Read bura-pabir Zakariya 3 Bible Online

Zakariya 3 - bura-pabir bible

Zakariya 3

¹Antə MTHLAKU ku ncanta ali Joshuwa prist na Ola, athləthlata akəma mdərthlentərhyel na ar MTHLAKU. Tsuwa shatan ku thləthlata abwa mazəma Joshuwa akwa burkatə Joshuwa.

²Antə MTHLAKU pəla aka Shatan, “I na MTHLAKU akwa mpa ala ga, gə na Shatan! I na MTHLAKU na carɓəla Urushalima ka tsa ndzi akwa mpa ala ga. I ku msərantə Joshuwa ngəni apatə mda ana ndəkərɓəla udzəm kazhar u'u.”

³Akwa saka ngəni Joshuwa ku hatə kari na ka diɗi ka thləthlata akəma mdərthlentərhyel.

⁴Antə mdərthlentərhyel ni pəla aka mji na athləthlata akəmari ni, “Fəi giri ləptu na ka diɗi adzə ni ni.” Antə tsa pəla aka Joshuwa, “Ngəni akwa ncanta abbər I ku kəli biku na ata kəra ga, tsuwa I ata hadza ala gə ləptayeri na ka daraja.”

⁵Antə I pəla, “Ka da hata alari dzakwar pristkur na kula diɗi.” Antə da ku hata alari dzakwar pristkur na kula diɗi ni, ka hadza alari ləptayeri tə mdərthlentərhyel na ar MTHLAKU athləthlata anda akwa wulari.

⁶Antə mdərthlentərhyel na ar MTHLAKU ku dunautə Joshuwa abbər,

⁷“MTHLAKU na ka Duna ta Shang akwa pəla, ‘Ma ga ata ɓəla tsawayeri arna ka nu suayeri apatə I ku pəla ala ga, antə ga ata ndzi ola ata kəra mbwar vəngkər səli arna ka ata kəra shanga su na akwa bəbal kutakəi ni. Tsuwa I ata na ala gə dunar mzhi si ka gari aka mjirthlentərna na athləthlata akəmi ni.

⁸Apani psi thləma ga Joshuwa, gə na Prist na Ola, tsuwa psi giri thləma giri, giri na akwa kəthlər ata vəi duku ka tsa ni, kamnyar giri an seɗar su na pwa akəmazi. Nggədza tsuwa I ata səntə mafarna, mdə tə mda ata kathləmari Thləla.

⁹Kamnyar nggədza I ku vəi pela akəma Joshuwa, pela na ka kəmari murfa. Antə I ata thlaɓəla rəbutə laga ata. Tsuwa I ata famta bikər tsəɗi ngəni akwa kuta vir pal.

¹⁰Vir nda kamnyar lapiyakur ka msərakur na aɗi, waskəi ata kəga ntəwulərni kamnyar ka da ɓukci akira nfur anapərni ka nfur kamnda.’ ”