Read bura-pabir Mathliyu 24 Bible Online

Mathliyu 24 - bura-pabir bible

Mathliyu 24

¹Sakatə Yesu ku səɓəla akwa mbwar vəngkər səli akwa təra, antə mjirthlipərni si adzə ni ka ncanta alari mbwayeri tə mdə hənta akwa kuta bəbalər vəngkər səli ni.

²Antə Yesu pəla ala ɗa abbər, “Giri akwa wul shanga hənayeri ngəni ja wa! I akwa pəla ala giri jirkur, pela aɗi wala duku na ata sə mbila ata kəra nvwani kula mdə huzamta wa.”

³Sakatə Yesu andzəndzi ata Gar Zaitun, antə mjirthlipərni si adzə ni da shiɗa ka pəla alari, “Pəla ala yeru, nawa antə suayeri ngəni ata sə hara ri, tsuwa man seɗar səyir nga ka seɗar kurər duniya ri?”

⁴Antə Yesu shinau ala ɗa ka pəla, “Ka giri hara hangkal ta mda asə shamta giri.

⁵Kamnyar mji hang ata sə si akwa thləmi ka pəla, ‘I an Kristi ni,’ har ka da shamta mji hang.

⁶Giri ata sə nggatə mji akwa mpayeri, ka mji thlivərantə giri abbər da ata sə mpa giri, amma hangkala giri aɗiya thlatə wa. Kamnyar dwali ka suayeri ngəni hara, amma sakar kurari aɗi hara katagu wa.

⁷Tsəɗi ata sə mpa ka tsəɗi nvwani, ka kuthlikur mpa ka kuthlikur nvwani, antə mi ata sə təri, tsuwa di ata sə kənggərantədzi akwa vəyayeri zumzum.

⁸Amma shanga suayeri ngəni an baɗitər bwani daci.

⁹“Da ata sə hamta giri, ka mdə hara bwani ala giri, har ka mdə tsəgəi giri. Antə shanga mji ata sə nggəlar giri kamnyar na.

¹⁰Sakanda mji hang ata sə hara mtathlaku akwa hamta jirər ɗa, ka da ɓəli nvwa ɗa, ka nggəlar nvwa ɗa.

¹¹Tsuwa naɓiyayeri ar thlandəra hang ata sə thlata ka da shamta mji hang.

¹²Tsuwa kamnyar tə kəmanggarkur ata sə jakjaka, hirkur ar mji ata sə hara mtathlaku.

¹³Amma mdə na ku nggita ka vədza ka kurari, tsa ata mbantədzi.

¹⁴Tsuwa mda ata sə ngkər labar na msəra ata kəra kuthlikur akwa shanga duniya, kamnyar seɗa aka shanga mji, sakanda antə kurər duniya ata sə hara.”

¹⁵“Ma sakatə giri ku wutə sur cika na ɗimi athləthlata akwa Vəi na Ɓɗakkarkara apatə naɓi Daniyel ku ngkər waci ni. Ka mdər karatə ni vədzə hangkalari.

¹⁶Tsuwa sakanda ka mji na akwa Yahudiya hwi mwari akwa garayeri.

¹⁷Mdə na ata kəra mbwarni aɗiya səghəi kamnyar fwaɓəla suayeri na akwa mbwarni wa.

¹⁸Mdə na akwa fakəu aɗiya ngka avi kamnyar kətə sur pudzərni ni wa.

¹⁹Tsuwa sha ku wutə mwanki na ka dza ɗa suɗa, ka mwanki na ka maɗa' ata hili akwa saka ndaga!

²⁰Ka giri kiɗə Hyel diya, ta su ngəni asə hara aviyar wala akwa Vir Ghərəmtaghəra!

²¹Kamnyar bwani na mwavər ata sə hara akwa saka ndaga, jili bwani na aɗi ɗar hara təng tə Hyel namtə duniya har ka vədza aka vir na ashina wa. Tsuwa mda aɗi ata jaktə harari kəra wa.

²²Ma abbər Hyel an aɗi namtə virayeri ni ka da ndzi kwadang wa, mda aɗi na ata wutə mbantədzi wala duku wa. Amma kamnyar mji na carcara, antə Hyel ata kəmta virayeri ndaga ka da ndzi kwadang.

²³“Sakanda wala mdə laga an pəla ala giri, ‘Wula, nggədza Kristi azi!’ wala, ‘Ndaga ni anda!’ Giri aɗiya kələngkər wa.

²⁴Kamnyar mji laga ata sə thlata ka thlandər abbər da an Kristi, wala thlandər abbər da naɓi, ka da hara seɗayeri na ol'ola kəga surndatayeri, kamnyar ka da shamta mji, har purəm kəga mji na carcara, ma ahara.

²⁵Nggədza, I ku kurtə pəla ala giri təng akəmata sakari ahara.

²⁶“Antə wala ma mdə pəla ala giri, ‘Wula, ndaga ni akwa mtaku,’ giri aɗiya ghər mwari wa. Wala ma mdə pəla, ‘Wula, nggədza ni akwa kutambwa aghəla nda,’ giri aɗiya kələngkər wa.

