Read bura-pabir Mathliyu 17 Bible Online

Mathliyu 17 - bura-pabir bible

Mathliyu 17

¹Aghəla vir ngkwa antə Yesu kətə Bitrəs, ka Yakub, ka Yahwana, ka mwantə ɗa ata kəra gar na nal, tə da ndzəndzi anda shiɗa.

²Təng dludzər ni palidzi akəma ɗa, ka kəmari akwa mbəlmbəla apa pci, tə ləptərni tsuwa ndzi shalak mwapu apa parakəu.

³Təng da wutə Musa ka Iliya akwa gari ka tsa.

⁴Antə Bitrəs pəla aka Yesu, “Mthlaku, ku hara ɓɗaku tə mburu azi ni. Ma ga an ata hirari I ata namtə tentayeri makər, pal kamnyar nga, pal kamnyar Musa, ka palari tsuwa kamnyar Iliya.”

⁵Tsa tsu akwa gari ni, təng dlamba laga na akwa mbəlmbəla hartə ɗa akwa ləmbəku. Təkəma təng kuraku laga səɓəla akwa dlamba ni akwa pəla, “Ngəni an Ɓzərna natə I hirhira, natə I akwa nggatə msərakurər ni ka duna. Psi gir thləm alari!”

⁶Sakatə mjirthlipərni nggatə kurakə ni, antə da thlivər ka duna, har tə da ndla ata di ka murkəma ɗa.

⁷Antə Yesu si ka tsəkwar ɗa ka pəla ala ɗa, “Thlatə giri, giri aɗiya thlivər wa.”

⁸Sakatə da haptə nca ɗa, da aɗi wutə mdə damwa wa, təng Yesu shini.

⁹Sakatə da akwa səghəi ata gar ni, antə Yesu tsaktə ɗa abbər, “Giri aɗiya ngkər su tə giri wutə ni aka wama wa, tar aghəla sakatə Ɓzər Mdə ku thlata akwa mtəmta.”

¹⁰Antə mjirthlipərni ku yu ni abbər, “Kamnyar mi tə maləmayeri ar thlipə tsawur Musa ana pəla, tar ma Iliya ku si katagu nə ri?”

¹¹Antə tsa shinau ala ɗa, “Jiri Iliya ata si, kamnyar ka tsa namɓəla shanga su.

¹²Amma I akwa pəla ala giri abbər, Iliya ku kurtə si, amma mji aɗi səndə ni wa. Antə da ku hara alari shanga su tə da hira. Tsuwa tsu apani antə Ɓzər Mda ata sə ɗar bwani ata tsiya ɗa.”

¹³Sakanda antə mjirthlipərni nggaɓəla abbər tsa akwa gari ala ɗa ata kəra Yahwana na Mdər hara Baptizma.

¹⁴Sakatə Yesu ka mjirthlipərni ngka adzə dlamar mji, antə mdə laga si adzə Yesu ka zuzuri akəmari ka pəla,

¹⁵“Mthlaku, kətadzə ɓzər na, kamnyar tsa ka cicu kila, antə tsa ana ɗar bwani ka duna. Kamnyar tsa ku ndla ka hang akwa u'u, ka ndla ka hang akwa yimi.

¹⁶I ku ɗar səntə ni aka mjirthlipər nga, amma da aɗi amzhi mbantə ni wa.”

¹⁷Antə Yesu pəla, “Giri na mjir zaman ngəni, giri hilhilari, kula hamta jiri. Kəi fəi adzə giri apa madə ri kambəla giri mbərsa ka ndərərna ni? Har ka vədza aka saka madi antə I ata ləkəma ka mbwi ɗəffi ka giri ri? Səntə gir ni ali azi!”

¹⁸Antə Yesu ku mpa aka shatan ni, antə shatan ni ku səɓəla akwa dza ɓzər ni. Tsu ata sakanda antə ɓzər ni ku mbantədzi.

¹⁹Antə mjirthlipərni si adzə ni akwa ɗuwari ka pəla alari, “Kamnyar mi tə ar yeru, yeru aɗi mzhi kədləɓəla shatan ni wa ri?”

²⁰Antə tsa pəla ala ɗa, “Kamnyar hamta jirər giri aɗi ol wa. Kamnyar I akwa pəla ala giri jirkur, ma giri an ka hamta jiri, wala raka apa munya mastad, giri ata mzhi pəla aka gar ngəni abbər, ‘Thlata azi ka gə mwari anda,’ antə tsa ata mwari anda. Su aɗi na ata mula ala giri wa!”

²²Sakatə mjirthlipərni ku tsaptədzi akwa Galili, antə Yesu pəla ala ɗa, “Mda ata hamta Ɓzər Mda aka mji,

²³ka da tsi ni, ka mdə thlentə ni akwa vir na makərkur.” Antə mjirthlipərni ku damitədzi ka duna.

²⁴Sakatə Yesu ka mjirthlipərni ku si ahar Kafarnahum, antə mji na ana tsaptə tsəma ar mbwar vəngkər səli mwari adzə Bitrəs ka yu ni abbər, “Maləmər giri aɗi ana ntə tsəmər mbwar vəngkər səli wa ya?”

²⁵Antə Bitrəs pəla alari, “I, tsa ana nta.” Sakatə Bitrəs ku səvi, antə Yesu baɗitə yu ni abbər, “Siman, man dzamər ngə ri? Akəla wa antə kuthlyayeri ar duniya ana dlu kwabar kəra laku wala tsəma ri? Akəla maɗa' ɗa, nənga akəla mji damwa ri?”

²⁶Sakatə Bitrəs pəla, “Akəla mji damwa,” antə Yesu pəla alari, “Watau ar maɗa' ɗa da aɗi ana ntə wa.

²⁷Wala an apani, ar mburu, mburu aɗi ata bara ka ɗəffa ɗa ɓza adzə mburu wa. Antə mwari adzə manda, ka gə ndzəha anggilku. Kəlfa na ntangkəma tə ga ku ndəkərɓəla, ka gə kəlar mnyari, antə ga ata wutə kwaba na ata mzhi ntəmta tsəm ni. Ka gə kətə kwaba ni, ka gə ntəmta tsəmərna ka na ar nga.”