Read bura-pabir Malaki 4 Bible Online

Malaki 4 - bura-pabir bible

Malaki 4

¹MTHLAKU na ka Duna ta Shang akwa pəla, “Vir ata sə si, na ata mba apa u'ur kəthla. Antə shanga mjir kər olkur ka shanga mjir hara ɗimikur ata sə mbamtadzi apa kədla. Vir na ata si ni ata sə mbamta ɗa tuktukku, baɗita ata nggilanga ɗa har tsiya ɗa, su aɗi na ata mbil wa.

²Amma kamnyar giri na ana thlivər ɗəffi, pcir jirkur ata sə thlata, antə parakər ni ata sə mbantə giri. Giri ata sə mwa ka fəlfəla apa kənayeri na ata gyali.

³Akwa vir tə I ɗəmhə ni, giri ata sə ntsəntsarəmta kəmanggarayeri, antə da ata sə ndzi apa pənju akira səla giri.” I na MTHLAKU na ka Duna ta Shang an pəla.

⁴“Ka giri ɗangtə thlipər Musa na buɗarna, suayeri tə ka mdə hara, kəga tsawayeri natə I hamta alari ata kəra Gar Sinai kamnyar shanga mjir Israila.

⁵Nggədza I ata thlenta ala giri naɓi Eliya akəmata vir na ola ka mwavər ar MTHLAKU ni asi.

⁶Tsa ata shinar ɗəffa kəkayeri adzə maɗa' ɗa ka ɗəffa maɗa' ɗa adzə kəkayeri arɗa, ta I asə si ka shamta tsəɗi ni.”