Read bura-pabir Zakariya 4 Bible Online

Zakariya 4 - bura-pabir bible

Zakariya 4

¹Antə mdərthlentərhyel na gari ali ni jaktə si ka damwa, ka thlentə ra wula, apa shang I akwa heni.

²Antə tsa pəla ali, “Mə tə gə wutə ri?” Antə I pəla, “I wutə vəi vətə pitəla natə mdə nam ka dinar ka tasa na ka mal ata kər. Tsuwa ata mnya tasa ni mnya pitəlayeri aɗi murfa, kəlara pal ka lagwani murfa.

³Tsuwa athlimbəla vəi vətə pitəla ni, nfwayeri ar Zaitun aɗi suɗa, pal abwa mazəma, pal abwa matsəkar.”

⁴Antə I yu mdərthlentərhyel na gari ali ni abbər, “Man karapur suayeri ngəni tsu ri, zanuwa?”

⁵Antə mdərthlentərhyel pəla ali, “Ga asəndə suayeri ngəni wa ya?” Antə I pəla, “Awa, zanuwa, I asəndə wa.”

⁶Antə tsa pəla ali, “Ngəni an su tə MTHLAKU pəla aka Zerubbabel, ‘Aɗi atar duna wa, wala atar kuthlikur wa, amma atar Mambəl arna, ndə MTHLAKU na ka Duna ta Shang.’

⁷Suari aɗi wa, gar aɗi na ata mzhi ngkatə Zerubbabel ta tsa atəramta wa. Wala gar na ola apa mə ri, tsa ata hadləmtadzi ka ndzi bəbal akəma ga. Antə Zerubbabel ata sə nci pelar səla mbwar vəngkər səli aka MTHLAKU, sakatə mji akwa haptə kuraku ka pəla, ‘Ka Hyel vədzə barka, ka Hyel vədzə barka, ka Hyel vədzə barka.’ ”

⁸Antə MTHLAKU pəla ali abbər,

⁹“Zerubbabel an vəi səla mbwar vəngkər səli ngəni, antə tsa an ata kuriyari. Atar ngəni antə giri ata sənda abbər MTHLAKU na ka Duna ta Shang an thlentə ra adzə giri.

¹⁰Antə ma mda aɗi na ku rutə suayeri tə mdə baɗitə raka akwa vir baɗitari ni, mdari ata sə hara kucali ma sakatə da ku wutə səwur ngkər tsikəra hən ni akwa tsiya Zerubbabel. Tsuwa ata kəra pitəlayeri ngəni murfə ni, da ndzi apa seɗar nca MTHLAKU na akwa wul shanga su na akwa duniya.”

¹¹Antə I yu mdərthlentərhyel ni abbər, “Man karapur nfur zaitun na abwa mazəm ka matsəkara vəi vətə pitəla nə ri?

¹²Tsuwa man karapur tsiya nfur zaitun na suɗa, na akwa hamta mal akwa bututu ar mal na suɗa tə mdə nam ka dinar nə ri?”

¹³Antə tsa pəla, “Ga aɗi səndə karapur suayeri ngəni wa ya?” Antə I pəla, “Awa, zanuwa, I asəndə wa.”

¹⁴Antə tsa pəla, “Karapur tsiya nfwayeri ngəni an mji suɗa natə Hyel ku carɓəla ka pwi kamnyar ka da hara kəthlər alari, tsa na Mthlakər shanga duniya.”