Read bura-pabir Zakariya 10 Bible Online

Zakariya 10 - bura-pabir bible

Zakariya 10

¹Kiɗə giri yimi akəla MTHLAKU akwa sakar vəya akəla MTHLAKU na ana namtə zhimaru, tsa na ana pughəi yimi aka mji ka vu ka su ptsa akwa fakər waskəi.

²Mji akwa nu haptayeri na akwa mnya gapangapani. Da akwa yu ɗeaghayeri na ana wutə mambəlayeri ar thlandər, ka nu mjir hakdzi, mjir thlandər ka su tə da wuta akwa suni ka shiktə ɗəffa mda ka thlandərayeri. Kamnyar ngəni mji akwa kadla apa təma, ka ɗar bwani kamnyar mdər ɓəla ɗa aɗi wa.

³Ɗəffi ku ɓzi ka duna ata kəra mjir ɓəla giri, antə I ata ɗi nciwayeri na akwa pwar giri ni. Ai I na MTHLAKU na ka Duna ta Shang ku mwari adzə mjirna adzə mjir nyarmbwar Yahuda. Antə I ata namtə ciɓər təma arna ni, ka tsa ndzi takur gayarna akwa mpa.

⁴Akwa nca giri na mjir Yahuda antə mda ata wutə pelar həna na ɓɗakta shang, ka wutə udzəmər la tent. Akwa nca ɗa antə mda ata wutə laliyir mpa, ka wutə kəlara mdər kuthlikur.

⁵Mjir Yahuda ata sə ndzi ata kəma duku apa sojayeri na katsala, da ata sə ntsəntsarəmta dawar ɗa akwa maɓu ar lakur kutadi. Da ata sə mpa kamnyar I na MTHLAKU ata ndzi adzə ɗa, antə da ata dlərəmta sojayeri ka takwayeri.

⁶I ata dunautə mjir Yahuda, tsuwa I ata mbantə mjir Israila. I ata ngka ka da avəi akwa tsəɗiyir ɗa kamnyar I akwa kətadzə ɗa. Da ata sə ndzi apa I aɗi ɗar nggəlar ɗa wa. Kamnyar I an MTHLAKU na Hyelər ɗa antə I ata nggatə tuwar ɗa kəi amsa ala ɗa.

⁷Antə Mjir Israila na akwa yala ata sə ndzi apa sojayeri na katsala, ɗəffa ɗa ata ndzi msəra ala ɗa apa da sa yimər anap. Maɗa' ɗa ata sə wutari ka hara kucali, ɗəffa ɗa ata sə ndzi msəra ala ɗa kamnyar su tə MTHLAKU ku hara.

⁸“I ata kapət ala ɗa tsi ka da si ka da tsaptədzi avəi ata kəma duku. I ata pəli ɗa shang, kəi vu ka da jaktə ndzi hang apa na waci.

⁹Wala tə I ku titiləmta ɗa akwa nca durayeri, tsu da ata ɗangtə ra akwa tsəɗiyayeri na ciju. Da kəga maɗa' ɗa ata ndzi ka mpika, ka ngka avəi ata kəma duku.

¹⁰I ata fwaɓəla ɗa kazhar tsəɗi Masar, ka fwaɓəla ɗa kazhar Assiriya, kəi səntə ɗa shang avəi akwa tsəɗiyir ɗa. I ata səntə ɗa akwa tsəɗi Gileyad ka Lebanon, har tar ma vəi ndzəndzi aɗi ala ɗa kəra wa.

¹¹Da ata təramta akwa mandar bwani, antə mpar yimi ata thləthlatə kamnyar ɗa tsuwa shanga kira Thlyagha Nayil ata ulantədzi. Mda ata shamta sur gayar mjir Assiriya, antə kuthlikur ar mjir Masar ata kura.

¹²I ata dunautə mjirna ka dunarna, antə da ata mwa ka thləmi. I na MTHLAKU an pəla.”