Read bura-pabir Zakariya 14 Bible Online

Zakariya 14 - bura-pabir bible

Zakariya 14

¹Nggədza virari akwa si, vir tə MTHLAKU ata hara ala giri shariya. Vir nda mda ata famnya kariyir giri ka ndəkəmta ata nca giri.

²Kamnyar I ata tsaɓəngkər shanga tsəɗiyayeri ata kəra Urushalima. Da ata sə ngkəi bərni ni ka mpa, ka da famnya kariyir kutakəyir ɗa. Da ata sə ngka mwankir Urushalima ka pi ka da kula hirər ɗa, ka fatə retar mji na akwa bərni ni ka mwantə ɗa akwa mafakur. Amma mda ata sə zhar mambila mji tsu akwa bərni ni.

³Aghəla nda antə MTHLAKU ata sə ləɓəla ka mpa tsəɗiyayeri ni, apatə tsa ana hara hwatu akwa sakar mpa.

⁴Vir nda tsa ata thləthlata ata Gar Zaitun na akwa raghəi ka Urushalima. Antə Gar Zaitun ni ata ndəkəudzi ka bwa suɗa, baɗita abwar raghəi ka mwanta akwa ramta, kazhar mular na ola akwa daɓwa ɗa. Retar gar ni ata mwari abwar yala, bwadukwa gar ni ata mwari abwar anəm.

⁵Antə giri ata sə hwi kamnyar msərantə kər giri atar mular na akwa daɓwa garayeri ni, kamnyar mular ngəni ku mzhitə Azal. Giri ata hwi tsu apatə kəkayeri ar giri ku hwi akwa sakar kənggərər di na hara akwa zamanər Uzziya na kuthlir Yahuda. Aghəla nda antə MTHLAKU na Hyelərna ata sə səghəi ata kəma duku ka mjirthlentərni.

⁶Vir nda mda aɗi ata nggatə pci gərgər wala vəi mtathlaku wa, zhar ka handzəkəla wa.

⁷Vir ndaga ata ndzi zum ta hwada, təpci aɗi wa, viri aɗi wa, kamnyar wala aviri parakəu aɗi. MTHLAKU shini an asəndə laku tə vir nda ata sə ndzi akwa.

⁸Vir nda yimər hamta mpika ata hwi səɓəla akwa Urushalima, retar yimi ni ata sə mwari akwa manda na abwar raghəi, retari tsuwa ata mwari akwa manda na abwar ramta. Antə yimi ni ata ləkəma ka hwi fakə ka vəya.

⁹Antə vir nda MTHLAKU ata ndzi kuthlir shanga duniya. MTHLAKU duku shini antə mda ata sə hu thləmari.

¹⁰Antə tsəɗi ni, baɗita akwa Geba na akwa yala ka Yahuda ka mwanta aka Rimmon na akwa anəm ka Urushalima, shang ata ndzi bəbal. Amma Urushalima ata ləkəma ka ndzi ata gar ata vəi tə tsa akwa ndzəndzi ata kulini, baɗita akwa Nyarfur Benjamin ka mwari adzə Nyarfur Kuɗəma, ka tsuwa baɗita akwa hən na nal ar Hananel ka mwanta adzə vəi ntsar yimər anap ar kuthli.

¹¹Antə Urushalima ata ndzi vəi ndzəndziyir mji, mji ata ndzəndzi akwa lapiya kula thlivər asar.

¹²Nggədza jili asar natə MTHLAKU ata thlentari aka shanga tsəɗiyayeri na akwa mpa ka Urushalima. Kumər dza ɗa ata hiɗa tə da tsu athləthlata ata səla ɗa. Nca ɗa ata hiɗa akwa gular nca ɗa, tsuwa kyanggyara ɗa ata hiɗa akwa mnya ɗa.

¹³Vir nda MTHLAKU ata hara ka mji ni thlivər ka ndəndatədzi ka duna, har tə kəlara mda ata tamtə tsiya nvwani ka dlaɓu ni.

¹⁴Wala mjir Yahuda ata mpa akwa Urushalima. Antə mda ata tsaptə shanga gənar tsəɗiyayeri na kalaktə Urushalima. Mda ata tsaptə dinar, ka adzərfa, ka ləptayeri hang ka duna.

¹⁵Antə jili asarayeri ngəni ata pwa ata kəra takwayeri, ka kwaraləbandərayeri, ka dləkəmauwayeri, ka kwarayeri, ka shanga mwaɓiyayeri na akwa vəi fəli na hang ni.

¹⁶Antə shanga mji na ku mbila akwa tsəɗiyayeri na ku ra dlər Urushalima ata sə mwari ahar Urushalima tədək məva kamnyar vəngkər səli. Da ata vəngkər səli aka Kuthli, tsa na MTHLAKU na ka Duna ta Shang, ka da hara Kucalər Kir Səva anda.

¹⁷Antə kəlara tsəɗi na aɗi mwari ahar Urushalima kamnyar vəngkər səli aka Kuthli, MTHLAKU na ka Duna ta Shang wa, da ata ni ka yimərhyel.

¹⁸Tsuwa ma mjir Masar aɗi mwari ahar Urushalima kamnyar Kucalər Kir Səva wa, da aɗi ata wutə yimərhyel wa. Tsuwa MTHLAKU ata pungkər alari asarayeri tə tsa pungkər aka tsəɗiyayeri na nggəlar ta mwari akwa Kucalər Kir Səva.

¹⁹Ngəni an ata ndzi ɗya tə mda ata hara aka Masar ka mambila tsəɗiyayeri na aɗi mwari akwa Kucalər Kir Səva tədək məva wa.

²⁰Vir nda mda ata rəbutə ndər ngəni ata kyangkyangayeri na akwa wulya takwayeri, “MDƏ KU HAMTA NI AKA MTHLAKU.” Tsuwa shanga tughumayeri na akwa mbwar MTHLAKU mda ata hamta ɗa tsu apa tasayeri na akəma bagaɗiyir hamta saɗaka.

²¹Tsuwa shanga tughumayeri na akwa Urushalima ka Yahuda ata ndzi ɓɗakkarkara aka MTHLAKU na ka Duna ta Shang. Antə kəlara mdər hamta saɗaka ata mzhi kətə kəlara akwa nca ɗa ka tsa ɓwatə kumər saɗaka ni akwa. Antə baɗitə ka vir nda, mda aɗi ata jaktə wutə mdər fəli akwa mbwar MTHLAKU na ka Duna ta Shang kəra wa.