Read bura-pabir Haggai 1 Bible Online

Haggai 1 - bura-pabir bible

Haggai 1

¹Akwa vira thliya ntang ar thliya na ngkwakur, akwa məva na suɗkur sakatə Dariyus an kuthlir Parsiya, antə MTHLAKU ku gari aka naɓi Haggai. Labar ngəni an kamnyar Zerubbabel na ɓzər Sheyaltiyel, gwamnar Yahuda, ka aka Joshuwa na ɓzər Yehozadak prist na ola.

²MTHLAKU na ka Duna ta Shang akwa pəla, “Mji ngəni akwa pəla sakar jaktə latə mbwar MTHLAKU aɗi hara katagu wa.”

³Antə MTHLAKU ku gari ala ɗa atar naɓi Haggai abbər,

⁴“Ngəni an sakatə ka giri ndzəndzi akwa mbwayeri tə giri lata, ka dəɓatə kutari ka katakowayeri na ɓɗakɓɗaku, amma mbwar vəngkər səli tsu ndlandlari ya?”

⁵MTHLAKU na ka Duna ta Shang akwa pəla, “Giri aɗi akwa wul su na akwa wutə giri wa ya!

⁶Giri ku thləka hang, amma giri ku thli raka. Giri ku səma, amma giri aɗi ndlə wa. Giri ku sa, amma aɗi mzhi tsi ala giri thləli wa. Giri ku hatə kari, amma shambar tsu adzə giri. Giri akwa dlu nta, amma təng ndzi apa giri akwa puwari akwa dlipu na ntulntulari.”

⁷MTHLAKU na ka Duna ta Shang akwa pəla, “Giri aɗi akwa wul su na akwa wutə giri wa ya?

⁸Mwar giri, ata gar ka giri nthlətsə udzəm, ka giri sə jaktə latə mbwa ni kəgari, kamnyar kəi nggatə msərakurari, tsuwa ka mdə vəngkər ali səli akwa.

⁹“Giri ku bara ka giri wutə su hang, amma təng giri sə wutə raka. Ngəni raka tə giri sənta avəi ni ma, I ku fiɓəla barkari. Kamnyar mə tə I hara apani ri? Kamnyar tə kəyirna ku ndzi fya, amma waskəi akwa kəɗar hən mbwar kərari.

¹⁰An su na hara tə vəi na amtazi ku ngkatə kəlangkəu, tə di tsuwa ngkatə yarni.

¹¹Tsuwa I ku səntə ulta akwa tsəɗi ni, ata garayeri, ka akwa fakayeri ar mthli ka anap, ka ar zaitun, ka shanga su na ana ptsəptsa akwa di. Antə ultə ngəni ku sənta asar ata kəra mji, ka mwaɓiyayeri, ka shanga su tə giri ghəra akwa harari.”

¹²Antə Zerubbabel na ɓzər Sheyaltiyel, ka Joshuwa prist na ola, natə tsa an ɓzər Yehozadak, ka shanga mambila mji ku kələngkər aka MTHLAKU na Hyelər ɗa, ka aka ndərər naɓi Haggai natə MTHLAKU na Hyelər ɗa ku thlenta. Antə mji ni ku ləkwa thlivər MTHLAKU.

¹³Antə Haggai natə MTHLAKU ku thlenta, ku hamta ala ɗa ndərərni ni abbər, “I na MTHLAKU I ata vəi duku ka giri.”

¹⁴Antə MTHLAKU ku tsəkwar ɗəffa Zerubbabel na ɓzər Sheyaltiyel, gwamnar Yahuda, ka Joshuwa prist na ola, natə tsa an ɓzər Yehozadak, ka shanga mji na mbila. Antə shanga ɗa ku si ka hara kəthlər ata kəra mbwar MTHLAKU na ka Duna ta Shang, natə tsa an Hyelər ɗa.

¹⁵Da baɗitə kəthlər ni akwa vir na sərkumari ka nfwarkur, ar thliya na ngkwakur, akwa məva na suɗkur ar Kuthli Dariyus.