Read bura-pabir Zakariya 9 Bible Online

Zakariya 9 - bura-pabir bible

Zakariya 9

¹Ngəni an labar na wutədzi akəla MTHLAKU. Ɗəffa MTHLAKU ku ɓzi ata kəra tsəɗi Hadrak antə tsa ata pumtari ata kəra Damaska. Kamnyar shanga mjir Israila ka mjir duniya purəm ana putə nca ɗa ata MTHLAKU.

²Asar ata pwa ata kəra Hamath tsuwa, na ata kəla ka Damaska, asar ata pwa ata kəra Taya ka Sidon, wala tə da ɗəɗu ka duna.

³Taya ku həntə katangga arni nal, ka tsapta adzərfa apa bərbər, ka dinar apa maɓər lakur di.

⁴Amma MTHLAKU ata famta shanga surni, tsa ata shamta sharər yimi arni akwa manda, tsuwa u'u ata mbamta ni.

⁵Bərni Ashkelon ata wutari, ka thlivəra, Bərni Gaza tsuwa ata yakata ka kədza. Bərni Ekron tsuwa ata psəmta kərari, Mda ata tsi kuthlir Gaza, Ashkelon tsuwa ata ndzi fya.

⁶Durər mji gapani an ata sə ndzi akwa Ashdod, tsuwa I ata shamta gayar mjir Filistiya.

⁷I ata kəcimta ɗa kazhar ɓɗə kum ka mamshi, kəi fwaɓəla diɗi na akwa daɓwa thlira ɗa. Shanga mjir Filistiya na ku mbil ka mpika da ata ndzi mjir Hyelər mburu. Da ata ndzi apa nyarmbwa laga akwa Yahuda, antə mjir Ekron tsuwa ata ndzi apa mjir Yebusi.

⁸Tsuwa I ata kalaktə tsəɗiyirna kəi sək kərari ta sojayeri asə təramta akwa, ta mjir nar bwani aka mji asə təramta akwa kamnyar kulini I an ata wul kəra ɗa surna.

⁹Hara gir kucali ka duna, shanga giri na akwa Sihiyona! Haptə gir kuraka giri, shanga giri na akwa Urushalima! Nggədza kuthlir giri akwa si adzə giri! Mdər hara shanga su ka jirkur, mdə na ku səma akwa shanga su. Tsa an mdə na ka kanaɗi, tsa akwa si ata kwara, ata ɓzər kwara antə tsa akwa si ni.’ ”

¹⁰MTHLAKU akwa pəla, “I ata famta wagənər takur mpa kazhar Israila, ka shanga takur mpa kazhar Urushalima, kəi ɓəgələmta shanga kari ar mpa arɗa. Kuthlir giri ata səntə lapiyakur akwa tsəɗiyayeri. Kuthlikurər ni ata baɗita ata mnya manda ka vədza aka mnya manda damwa ka baɗita ata mnya Thlyagha Yufiretis ka vədza aka datər duniya.”

¹¹MTHLAKU akwa pəla, “Amma ar nga, kamnyar alkawal tə I kəta ala ga, natə mdə mbwahə mnyari ka mamshir saɗaka. I ata msərantə mjir nga akwa mafakur, mjir nga na mbwimbwiyari akwa ku na ola.

¹²Ngka giri akwa vəi ɗuwardzər giri na ka duna, giri na pərsəna na ka vuwur su akwa ɗəffu. Ashina I akwa psəmnya abbər I ata ngka ala giri ka sur giri har ka bwa suɗa.

¹³I ata ɗi Yahuda apa laliyirna, kəi namtə Israila ka tsa ndzi afərni. I ata tsələmta mjir nga apa katsakar, Sihiyona, ka da dlər mjir nga, Helleni, I ata tsələmta nga apa katsakarər soja.”

¹⁴Antə MTHLAKU ata sə si abwa kəra ɗa, ka shə afayeri arni apa wurka. MTHLAKU ata sə mbur təmbəl, ka mwa ka duna akwa shambar bwar anəm.

¹⁵MTHLAKU na ka Duna ta Shang ata ɓəlatə ɗa, antə da ata mula aka mjir mavinding ka kurəmta ɗa. Da ata haptə kurakər nggyari su apa mjir wikər yimər anap, nghyinghyari apa tasar mamshir saɗaka, ləɓləɓari apa kuɗəmar bagaɗiyir hamta saɗaka.

¹⁶Vir nda MTHLAKU na Hyelər ɗa ata mbantə ɗa, kamnyar da an mjirni, ciɓər ni tsuwa. Da ata sə mbəlmbəla akwa tsəɗi ni apa pelar dəɓa na ata dzakwar kuthlikur.

¹⁷Jiri, tsəɗi ni ata ndzi kalkal, ɓɗak ka duna, maɗadakwi ata sə ndzi hang apa mthli maɗangkwi tsuwa ata sə ndzi lapiya apa yimər anap.