Read bura-pabir Zakariya 13 Bible Online

Zakariya 13 - bura-pabir bible

Zakariya 13

¹Vir nda mda ata sə mburəmta mnya kucirkila kamnyar ka mdə kəcimta bikər mjir nyarmbwar Dauda ka mjir Urushalima ka shanga dlimburkurər ɗa.

²MTHLAKU na ka Duna ta Shang akwa pəla, “Vir nda, I ata fwaɓəla shanga haptayeri kazhar tsəɗi ni, har tə mda aɗi ata sə jaktə ɗangtə ɗa kəra wa. Tsuwa I ata shamta naɓiyayeri na ana thlandər ka mambəlayeri na ɗimi ɗimi kazhar tsəɗi ni.

³Antə ma kəlara mdə na ku jaktə ləkəma ka hara naɓikur, to, ka baba'ni wala mama'ni na yaɓəla ni pəla alari, ‘Ga aɗi ata ndzi ka mpikə wa, kamnyar ga ku thlandər ka thləma MTHLAKU.’ Antə baba'ni ka mama'ni na yaɓəla ni ata ntsəvəmta ni sakatə tsa akwa hara naɓikur.

⁴Vir nda kəlara naɓi ata sə nggatə səliyir su tə tsa wuta akwa naɓikurərni. Tsa aɗi ata nggitə hatə ləptərni na ka shishi ka pwaktəmta mji kəra wa.

⁵Amma tsa ata pəla, ‘Diya I aɗi naɓi mai, arna I mdər tsuhwa. Ai təng akwa ngkyarkurər na I ana tsuhwa.’

⁶Ma mdə na ku yu ni abbər, ‘Kaha, man dəkəi nga ata kərathla gə nə ri?’ Tsa ata pəla, ‘Nayeri ni an mbəlkə tə I wuta akwa kəyir pazhayeri arna.’ ”

⁷MTHLAKU na ka Duna ta Shanga akwa pəla, “Thlata, katsakar, ka ra pwa ata kəra mdər ɓəla arna, ka ra mpa mdə na pazhir na. Tsa mdər ɓəla təmayeri ni ka təmayeri ni titiləmtadzi, I ata tsa təmayeri na raka raka.

⁸Akwa shanga tsəɗi ni kəlara vəi tə mji ku hara makər ata mda ata tsi suɗari, vəi tə mji ku hara makər ata, duku an ata mbil ka mpika.

⁹I ata ngkərtə dukwa makər ni akwa u'u, kəi mbaɓəla ɗa apatə mda ana mbaɓəla adzərfa, kəi ngkərtə ɗa apatə mda ana ngkərtə dinar. Da ata kəga ra I ata shinau ala ɗa. I ata pəla, ‘Da an mjirna.’ Tsuwa kəlara akwa nca ɗa ata pəla, ‘MTHLAKU an Hyelərna.’ ”