Read bura-pabir Zakariya 8 Bible Online

Zakariya 8 - bura-pabir bible

Zakariya 8

¹MTHLAKU na ka Duna ta Shang ku jaktə gari ali ka pəla,

²“I ka hirkur ka duna aka Sihiyona, har ɗəffi akwa mba ra ka duna ata kəra dawarni.’

³“Antə kulini MTHLAKU akwa pəla, ‘I ata ngka akwa Sihiyona, kəi ndzi akwa kuta bərni Urushalima. Mda ata sə kəga Urushalima Bərni na ka Jirkur, gar ar MTHLAKU na ka Duna ta Shang, Gar na Ɓɗakkarkara.’

⁴“MTHLAKU na ka Duna ta Shang akwa pəla, ‘Mji halhala shili ka mwanki ata sə jaktə ndzəndzi ata mnya lakwayeri ar Urushalima, kəlara mda ka zwalər mwarni akwa tsiyari, kamnyar halhalkurər ni.

⁵Antə lakwayeri na akwa kutadi ata sə nghyi ka maɗangkyar shili ka mwanki na akwa gyali.’

⁶“MTHLAKU na ka Duna ta Shang akwa pəla, ‘Ma giri amzhi hara su ngəni wa, giri na mjirna na ku mbil ka mpika, akwa virayeri ngəni. Arna tsa aɗi su na mwavər wa! I na MTHLAKU an pəla.’

⁷“MTHLAKU na ka Duna ta Shang akwa pəla, ‘I ata msərantə mjirna na akwa mafakur, akwa tsəɗiyayeri na akwa ramta ka raghəi,

⁸I ata səntə ɗa ka ndzəndzi akwa Urushalima. Da ata ndzi mjirna antə I ata ndzi Hyelər ɗa, akwa jirkur.’ ”

⁹MTHLAKU na ka Duna akwa pəla, “Ntsətə girdzi ka giri ndzi ɓəɓal, giri na ku nggatə labar ngəni ashina. Naɓiyayeri ku ngkər gari ngəni akwa sakatə mda akwa jaktə nci səla mbwar vəngkər səli ali.

¹⁰Akəmata mda abaɗitə jaktə hən mbwa ni, kwaba ar ntəmta mda aɗi wa, tsuwa watsəɓa ar mwaɓi aɗi wa. Lapiyakur aɗi aka mdər səvəi wala mdər ləɓəla wa kamnyar dawakur. Kamnyar I ku hara tə kəlara mda ndzi dawar nvwa ni.

¹¹Amma kulini I aɗi ata hara aka mjirna na mbila apatə I hara akwa saka na təramta wa. I na MTHLAKU na ka Duna ta Shang an pəla.

¹²Kamnyar kulini mda ata thləka ka hangkalari pwipwiyari. Nfur anap ata ya, di tsuwa ata ya su, tsuwa vəi na amtazi ata hara ka kəlangkə wutədzi akwa duniya. Tsuwa I ata hara ka mambila mjirna ndzi mthlakər shanga suayeri ngəni.

¹³Giri na mjir kutakəyir Yahuda ka Israila! Giri ku ndzi sur sara akwa nca durayeri damwa, amma I ata mbantə giri, antə giri ata ndzi ka barka ala ɗa. Giri aɗiya thlivər wa, amma ntsətə girdzi ka giri ndzi ɓəɓal.”

¹⁴Kamnyar MTHLAKU na ka Duna ta Shang akwa pəla, “Tsu apatə I ku ɗəmhə kəi ɗi giri sakatə kəkayeri ar giri haptə hangkali, tsuwa I aɗi zhar haratari wa,

¹⁵Kulini tsuwa I ku ɗəmha abbər I ata hara ɓɗakkur aka kutakəyir Urushalima ka Yahuda akwa sakayeri ngəni. Antə giri aɗiya thlivər wa.

¹⁶Nggədza suayeri tə giri ata harari. Ka waskəi ngkər jirkur aka nvwa ni. Hara gir shariya na ka jirkur akwa vəi shariyar giri kamnyar ka lapiyakur wutədzi.

¹⁷Giri aɗiya ɗəmhə ɗimikur akwa ɗəffa giri ata kəra nvwa giri wa. Tsuwa giri aɗiya kahyel ata kəra thlandər wa. Kamnyar I ku nggəlar shanga su nayeri ni, I na MTHLAKU an pəla.”

¹⁸Antə MTHLAKU na ka Duna ta Shang jaktə gari ali.

¹⁹MTHLAKU na ka Duna ta Shang akwa pəla, “Asham ar thliya na nfwarkur, ka thliya na ntəfkur, ka thliya murfəkur, ka thliya na kumkur, kulini da ata ndzi sakayeri ar kucali ka msərakur aka mjir nyarmbwar Yahuda. Da ata ndzi sakar səm susəmər kucali. Antə tar ka giri hir jirkur ka ndzəndzi msərakur.”

²⁰MTHLAKU na ka Duna ta Shang akwa pəla, “Durayeri na akwa duniya kəga mji na akwa bərniyayeri ata sə si akwa Urushalima.

²¹Mjir bərni ata sə mwari akwa bərni damwa ka pəla ala ɗa, ‘Mbura təra ra bara MTHLAKU na ka Duna ta Shang, ka mburu kiɗə kərari ka tsa dlar mburu. Mburu ka kər mburu an ata mwari.’ ”

²²Durayeri hang kəga mji na akwa tsəɗiyayeri na ol'ola ata sə bara kəma MTHLAKU na ka Duna ta Shang akwa Urushalima, ka da kiɗə dlara akəlari.

²³MTHLAKU na ka Duna ta Shang akwa pəla, “Akwa virayeri ndaga mji kuma akwa tsəɗiyayeri ar dur gapani ata sə tamtə mnya ləptər mdər Yahudi, ka pəla alari, ‘Mwa ata təra ka ga, kamnyar yeru ku nggata abbər Hyel adzə giri!’ ”