Read bura-pabir Malaki 3 Bible Online

Malaki 3 - bura-pabir bible

Malaki 3

¹Antə MTHLAKU na ka Duna ta Shang shinau ka pəla, “Nggədza I akwa thlentə mdərthlentərna ka tsa ɗəmha ali laku. Tsuwa kula səndər giri antə MTHLAKU tə giri ana bara bara ni ni ata sə si kakər akwa mbwar vəngkər səliyirni. Tsa mdə na ata si ka labar ar alkawal tə giri akwa kucalari ni, ndaga ni akwa si ma kasha.”

²Amma wan ata nggitə vir səyirni nə ri? Tsuwa wan ata nggitə thləthlatə ma tsa ku si ri? Kamnyar tsa ndzi apa u'u na ana ptsaɓəla liya, apa sabul ar soda.

³Tsa ata ndzəndzi ka tsa hara shariya apa mdər mbaɓəla ka ptsaɓəla diɗi na akwa adzərfa ka tsa ndzi ndəlang. Apani antə tsa ata carɓəla mjir Lawi ka tsa kətərɓəla ɗa apatə mda ana mbaɓəla dinar ka adzərfa, har tar ma da ku mzhi hamta saɗaka na kalkal aka MTHLAKU.

⁴Aghəla nda antə saɗakar mjir Yahuda ka Urushalima ata sə kəskəra MTHLAKU tsu apatə da ana hara akwa saka na təramta.

⁵MTHLAKU na ka Duna ta Shang akwa pəla, “I ata sə shahədzi kudzəhə ka giri kamnyar kəi hara ala giri shariya. Tsuwa kula shamta saka I ata hamta seɗar ncanta abbər mjir hakdzi, ka mjir ləka, ka mjir kahyel ar thlandəra, ka mjir ngkatə watsəɓər mjir kəthlər ala ɗa, ka mjir hara bwani aka kughungayeri kəga maɗangkyar na muta, ka mjir kədlə mətəpiyayeri, ku hara biku, watau shanga mji na aɗi ana thlivər ɗəffi wa.”

⁶“I an MTHLAKU, antə I aɗi ana palidzi wa. Antə giri na durər Yakub aɗi kur karkar wa.

⁷Təng akwa zamanər kəkayeri ar giri antə giri zhar nu tsawayeri arna, giri aɗi ɓəlatə ɗa wa. Ngka giri adzə ra, antə I ata ngka adzə giri”, ndə MTHLAKU na ka Duna ta Shang. “Amma giri pəla, ‘Akwa laku madi tə yeru ata ngka ri?’

⁸Mdə kum ka mamshi aɗi na amzhi dlutsə su akəla Hyel ya? Amma ai giri akwa dlutsə su akəli. Amma giri akwa pəla, ‘Akwa laku madi tə yeru akwa dlutsə su akəla gə ri?’ Akwa zaka ka sur hamtar hirər ɗəffu ar giri.

⁹Giri ku ndzi shushuwari, shanga giri na akwa tsəɗi ni, kamnyar giri akwa dlutsə su akəli!

¹⁰Səntə gir zaka ar giri cipcippu akwa mbwar pwi su, kamnyar ka susəma wutədzi akwa kəyirna. Ngkərtə giri ra bu akwa su ngəni, ma I aɗi kəlar ala giri windauwayeri ar vəi na amtazi, kəi pughəi ala giri barka hang har ka giri ni ka vəi pwiyari wa”, ndə MTHLAKU na ka Duna ta Shang.

¹¹“I ata mpa aka ntsəkwayeri ta da azamtə sur fakər giri, ka shanga nfwayeri ar anap na akwa fakər giri ya nggərəɓu”, ndə MTHLAKU na ka Duna ta Shang.

¹²“Antə shanga mji ata sə kəga giri mjir barka, kamnyar tsəɗiyir giri ata ndzi vəi ndzəndzi na msəra”, ndə MTHLAKU na ka Duna ta Shang.

¹³“Giri ku pəla su na ɗimi ata kəri”, ndə MTHLAKU. “Amma tsu giri akwa jaktə pəla, ‘Man tə yeru pəla ata kəra ga ri?’

¹⁴Giri an pəla, ‘Ampaniyir nu Hyel aɗi wa. Man riɓa tə mburu wutari akwa ɓəlatə tsawur ni, wala atar mwari akəma MTHLAKU na ka Duna ta Shang apa mburu akwa tuwa mshi nə ri?

¹⁵Kulini yeru akwa wuta abbər mjir kər olkur andər hara saa. Jiri, mji na ɗimi ana akwa ləkəma, har ma wala mji na ana ngga mnya Hyel ana təra kula su tsəkwar ɗa.’ ”

¹⁶Antə tsuwa mji na ana thlivər ɗəffa MTHLAKU ku gari aka nvwa ɗa, antə MTHLAKU ku psi thləmari ka nggatə ɗa. Akəmari tsuwa kakaɗər Ɗangta aɗi tə mdə rəbutə thləma mji na ana thlivər ɗəffa MTHLAKU ka thləma mji na hir dzama ata kərari akwa.

¹⁷“Da ata ndzi mjirna”, ndə MTHLAKU na ka Duna ta Shang. “Da ata sə ndzi mjirna na ka daraja akwa vir tə I ku ɗəmha, tsuwa I ata kətadzə ɗa apatə mda ana kətadzə ɓzərni na ana kələngkər alari.

¹⁸Antə giri ata sə jaktə nggaɓəla zumzumkur na akwa daɓwa mdə na pwa ka mdə na kəmanggar, ka akwa daɓwa mdə na ku hara mafakur aka Hyel ka mdə na aɗi hara wa.”