Read bura-pabir Zakariya 12 Bible Online

Zakariya 12 - bura-pabir bible

Zakariya 12

¹Ngəni an ndər tə MTHLAKU pəla ata kəra Israila. MTHLAKU na pshari vəi na amtazi, ka nci səla duniya, ka namtə mda ka fiu alari shambar ar mpika, akwa pəla,

²“Nggədza, I ata hara ka Urushalima ndzi apa kwapə na ata kəl kəra shanga mjir tsəɗiyayeri na kalaktə ni. Kəlara sakatə sojayeri ku kalaktə Urushalima ka mpa, mpa ndaga ata tsəkwar mjir Yahuda.

³Vir nda I ata hara ka Urushalima ndzi apa pela na kəgəɓu aka shanga mji. Kəlara mdə na ku pəla tsa ata haptari, pela ni ata hadləmta ni. Antə shanga mjirna akwa duniya ata sə tsaɓəngkərdzi alari.”

⁴MTHLAKU akwa pəla, “Vir nda, I ata thlivərantə shanga takur dawayeri ar giri, ka mjir fəl takwayeri ni hara cicu. Amma I ata wulwul kəra mjir Yahuda, sakatə I ku vu shanga takur dawayeri ni tə da ndzi mdlyang.

⁵Antə mjir nyarmbwar Yahuda ata sə pəla akwa ɗəffa ɗa abbər, ‘Mjir Urushalima ku wutə duna akəla Hyelər ɗa MTHLAKU na ka Duna ta Shang.’

⁶“Vir nda I ata hara ka nyarmbwar Yahuda ndzi apa hahəi u'u na akwa mba akwa nca udzəm, wala apa Zafu akwa nca julang mthli. Antə da ata mbamta shanga mji na kalaktə ɗa abwa matsəkar ka bwa mazəm, amma su aɗi na ata tsəkwar mjir Urushalima wa.

⁷“Antə I na MTHLAKU ata mbantə sojayeri ar Yahuda ntangkəma, kamnyar ta səliyir mjir nyarmbwar Dauda ka na ar mjir Urushalima asə təramta səliyir mjir Yahuda.

⁸Vir nda I na MTHLAKU ata ɓəlatə shanga mji na akwa Urushalima, tə wala mdə na kula duna ta shang ata sə ndzi ka duna apa Dauda. Antə mjir nyarmbwar Dauda ata sə ndzi apa mjirthlentərna, apa I na Hyel ka kəri.

⁹Vir nda tsuwa I ata wuta abbər I ku kurəmta shanga mjir tsəɗiyayeri na ku si kamnyar dlər Urushalima.”

¹⁰I ata pungkər mambələr kətadzə mda ka na ar hara adduwa ata kəra mjir nyarmbwar Dauda ka shanga mjir Urushalima. Da ata sə wul ra, I natə da ntsəvəmta ni, ka da tuwa kamnyar na apatə mji ana tuwa mtər ɓzər ɗa na duku ɗeng, apatə mji ana tuwa ka ɗəffu ata kəra mtər yarakəma arɗa.

¹¹Vir nda mda ata sə tuwa ka duna akwa Urushalima apa jili tuwa tə mdə hara kamnyar Hadad Rimmon akwa bəbalər Megiddo.

¹²Shanga mjir Israila ata sə tuwa, kəlara kutakəi ata sə fwaɓəla kərɗa. Mjir kutakəyir Dauda ata fwaɓəla kərɗa, mwankir ɗa ata sə fwaɓəladzi ka bwar ɗa. Mjir kutakəyir Nathlan ata sə fwaɓəla kərɗa, mwankir ɗa ata fwaɓəladzi ka bwar ɗa.

¹³Mjir kutakəyir Lawi ata sə fwaɓəla kərɗa, mwankir ɗa ata sə fwaɓəladzi ka bwar ɗa Mjir kutakəyir Shimeyi ata sə fwaɓəla kərɗa, mwankir ɗa ata sə fwaɓəladzi ka bwar ɗa.

¹⁴Shanga kutakəyayeri na ku mbila, kəlara akwa nca ɗa ata fwaɓəla kərɗa, mwankir ɗa tsuwa ata fwaɓəladzi ka bwar ɗa.