Read bura-pabir Malaki 1 Bible Online

Malaki 1 - bura-pabir bible

Malaki 1

¹Ngəni an ndər natə MTHLAKU pəla aka Malaki ka tsa pəla aka mjir Israila.

²MTHLAKU akwa pəla aka mjirni, “I hir giri tədəku.” Amma giri pəla, “Akwa laku madi antə gə hir yeru nə ri?” MTHLAKU shinau ala ɗa abbər, “Isuwa ka Yakub aɗi mdə ka ɓzərma'ni wa ya? Amma ai wala apani I ku hir Yakub,

³amma I ku nggəlar Isuwa. I ku hara tə tsəɗiyirni na akwa gar ni ndzi kula mda, tə tsəɗi ni ndzi aka kilamtaku.”

⁴Mjir Edom na kəkar Isuwa ata mzhi pəla, “Mdə ku hilantə diyir yeru ɗimi ɗimi, amma yeru ata jaktə həntari.” Amma MTHLAKU akwa pəla, “I, da ata mzhi jaktə həntari, amma I ata jaktə huzamtari, har tar ma mdə kəga ɗa tsəɗi na ɗimi, ka mji tə ɗəffa MTHLAKU ku ɓza ata kəra ɗa ba saka madi.”

⁵Giri na mjir Israila ata wutə su ngəni akwa hara aka mjir Edom ka nca giri, ka pəla, “MTHLAKU an ola jiri, wala akwa tsəɗi na aɓəla Israila!”

⁶MTHLAKU na ka Duna ta Shang akwa pəla aka pristayeri, “Ɓzər ana nar səli aka baba'ni, tsuwa mafa ana nar səli aka mthlakərni. Kaha, ma I an baba' giri jiri, kamnyar mə tə giri aɗi ana ni olkur wa ri? Tsuwa ma I an mthlakər giri, kamnyar mə tə giri aɗi ana ni səli wa ri? Pristayeri, giri akwa rutə ra, amma giri akwa jaktə yu su abbər, ‘Laku madi antə yeru rutə nga akwa ri?’

⁷Giri ku rutə ra atar hamta susəma na adiya ata bagaɗiyir hamta saɗakarna. Amma ba kulini giri akwa pəla, ‘Akwa laku madi tə yeru namtə bagaɗiyir hamta saɗaka ni adiya ri?’ Atar laku tə giri namta abbər bagaɗi arna ni aɗi su laga wa.

⁸Ma sakatə giri səntə saɗakar mwaɓi na mdlyang kamnyar hamta saɗaka kəgari, giri aɗi ana wuta abbər giri ku hara su na ɗimi wa ya? Tsuwa ma sakatə giri akwa hamta mwaɓi na nggurdəkəi wala nggawa, giri aɗi wuta abbər giri ku hara su na ɗimi wa ya? Ngkərtə gir hamta su apani aka gwamnar giri bu, ka giri nggaɓəla wala tsa ata nggatə msərakur giri, har ka tsa hir dlar giri ya!” I an MTHLAKU na ka Duna ta Shang.

⁹Antə MTHLAKU na ka Duna ta Shang pəla, “Giri na pristayeri, ngkərtə giri kiɗə kəra Hyel ka tsa dlar giri bu. Ai, tsa aɗi ata psi thləmari ala giri wa. Kamnyar biku ni ar giri.

¹⁰Apa ka mdə wutə mdə pal akwa nca giri na ata hartə nyarmbwar vəngkər səli ni, ta giri aləmbwa ka mba u'u ata bagaɗi kamnyar hamta ali saɗaka na aɗi ata dlar wa! I aɗi akwa nggatə msərakur giri wa, tsuwa I aɗi ata jaktə dlu saɗaka akəla giri wa.

¹¹Kamnyar mjir tsəɗiyayeri damwa akwa haptə thləmi baɗitə ɗəɗəpa har ka pci təri. Da akwa mba tulari ɗuza ali ka hamta saɗaka na kalkalari.

¹²Amma giri akwa rutə ra kəlara sakatə giri pəla bagaɗi aka MTHLAKU aɗi suma wa, tsuwa jili susəma tə giri ana hamta saɗaka kəgari an sur ruta.

¹³Nggədza giri akwa thləl kucira giri ar rutə ali, ka pəla, ‘Yeru ku ghəri ka su ngəni!’ Saɗakar mwaɓi tə giri ana dlutsa akəla mji ka sənta, wala mwaɓi na nggurdəkəi wala na nggawa ni, giri tamatə I ata dluwari ya?

¹⁴Kəlara mdər hara zambakur ata ndzi hilhilari! Nggədza tsa ka gam na lapiya akwa ciɓərni, natə tsa ku kətə alkawalər hamta saɗaka kəgari, amma təng aghəla nda tsa ata hamta na ka manjivar aka MTHLAKU! Nggədza giri ku sənda abbər I an Kuthli na ola, natə shanga mjir duniya ana thlivər ra! I na MTHLAKU na ka Duna ta Shang an pəla.”