Read bura-pabir Zakariya 11 Bible Online

Zakariya 11 - bura-pabir bible

Zakariya 11

¹Kəlar nyarmbwayeri ar nga, Lebanon, kamnyar ka u'u mbamta nfur sedayeri ar nga!

²Tuwa giri, giri na nfur mənta, kamnyar mdə ku ndlagamta nfur sedayeri, kamnyar mdə ku higəlantə nfwayeri na ka daraja! Tuwa giri, giri na nfur ok na akwa Bashan, kamnyar mdə ku nthləgəmta kuɓər nfwayeri!

³Psi gir thləm! Mjir ɓəla akwa tuwa, kamnyar mdə ku tsi səliyir ɗa! Psi gir thləm! Tsəngiyayeri akwa tuwa, kamnyar mdə ku dlaɓumta dlədləkur Jodan!

⁴Ngəni an su tə MTHLAKU na Hyelər na pəla, “Ɓəla ciɓər təma natə mdə ku thlamta abbər mda ata thlagamta wulya ɗa.

⁵Mjir mastə təma ni ana thlagamta wulya ɗa ka təra kula mdə hara ala ɗa shariya. Tsuwa mjir ɗəl ɗa ana pəla, ‘Usa ala gə MTHLAKU, I ku hara gəna!’ Wala mjir ɓəla ɗa aɗi ana kətadzə ɗa wa.”

⁶MTHLAKU akwa pəla, “I aɗi ata jaktə kətadzə mjir tsəɗi ngəni wa. Kamnyar kulini I ata hamta kəlara mda akwa tsiya ntəwulərni ka kuthlirni. Antə mji na ol'ola ata kəra tsəɗi ni ata tsi tsəɗi ni, tsuwa I aɗi ata mbuli ɗa akwa tsiya ɗa wa.”

⁷Antə I ndzi mdər ɓəla ciɓər mwaɓi natə mdə ku thlamta abbər mda ata thlamta wulya ɗa, ciɓər mjir fəli təma. Antə I fatə zwal ɓəla suɗa, palari I vəta alari thləm “Ɓɗakkur”, dukwari tsuwa I vəta alari thləm “Paktə kər.” Antə I wulwul ciɓər təmayeri ni.

⁸I aɗi mzhi mbwi ɗəffi ata kəra mjir ɓəla laga makər wa, kamnyar da aɗi akwa hir ra wa. Antə I kədləmta ɗa akwa kuta thliya pal.

⁹Antə I pəla, “I aɗi ata ndzi mdər ɓəla giri kəra wa. Na ata mta ka tsa mta, na ata hila ka tsa hila. Na ku mbiləmta ka da ɓɗə kərɗa!”

¹⁰Antə I kətə zwal na ka thləmari “Ɓɗakkur” ka ɓəlwa ka bwa suɗa, kamnyar kəi ncanta abbər I ku tsi alkawal natə I hara aka shanga mjir Israila.

¹¹Antə mdə ku tuzhimta ndər ni vir nda. Apani antə mjir fəli təma ni, na akwa wul ra ni, ku nggaɓəla abbər I ku hara su ngəni apatə MTHLAKU pəla.

¹²Antə I pəla ala ɗa, “Ma giri wutə kalkal, ntəmta giri ali watsəɓərna. Amma ma giri wuta abbər aɗi kalkal wa, kəsi sur giri.” Antə da ntəmta ali watsəɓərna kwabar adzərfa makkumari.

¹³Antə MTHLAKU pəla ali, “Pu adzərfa ni akwa vəi pwi kwaba ni.” Akwa wutər ɗa an hangkur kwaba natə kalkal ka da ntəmta ata kəri. Antə I fatə kwaba adzərfa na makkumari ni, ka pu akwa vəi pwi kwaba na akwa mbwar MTHLAKU ni.

¹⁴Antə I ɓəlwa zwal na suɗkur na ka thləmari “Paktə kər.” I hara apani kamnyar kəi ncanta abbər I ku nthləmta mwardzi na akwa daɓwa Yahuda ka Israila.

¹⁵Antə MTHLAKU pəla ali, “Jaktə fatə kari kəthlər ar mdər ɓəla na kula ampani.

¹⁶Kamnyar I ata hara ka mdər ɓəla laga thlata akwa di ni, mdər ɓəla na aɗi ata damitədzi ata kəra təmarni na akwa sha wa. Tsa aɗi ata pakə maɗarari wa, wala mbantə natə səla ɗa ku ɓəlidzi wa, wala nar susəma aka na lapiya wa. Amma tsa ata ɓɗəmnya na təksətəksayerari, ka nthləgəmta mpəla ɗa.

¹⁷“Sha ku wutə nga, mdər ɓəla na ɗimi mdər hwi kazhar ciɓər təma arni! Ka katsakar nthləmta tsiya ga, ka kəɓəla nca gə na abwa mazəm! Ka tsiya ga shuwumtadzi purəm, ka nca gə na abwar mazəmari ndzi mdlyang!”