²⁷Kamnyar tsu apatə parakər wurka ana thlata ana thlata abwar raghəi har ka mbəlantə bwar ramta, apani antə Ɓzər Mda ata sə ngka.

²⁸Kamnyar vəi tə mshiyir su ata, antə kutəkcivi ana tsaptədzi.”

²⁹“Amma təkəma aghəla sakar bwani na mwavər nda, “ ‘Antə pci ata hara kuthlu, tsuwa thliya aɗi ata mbəl wa. Sasəlkayeri tsuwa ata təgəri akwar amtazi, tsuwa Hyel ata kənggərantə shanga su na amtazi.’ ”

³⁰“Aghəla nda antə mda ata wutə seɗar Ɓzər Mda amtazi. Antə shanga mjir duniya ata sə tuwa. Tsuwa da ata sə wutə Ɓzər Mda akwa si ata dlambayeri amtazi, ka kuthlikur ka səli na ola.

³¹Tsuwa tsa ata sə thlentə mjirthlentərni ka da mbur təmbəl ka kuraku na ola kamnyar kəga mji, antə da ata tsaptə mjirni na carcara na akwa shanga duniya, baɗita abwani har ka mwanta aka datari na abwanda.”

³²“Thlipə giri su ata kəra nfur kamnda. Kəlara sakatə tsiyari ku hara ngyingyaɓu ka baɗitə ɗəɗa thlali, giri ku sənda abbər vəya ku hara kudzəha.

³³Tsu apani tsuwa, ma sakatə giri ku wutə shanga suayeri ngəni, ka giri sənda abbər saka ni ku hara kudzəha, har anyarmbwa.

³⁴I akwa pəla ala giri jirkur, mjir zaman ngəni aɗi ata mtəgəmtadzi wa, tar ma shanga suayeri ngəni ku hara.

³⁵Vəi na amtazi ka duniya ata sə kura, amma ndərayeri arna aɗi ata kur cap wa.”

³⁶“Amma mda aɗi na səndə viri wala sakatə suayeri ngəni ata sə hara nə wa, wala mjirthlentərhyel na amtazi, wala Ɓzər aɗi səndə wa, tar Tədda shini an sənda.

³⁷Tsu apa su na hara akwa zamanər Nuhu, antə ata sə hara akwa sakar səyir Ɓzər Mda.

³⁸Kamnyar akəmata avava ni ahara, mji akwa səm ka sa, mji shili akwa kəl mwala, ka hamta mwala aka sal, har ka vədza aka vir tə Nuhu ləkwa shar ni.

³⁹Da aɗi nggaɓəla su na akwa hara wa, har tar tə avava si ka tsartə ɗa shang. Tsu apani antə ata sə hara akwa sakar səyir Ɓzər Mda.

⁴⁰Saka nda, ma mji suɗa an akwa hara kəthlər akwa fakəu duku, mda ata kətə mdə pal, ka zhar na palari.

⁴¹Ma mwanki suɗa an akwa hadla ata bur, mda ata kətə mdə pal, ka mdə zhar mdə pal.”

⁴²“Apani kuji ka giri ndzi ɗəmhəɗəmhari, kamnyar giri aɗi səndə vir tə Mthlakər giri ata sə si wa.

⁴³Amma ka giri sənda abbər, ma mthlakər kəi an səndə sakatə həla ata sə si aviri aharngkiɗa, tsa aɗi ata heni wa, kamnyar tsa aɗi ata zhar ka həl ni ɓələmta kəyirni ka ləvəi wa.

⁴⁴Antə apani, tar ka giri ndzi ɗəmhəɗəmhari tsuwa, kamnyar Ɓzər Mda ata sə si akwa sakatə giri aɗi tamatə wa.”

⁴⁵“Wan mafa na ka jirkur ka ɗəɗukur ri? Tsa an mdə natə mdərkəyirni ata vəngkər ni ata kəra kutakəyirni, ka tsuwa ka tsa hamta susəma aka mambila mafayeri arni akwa sakari.

⁴⁶Msəra aka mafa ndaga, natə ma sakatə mthlakərni ku si, tsa ata wutə ni ata kəra kəthlər.

⁴⁷I akwa pəla ala giri jirkur, mdə ni ata vəngkər mafa ndaga ata kəra shanga su tə tsa kəgari.

⁴⁸Amma tsa an mafa na ɗimi, na ata pəla akwa ɗəffari abbər ‘Mdərkəyirna aɗi akwa si mbwaɗi wa,’

⁴⁹tə tsa baɗitə dlaɓu mafayeri nvwani, ka səm ka sa kəga mjir wika,

⁵⁰to, mdərkəyir mafa ngəni ata sə si akwa vir tə tsa aɗi tamatə wa, ka akwa sakatə tsa aɗi səndə wa.

⁵¹Antə mdərkəyirni ni ata sə dlaɓu ni ɗimi ɗimi, ka paktə ni kəga mji na shimnya shimnya. Anda antə da ata sə tuwa ka ɓɗə thlir.”