Read bura-pabir Zakariya 6 Bible Online

Zakariya 6 - bura-pabir bible

Zakariya 6

¹Sakatə I jaktə haptə nci, təng I wutə wagənər takur mpa nfwar akwa səɓəla akwa daɓwa garayeri suɗa. Tsuwa garayeri ni da an gar əmza.

²Wagən na ntangkəma, takwayeri na mamza mamza an akwa ndəkərari. Wagən na suɗkur, takwayeri na mənggəl mənggəl an akwa ndəkərari.

³Wagən na makərkur, takwayeri na mwapmwapu an akwa ndəkərari. Wagən na nfwarkur, takwayeri na pənju pənju an akwa ndəkərari.

⁴Antə I pəla aka mdərthlentərhyel na gari ali ni abbər, “Man karapur su ngənayeri ni tsu ri, zanuwa?”

⁵Antə mdərthlentərhyel ni shinau ali, abbər, “Ngənayeri ni an mambəlayeri nfwar na ana thləthlata akəma Mthlakər shanga duniya. Kulini da akwa səɓəla kamnyar ka da ra kəthlər alari.

⁶Wagən natə takwayeri na mənggəl mənggəl akwa ndəkərari ni ata mwari akwa tsəɗi na abwar yala, wagən natə takwayeri na mwapmwapu akwa ndəkərari ni ata mwari akwa tsəɗi na abwar ramta. Wagən natə takwayeri na pənju pənju akwa ndəkərari ni ata mwari akwa tsəɗi na abwar anəm.”

⁷Sakatə takwayeri ngəni na ka duna ni səɓəla, da ka ɗəffər ra dlarhə duniya kamnyar ka da wuta abbər kəlara bwa lapiya. Mdərthlentərhyel ni pəla, “Mwar giri, ka giri dlarhə duniya ka wuta abbər shanga bwa lapiya.” Antə da ku təra mwari.

⁸Sakatə da ku təra, antə mdərthlentərhyel ni kəga ra ka kuraku ka pəla ali, “Mji ngəni mwari abwar yala ni, ata hara ka ɗəffa MTHLAKU na ɓzə ni pwi.”

⁹Antə MTHLAKU ku jaktə gari ali abbər,

¹⁰“Mwari, gə sur nga, avəyar Yosiya na ɓzər Zafaniya tsu ashina, ka gə dlu cautər adzərfa ka dinar akəla Heldai, Tobiya ka Yedaiya. Da haɗa thlata akwa mafakur ahar Babila.

¹¹Dlu adzərfa ka dinar ni ka gə namtə dzakwar kuthlikur, ka gə ra vəngkərari ata kəra Joshuwa na ɓzər Yehozadak Prist na ola.

¹²Pəla alari su tə MTHLAKU na ka Duna ta Shang pəla abbər, ‘Nggədza mdə na ka thləmari Thləla! Kamnyar akwa vəi tə tsa ptsa ata, tsa ata kəla ka thləla, ka həntə mbwar vəngkər səli aka MTHLAKU.

¹³Tsa an ata həntə mbwar vəngkər səli aka MTHLAKU, ka ndzi ka səli tə mda ana hamta aka kuthli. Tsa ata ndzəndzi ata dəkəl kuthlikur ka hara kuthlikur. Tsuwa tsa ata ndzi prist ata dəkələrni. Tsuwa shanga su ata ndzi lapiya.’ ”

¹⁴Antə dzakwar kuthlikurərni ata ndzi akwa mbwar vəngkər səli aka MTHLAKU, ka ndzi apa sur ɗangta aka Heldai, Tobiya, Yedaiya, ka Yosiya na ɓzər Zafaniya.

¹⁵Antə mji na ciju ata sə si kamnyar dlara akwa hən mbwar vəngkər səli aka MTHLAKU, antə giri ata sə sənda abbər MTHLAKU na ka Duna ta Shang thlentə ra adzə giri. Antə ngəni ata sə hara ka təramta, ma giri ata kələngkər aka shanga su tə MTHLAKU na Hyelər giri ku pəla.