Read bura-pabir Mathliyu 11 Bible Online

Mathliyu 11 - bura-pabir bible

Mathliyu 11

¹Sakatə Yesu ku kuri ngkər su ngəni aka mjirthlipərni na kumnya suɗə ni, antə tsa təra kazhar vəi nda, akwa mwa ka thlipə ka ngkər ndərər Hyel akwa bərniyayeri arɗa.

²Sakatə Yahwana akwa pərsəna nggata ata kəra suayeri tə Kristi akwa harari, antə tsa thlentə mjirthlipərni laga ka da mwari adzə ni,

³ka yu ni abbər, “Ga an mdə na akwa si ni ya, nənga ka yeru sək mdə damwa ri?”

⁴Antə Yesu shinau ala ɗa ka pəla, “Mwar giri, ka giri pəla aka Yahwana su tə giri wuta, ka su tə giri nggata.

⁵Mji na mdlyang akwa wutə su, mji na nggurdəkəi akwa mwa, mji na ka shilkər kəsəm dza ku kəcimtadzi, mji na twangtwang akwa nggatə su, mji na mtəmtari akwa thlatə ka mpika, tsuwa mda akwa ngkər labar na msəra aka mjir bwani.

⁶Hyel ata vədzə barka aka kəlara mdə na aɗi wutə sur tsamta səl akwa hamta jirərni ali wa.”

⁷Sakatə mjirthlipər Yahwana ni ku təra, antə Yesu baɗitə gari aka dlamar mji ata kəra Yahwana abbər, “Man tə giri ləɓəla ra wulari akwa mtaku nə ri? Thlali kusar duwathlu tə shambar akwa kənggərari ya?

⁸Ka man tə giri ləɓəla ra wulari ri? Kamnyar ka giri wutə mdə laga na hatə ləptu ɓɗaku ya? Ai mjir kutakəyir kuthli an ka ləptər ɗa ɓɗakɓɗaku ni.

⁹Ka man tə giri ləɓəla ra wulari ri? Ka giri wutə naɓi ya? I, I akwa pəla ala giri, har ma giri ku wutə mdə na ku təramta naɓi.

¹⁰Ngəni an Yahwana natə mdə rəbuta ata kərari akwa kakaɗu abbər, “ ‘Nggədza, I akwa thlentə mdərthlentərna akəma ga, na ata namta ala gə laku akəmata ga asi.’ ”

¹¹“I akwa pəla ala giri jirkur, akwa nca shanga mji natə mwanki an yaɓəla ɗa akwa duniya ni, mda aɗi na olta Yahwana na Mdər hara Baptizma wa. Amma wala apani, mdə na raka ta shang akwa kuthlikur na amtazi ku təramta Yahwana.

¹²Baɗita akwa sakar Yahwana na Mdər hara Baptizma ka sənta aka saka ngəni, kuthlikur na amtazi ku ɗar bwani, tsuwa mji na hir mpa an akwa ləkwari ka dwali.

¹³Kamnyar shanga naɓiyayeri ka tsawur Musa ku ngkər labar ata kəra kuthlikur ni akwabə Yahwana asi.

¹⁴Tsuwa ma giri an ata hir dlu ndərər ɗa, Yahwana an mdə natə mdə pəla abbər Iliya ata ngka ni.

¹⁵Mdə na ka thləmər nggatə su, ka tsa nggata!

¹⁶“Amma ka mi antə I ata mzhi gira zaman ngəni ri? Tsa ndzi apa maɗankyar akwa kasəku na akwa kəga nvwa ɗa kamnyar gyali, abbər,

¹⁷“ ‘Yeru ku mbura ala giri shwala, amma giri aɗi ɓathlə wa! Yeru ku jikatuwa, amma giri aɗi hir tuwa wa!’ ”

¹⁸“Kamnyar sakatə Yahwana si, tsa aɗi akwa səm susəm wala sa yimər anap wa. Antə da pəla, ‘Tsa ka shatan akwa dzari!’

¹⁹Sakatə Ɓzər Mdə ku si tsuwa akwa səm ka sa, da pəla, ‘Wul giri mdər səm hang, ka sa hang ka wika ni, pazhir mjir dlu tsəma ka mjir biku!’ Wala apani mda ana wutə ɗəɗukurər Hyel atar kəthlər arni.”

²⁰Antə Yesu baɗitə mpa aka kauyayeri natə tsa hara bwar ola kəthlərayeri ar ndatə mda akwa, kamnyar da aɗi tubi wa.

²¹“Sha ku wutə nga, Korazin! Sha ku wutə nga, Bethsaida! Kamnyar surndatayeri tə mdə hara akwa giri ni, ma mda an hara akwa Taya ka Sidon apani, sakani mji na anda ku tubi tsu ɗəm ka hatə dasa ka ndzəndzi akwa pənju!

²²I akwa pəla ala giri ma vir shariya, Hyel ata kətadzə mjir Taya ka Sidon ta giri.

²³Antə gə na Kafarnahum, ga ana wuta apa mda ata sə haptə səliyir nga amtazi ya? Awa, ata vəya ndaga, mda ata psu nga akwa vəi ndzəndziyir mji mtəmta. Kamnyar kəthlərayeri na ol'ola ar ndatə mda tə mdə hara akwa gə ni, ma abbər mda an hara akwa Sodom, sakani tsa tsu aɗi ba ashina!

²⁴I akwa pəla ala giri, ma vir shariya, Hyel ata kətadzə Sodom ta ga!”

²⁵Akwa saka ndaga antə Yesu pəla, “I akwa usar nga Tədda, gə na Mthlakər vəi na amtazi ka duniya, kamnyar ga ku ɗuwamta suayeri ngəni aka mji na ɗəɗu ka mji na ka səndər su, ka ncaɓəla ɗa aka maɗankyar.

²⁶Apani Tədda, kamnyar ngəni an laku tə gə bara ka tsa hara akwa.

²⁷“Təddarna ku hamta ali shanga su, tsuwa mda aɗi na səndə Ɓzər ni wa, tar Tədda ni, tsuwa mda aɗi na səndə Tədda ni wa, tar Ɓzər ni, ka mji natə Ɓzər ni ku carɓəla ka tsa ngkərɓəla ni ala ɗa.

²⁸“Ka giri si adzə ra, shanga giri na ku ghəri, giri na akwa ɗar bwani kamnyar kəl na kəgəɓu, antə I ata na ala giri ghərəmtaghəra.

²⁹Ka giri hamta kəra giri aka tsawayeri arna apatə thlar kukula ana hangkir wulyari aka udzəm garma, ka giri thlipa akəli, kamnyar I mdə na kasəla ka kanaɗikur. Antə giri ata wutə ghərəmtaghəra aka mpika giri.

³⁰Kamnyar kəl tə I ata na ala giri ni aɗi mwavər wa, tsuwa tsa aɗi kəgəɓu wa.”