Read bura-pabir Zakariya 7 Bible Online

Zakariya 7 - bura-pabir bible

Zakariya 7

¹Akwa vir na nfwarkur ar thliya əmdla natə mda ana kəga Kislev, akwa sakatə Kuthli Dariyus ka məvari nfwar akwa kuthlikur, antə MTHLAKU ku jaktə gari aka Zakariya.

²Akəmata ngəni mjir Bethlel ku kurtə thlentə Sharezer ka Regemmelech ka mjir ɗa ka da kiɗə dlara akəla MTHLAKU.

³Da ata yu pristayeri na akwa mbwar vəngkər səli aka MTHLAKU na ka Duna ta Shang, ka naɓiyayeri abbər, “Ka yeru ləkəma ka tuwa ka kəl asham akwa thliya na ntəfkur apatə yeru tsəli ka harari akwa məvayeri na təramta ya?”

⁴Antə MTHLAKU na ka Duna ta Shang ku jaktə gari ali abbər,

⁵“Mwari ka gə pəla aka shanga mjir tsəɗi ni ka aka pristayeri abbər, ‘Akwa məva murfəkumari na təramta tə giri akwa tuwa kəl asham akwa thliya na ntəfu ka murfə ni, ar jirkurari giri hara asham ni kamnyar na ya?

⁶Sakatə giri akwa səm ka sa ni, aɗi giri sur giri an akwa nggatə msərakurari wa ya?

⁷Aɗi tsu ndər ngəni antə MTHLAKU pəla aka naɓiyayeri arni ka da psəmnya waci ni wa ya? Aɗi jili ndər ngəni antə mdə psəmnya akwa sakatə Urushalima ka diyayeri na kalaktə ni ku nghyi ka mji ka gəna, sakatə bwar anəm ka bwar ramta ka tsəɗiyayeri na akwa dəraku ku nghyi ka mji ni wa ya?’ ”

⁸Antə MTHLAKU jaktə gari aka Zakariya:

⁹Waci MTHLAKU na ka Duna ta Shang ku pəla aka mjirni abbər, “Ka giri hara su akwa kutar jirkur, ka giri hara ɓɗakkur ka waskəi kətadzə nvwani.

¹⁰Giri aɗiya hara bwani aka mwala kughung, wala maɗa' muta wa, wala mətəpi, wala mji turtura wa. Tsuwa giri aɗiya ɗəmhə ɗimikur ata kəra nvwa giri wa.”

¹¹Amma kəkayeri ar giri aɗi vədzə hangkala ɗa aka su tə I pəla wa. Da dzəɓtə thləma ɗa ka hara nggyarɗəkur akwa hara su engthlang engthlang.

¹²Da namtə ɗəffa ɗa ɓəɓal apa pela ta da anggatə tsawur Musa ka su tə MTHLAKU na ka Duna ta Shang pəla atar Mambələrni aka naɓiyayeri arni waci. An su na hara tə ɗəffa MTHLAKU na ka Duna ta Shang ku ɓzi ka duna ata kəra ɗa ni.

¹³“Antə təng tə da ku nggəlar psi thləm ali sakatə I ndəra ala ɗa, sakatə da hara adduwa ali tsuwa I aɗi psi thləm ala ɗa wa”, ndə MTHLAKU na ka Duna ta Shang.

¹⁴“Antə I titiləmta ɗa ka shambar na mwavər ka ndəndəkəmta ɗa akwa durayeri zumzum tə da aɗi səndə wa. Apani antə tsəɗiyir ɗa ku ndzi fya kula mda akwa. Apani antə da ku hilantə tsəɗi na msəra ni tə tsa ndzi kula mda.”