Read bura-pabir Zafaniya 3 Bible Online

Zafaniya 3 - bura-pabir bible

Zafaniya 3

¹Sha ku wutə nga, Urushalima, bərni na nggyarɗu ka adiya na akwa nar bwani aka mjirni!

²Tsa aɗi ana psi thləm aka mdə wa, tsa aɗi ana hir ka mdə nam ni wa. Tsa aɗi ana mbərsa ka MTHLAKU wa, wala shahədzi adzə Hyelərni wa.

³Kwakunayeri arni ndzi apa tsəngiyayeri na akwa tuwa, Alkaliyayeri arni ndzi apa mwaɓəlayeri na ka mi, na aɗi ana zhar ka vir kura aka su wa.

⁴Naɓiyayeri arni ku ndzi maɗa' shambar, da aɗi ka jiri wa, pristayeri arni ku higəlantə su na ɓɗakkarkara, ka ndwaləmta tsawur Hyel.

⁵Amma MTHLAKU na tsu akwa bərni ni, akwa hara su kalkal, tsa aɗi ana sha wa. Tədəku tsa akwa hara su na ka jirkur, tsa aɗi ɗar tsamtari wala ka pal wa. Amma səli ana ngka mji na ɗimi wa.

⁶MTHLAKU akwa pəla, “I ku kurəmta mjir tsəɗiyayeri hang, ka huzamta vəi ɗuwardzər ɗa. I ku higəlantə lakwayeri na akwa kutadi, har tə mji aɗi ana nu kəra wa. Bərniyayeri ku ndzi fya kula mji, mda aɗi na mbila akwa wala duku wa.

⁷I kəta abbər atar ngəni mjirna ata thlivər ra, ka hir kəi vu ɗa akwa laku. I kəta abbər da aɗi ata fwari ata kəra suayeri tə I tsaktə ɗa ata kər ni wa. Amma təng təkəma da ləkwa hara ɗimikur apatə da tsəli ka harari hwatu.”

⁸“Kamnyar ngəni I na MTHLAKU akwa pəla, ‘Sək giri vir natə I ata burkatə tsəɗiyayeri. Kamnyar I akwa bara tsaptə mjir duniya, kəi paktə kuthlikurayeri ata vəi duku, kəi pumta ɗəffi na bwarbwar ni ata da, ka shanga su na akwa fa ɗəffi ni. Kamnyar ka jili bwarbwarkur ɗəffa mdər səlkər hirkur, antə I ata shamta shanga mjir duniya.’ ”

⁹Jiri, vir nda I ata hamta mnya na kəcəkəcari aka mji, ka kəlara mda mzhi hara adduwa ali, I na MTHLAKU ka nu ra ka ɗəffari duku.

¹⁰Wala aɓəla bwanda thlyaghayeri ar Ithliyopiya, mji na ana vəngkər səli ali ka jirkur, mjirna na ku titiləmtadzi ata sə sənta ali sur hamta arɗa.

¹¹Vir nda, giri aɗi ata ləkwa səli kamnyar surharar giri ni wa. Kamnyar I ata shamta mjir gaya ka mjir karidzi na akwa nca giri. Antə mda aɗi ata jaktə wutə mdər gaya akwa nca giri ata gar arna na ɓɗakkarkar ni wa.

¹²Kamnyar mji tə I ata zharari akwa nca giri, an mji na ka tərghəi kər ka kanaɗi, mji na ana bara dlara akəli.

¹³Mjir Israila na mbil ka mpika aɗi ata jaktə hara ɗimikur wa, da aɗi ata thlandər aka mdə wa, zhar ka pwaktə mdə wa. Da ata səm susəma ka pəpəi lapiya, mdər jaktə thlivərantə ɗa aɗi kəra wa.

¹⁴Hara gir ha ka kuraku, giri na akwa Sihiyona! Haptə gir kuraku ka duna, giri na mjir Israila! Kucali giri, kucali giri ka ɗəffa giri shang, giri na mjir Urushalima!

¹⁵MTHLAKU ku kələmta ala giri bwani na ata kəra giri, ka kədləmta shanga dawayeri ar giri. MTHLAKU, na kuthlir Israila, an akwa nca giri antə su aɗi tə giri ata thlivərari kəra wa.

¹⁶Vir nda mda ata sə pəla aka Urushalima, “Sihiyona, ga aɗiya thlivər wa, dza ga aɗiya mtə wa.

¹⁷MTHLAKU na Hyelər nga an ata vəi duku ka ga, tsa an katsala na ana hamta dunar nggyari su. Tsa ata nggatə msərakur nga, antə tsa ata dunautə nga kamnyar tsa hir nga. Tsa ata hara ha ka kucali ata kəra ga,

¹⁸apatə mji ana hara akwa vir kucali na ola.” “I ata kələmta asar ata kəra giri, antə giri aɗi ata jaktə ləkwa səli kamnyar ni wa.

¹⁹Akwa saka ndaga antə I ata ɗi shanga mji na ku na ala giri bwani. I ata mbantə mji na nggurdəkəi, kəi tsaptə mji natə mdə ku kədləmta. Antə I ata hara ka mji hu ɗa ka na ɗa olkur, akwa kəlara tsəɗi tə da ku ləkwa səli.

²⁰Sakanda antə I ata tsaptə giri sakanda antə I ata ngka ka giri avəi. I ata vu ka giri hara thləm ka mji fwal giri, akwa shanga duniya, kamnyar I ata ngka ala giri ka barkayeri ar giri, giri ata wulari ka nca giri.” MTHLAKU an pəla.