Read bura-pabir Zakariya 5 Bible Online

Zakariya 5 - bura-pabir bible

Zakariya 5

¹Antə I haptə nci ka damwa ka wutə kakaɗə laga akwa mwa ata hyel.

²Antə tsa pəla ali, “Man tə gə wutə ri?” Antə I shinau alari abbər, “I ku wutə kakaɗə laga kəlarkəlarari akwa mwa ata hyel. Saɓəlkurər kakaɗə ni an dzartsi sərkumari, baukurər ni dzartsi kuma.”

³Antə tsa pəla ali, “Kakaɗə ngəni an ka asarayeri zumzum tə mdə rəbuta akwa na ata ndlətə shanga tsəɗi ni. Ata kəmari na pal mdə ku rəbuta abbər kəlara mdə na ku həla mda ata kədləmta ni. Ata kəmari na duku tsuwa mdə ku rəbuta abbər kəlara mdə na ku kahyel gapani mda ata kədləmta ni.

⁴MTHLAKU na ka Duna ta Shang pəla, ‘I ata thlentə labar ngəni akwa kəlara kəyir mdər həla, ka kəlara mdə na ana kahyel ka thləmi kula suari aɗi. Antə asar ni ata ləvəi ka ndzi avəyarngkiɗa har tar ma tsa ku kwasəmnya kəi ni, purəm kəga udzəmər kəi ni ka katako ka pelayeri tə mdə la kəi ni kəgari.’ ”

⁵Antə mdərthlentərhyel na gari ali ni jaktə si ka pəla ali, “Haptə nca ga, kara wutə su na akwa si ni!”

⁶Antə I pəla, “Ngəni mə ri?” Antə tsa pəla, “Ngəni an thlambələr ngkər hangkur su. Tsuwa tsa akwa ncantə ɗimikur tə mji hara akwa shanga tsəɗi ni.”

⁷Mdə nam sur hartə mnya thlambəl ni ka liya dalma! Sakatə mdə kəlar kəra thlambəl ni təng nggədza mwala laga andzəndzi akwa.

⁸Antə mdərthlentərhyel ni pəla, “Mwala ngəni an seɗar kəmanggarkur.” Antə tsa jaktə ntsarghəi ni akwa thlambəl ni ka jaktə hartə mnyari.

⁹Sakatə I jaktə haptə nci təng I wutə mwanki laga suɗa akwa səghəi ata hyel təbwar yeru! Kamnyar da ka ɓəɓəku apa ar shaduwar. Antə da si ka kətə thlambəl ni ka fəl ka təra kəgari.

¹⁰Antə I yu mdərthlentərhyel na akwa gari ali ni abbər, “Da akwa mwantə thlambəl ni ama ri?”

¹¹Antə tsa pəla ali, “Da ata mwantari akwa tsəɗi Babila, ka da lata alari mbwa. Ma sakatə da ku kuri latə mbwa ni, da ata kətə thlambəl ni ka da vəi ni ata vəi tə mdə ɗəmha alari.”