila, vəi piyir mwaɓiyayeri. Antə kəlara mdə na ata təramta, ata ncaɓwi ka kənggələmta kərari.