Read bura-pabir Zakariya 1 Bible Online

Zakariya 1 - bura-pabir bible

Zakariya 1

¹Akwa thliya na nciskur, ar məva na suɗkur ar Kuthli Dariyus, antə MTHLAKU ku gari aka naɓi Zakariya na ɓzər Berekiya na ɓzər Iddo

²MTHLAKU ku pəla ali kəi pəla aka mji abbər, “I na MTHLAKU na ka Duna ta Shang, ɗəffi ku ɓzi ka duna adzə kəkayeri ar giri.

³Amma kulini I akwa pəla ala giri, ‘Ngka giri adzə ra antə I ata ngka adzə giri.

⁴Giri aɗiya ndzi apa kəkayeri ar giri natə naɓiyayeri na waci ku ngkər ala ɗa ndərərna ni wa. Da tsaktə ɗa abbər ka da tubi, ka da zhar suayeri na ɗimi ɗimi tə da ana hara ni. Amma da aɗi psi thləm ali wa, wala vədzə hangkala ɗa wa.’

⁵Kulini kəkayeri ar giri ni ama ri? Tsuwa naɓiyayeri ni ma, da ama ri? Da ku ndzi ba saka madi ya?

⁶Amma ai ndərayeri ka tsawayeri tə I hamta aka naɓiyayeri na mafarna ni ku nghyaɓəladzi ata kəra kəkayeri ar giri. Antə da ku shina kəma ka tubi, akwa pəla, ‘Su tə MTHLAKU na ka Duna ta Shang ku wutə kalkal ka tsa hara ka yeru ata kəra surharar yeru ka ɗimikur yeru. Tsuwa apani antə I ku hara ka da apatə I ku ɗəmha.’ ”

⁷Akwa vir na sərkumari ka nfwarkur ar thliya na kumkantang na an thliyar Shebat, akwa məva na suɗkur ar Kuthli Dariyus, antə MTHLAKU ku gari aka naɓi Zakariya na ɓzər Berekiya, ɓzər Iddo.

⁸Aviri antə I wutə mdə laga ata taku mamza athləthlata akwa nca nfur murtil akwa zərkəu. Abwahilari tsuwa takwayeri aɗi na mamza mamza, ka tabwa tabwa, ka na mwapmwapu, kəlara taku ka mdər fəlari ata.

⁹Antə I pəla, “Ngənayeri ni mə ri, mthlakərna?” Antə mdərthlentərhyel na akwa gari ka iya ni pəla, “I ata ncaɓəla ala gə karapur ɗa.”

¹⁰Antə mdə na athləthlata akwa nca nfur murtil ni shinau ka pəla, “Ngəniyeri ni an mji tə MTHLAKU thlentə ka da sə kadlə kadla akwa sək kəra duniya.”

¹¹Antə da shinau aka mdərthlentərhyel na ar MTHLAKU na athləthlata akwa nca nfur murtil ni abbər, “Yeru ku dlarhə duniya ni ka wuta abbər shanga duniya ni akwa ndzəndzi lapiya.”

¹²Antə mdərthlentərhyel na ar MTHLAKU ni pəla, “Shang nawa antə ga ata sə kətadzə Urushalima ka bərniyayeri na akwa Yahuda ri, diyayeri natə ɗəffa ga ku ɓza ata kəra ɗa ka məva murfəkumari ni?”

¹³Antə MTHLAKU shinau ka ndərayeri na msəra ka ar shiktədzi aka mdərthlentərhyel na gari ali ni.

¹⁴Antə mdərthlentərhyel na akwa gari ali ni pəla ali kəi psəmnya su tə MTHLAKU na ka Duna ta Shang ku pəla abbər, “I ka hirkur ka duna kamnyar Urushalima ka Sihiyona.

¹⁵Amma tsuwa ɗəffi ɓzəɓzari ka duna ata kəra tsəɗiyayeri na lapiya kula sur damitədzi. Ɗəffi ɓzi ata kəra mjirna ni raka daci, amma təng tsəɗiyayeri tə I pəla ka da ɗi ɗa ali hara ala ɗa bwani ka təramta vəyari.

¹⁶“Antə kulini I ku ngka adzə Urushalima kəi səzəmta ni. Mda ata jaktə latə mbwarna ni, kamnyar mda ata ngkərɓəla bərni Urushalima ka jaktə həntə ni.

¹⁷“Mdərthlentərhyel ni pəla ali kəi psəmnya su tə MTHLAKU na ka Duna ta Shang pəla abbər, “Bərniyayeri arna ata jaktə nghyi ka gəna, tsuwa I ata jaktə shiktə Sihiyona kəi jaktə namtə Urushalima ka tsa ndzi bərniyir na.”

¹⁸Aghəla nda su tə I wuta akwa wulsu ni an təmbəlayeri nfwar.

¹⁹Antə I pəla aka mdərthlentərhyel na akwa gari ali ni, “Ngənayeri ni mə tsu ri?” Antə tsa shinau ali ka pəla, “Təmbəlayeri ngəni an seɗar tsəɗiyayeri na si ka titiləmta Yahuda, ka Israila, ka Urushalima.”

²⁰Antə MTHLAKU ku ncanta ali mjir ɓdla nfwar.

²¹Antə I pəla, “Mji ngəni nfwar ni akwa sə hara mə ri?” Antə tsa shinau ka pəla abbər, “Təmbəlayeri ngəni an tsəɗiyayeri na titiləmta mjir Yahuda ni har tə mdər mzhi haptə kərari aɗi wa. Amma mjir ɓdlə nayeri ni an mji na si kamnyar thlivərantə tsəɗiyayeri ngəni nfwar ni, ka da ɓəgələmta təmbəla tsəɗi na ku haptə təmbəlari abbər tsa ata dlər Yahuda ka titiləmta mjirni.”