Read bura-pabir Zakariya 2 Bible Online

Zakariya 2 - bura-pabir bible

Zakariya 2

¹Aghəla nda su tə I wuta akwa wulsu ni an mdə laga na ka səwur ngkər su akwa tsiyari.

²Antə I pəla alari, “Ga akwa ləma ri?” Antə tsa pəla ali, “I akwa mwari ra ngkərtə Urushalima, kamnyar ka mdə səndə baukurər ni ka saɓəlkurər ni.”

³Antə mdərthlentərhyel tə yeru akwa gari ka tsa ni təra ka kəɓa ka mdərthlentərhyel damwa na akwa si adzə ni.

⁴Antə mdərthlentərhyel ni pəla aka mdərthlentərhyel natə yeru gari ka tsa ni abbər, “Hwihwi, ka gə ra pəla aka ɓzərdakwi na ka səwur ngkər su nda abbər mji ata nghyantə Urushalima kacakaca! Har mda ata ni ka vəi hənəngkər alari katangga kamnyar hangkur mji ka mwaɓiyayeri na akwa.

⁵Kamnyar MTHLAKU pəla abbər tsa ka kərari surni an ata ndzi katangga ar u'u na ata kalaktə bərni ni, tsuwa tsa ata ndzəndzi akwa kuta bərni ni ka səliyirni.”

⁶MTHLAKU akwa psəmnya abbər, “Mwa giri, mwa giri! Hwi giri kazhar tsəɗi yala ni! I ku titiləmta giri akwa kəlara bwa, akwa kuɗəmar shambarayeri na nfwar.

⁷Mwa giri, giri na mjir Sihiyona! Hwi giri, giri na akwa bərni Babila!”

⁸MTHLAKU na ka Duna ta Shang ku thlentə ra, ka ndər ngəni aka mji na famnya sur giri abbər, “Kəlara mdə na ku tsəkwar mjirna, tsa ku tsəkwar su na ɓɗakta shang apa ɗəvər nci.

⁹Antə jiri, I ata haptə tsi kəi ɓdləmta ɗa, antə mafayeri arɗa ata famnya kariyir ɗa.” Atar ngəni antə giri ata sənda abbər, MTHLAKU na ka Duna ta Shang an thlentə ra.

¹⁰MTHLAKU akwa pəla, “Hara gir ha ar kucali ka kuraku, giri na mjir Urushalima! Kamnyar I akwa si kulini, kəi ndzəndzi akwa nca giri.”

¹¹“Antə vir nda mjir tsəɗiyayeri hang ata sə paktə kər ka si adzə ra, antə tsuwa da ata ndzi mjirna. I na MTHLAKU ata ndzi akwa nca giri.” Atar ngəni antə giri ata sənda abbər MTHLAKU na ka Duna ta Shang an thlentə ra adzə giri.

¹²MTHLAKU ata ndzi mthlakər Yahuda, mjir fa kifa ar tsəɗi na ɓɗakkarkara, ka jaktə carɓəla Urushalima ka tsa ndzi bərniyirni.

¹³Dləɓ giri səri akəma MTHLAKU, shanga giri na ka mpika! Kamnyar tsa akwa thlata akwa vəi ndzəndziyirni na ɓɗakkarkara.