Read bura-pabir Mathliyu 27 Bible Online

Mathliyu 27 - bura-pabir bible

Mathliyu 27

¹Sakatə vir kura, antə shanga pristayeri na ol'ola, kəga mji na ol'ola ata kəra mji, ku hara sauri ata kəra Yesu abbər ka da tsi ni.

²Antə da mbwahə ni, ka təra ka tsa, ka ra hamta ni aka gwamna Bilatus.

³Sakatə Yahuda, mdə na ɓəli Yesu ni, wuta abbər mdə ku thlamta shariyar mta aka Yesu, antə tsa nggatə mwavərkurari, ka ngka adzə pristayeri na ol'ola ka mji na ol'ola, ka jaktə hamta ala ɗa kwabar adzərfa na makkumari ni.

⁴Antə tsa pəla ala ɗa, “I ku hara biku tə I ɓəli mdə na ɓɗakkarkara ka mdə tsi ni ni!” Amma da pəla, “Antə mə ri? Su aɗi na damitə yeru wa, ndagə bwar nga!”

⁵Antə Yahuda pumta kwaba ni akwa mbwar vəngkər səli, ka ləɓəla, ka mwari ka mbwamta kərni.

⁶Antə pristayeri na ol'ol ni fatə kwaba ni ka pəla, “Aɗi kalkal ka mdə pwi kwaba ngəni akwa vəi pwi kwaba na akwa mbwar vəngkər səli wa, təng tə tsa ku ndzi kwabar mamshi ni.”

⁷Antə da hara sauri ata kər, ka mastə bəbalər mdər hən tughum laga ka kwaba ni, ka vəi ni kamnyar harəmta mətəpiyayeri akwa.

⁸Antə mda ana kəga vəi ngəni abbər, “Bəbal ar Mamshi” har ba ashina.

⁹Apani antə mdə ku nghyaɓəla su tə naɓi Irmiya pəla abbər, “Da kətə kwabar adzərfa makkumari ni, kwaba tə mjir Israila kələngkər ka mdə ntəmta ata kərari,

¹⁰ka mastə bəbalər mdər hən tughum kəgari, apatə Mthlaku ku tsawa ali.”

¹¹Sakatə Yesu ku thləthlata akəma gwamna, antə gwamna ni yu ni ka pəla, “Ga an kuthlir mjir Yahudi ni ya?” Antə Yesu pəla alari, “Ga ku pəla apani.”

¹²Amma sakatə pristayeri na ol'ola ka mji damwa na ol'ola, yu ni ata kəra suayeri tə da burkatə ni ata kər ni, tsa aɗi hamta amsa wa.

¹³Antə Bilatus pəla alari, “Ga aɗi nggatə suayeri tə da akwa pəla ata kəra gə nəng?”

¹⁴Amma Yesu aɗi hamta alari amsa wala duku ata kər wa, antə su ni ku ndatə gwamna ka duna.

¹⁵Tsuwa ku ndzi sur hara gwamna akwa kəlara sakar Kucalər Fəlɓəla Kəi, ka tsa psi ala ɗa mdə pal akwa pərsəna, mdə tə da an carɓəla.

¹⁶Akwa saka ndaga, da ka mdə laga mulmulari akwa pərsəna ni ka thləmari Barabbas.

¹⁷Apani sakatə mji ku tsaptədzi, antə Bilatus pəla, “Wa antə giri akwa bara ka mdə psi ala giri ri, Barabbas, nənga Yesu tə mda ana kəga ni Kristi nə ri?”

¹⁸Kamnyar tsa ku sənda ata bəbal abbər səlka an vu tə mjir Yahudi hamta Yesu ni.

¹⁹Tsuwa sakatə Bilatus tsu andzəndzi ata kujarar shariya, antə mwalankiɗa thlenta alari ndər abbər, “Kəɓəla tsiya ga akwa wujirər mdə ngəni kula biku ni! Kamnyar kurər vir na ashina, I ku ɗar bwani ka duna ata kərari akwa suni.”

²⁰Amma pristayeri na ol'ola kəga mji damwa na ol'ola, ku kurtə ndəkərta hangkala mji abbər ka mdə psi ala ɗa Barabbas, ka mdə tsi Yesu.

²¹Antə gwamna ni jaktə yuwa abbər, “Wa antə giri ata bara ka mdə psi ala giri akwa nca ɗa suɗə nə ri?” Antə da pəla, “Barabbas!”

²²Antə Bilatus pəla ala ɗa, “To, man tə giri ata bara kəi hara aka Yesu tə mda ana kəga ni Kristi nə ri?” Antə shanga ɗa pəla, “Kukwamta ni!”

²³Antə Bilatus pəla, “Kamnyar mə ri? Man ɗimikur tə tsa hara ri?” Amma mji ni haptə kuraku ka duna ka pəla, “Ka mdə kukwamta ni!”

²⁴Sakatə Bilatus wuta abbər su aɗi tə tsa amzhi harari kəra wa, tsuwa mji ni akwa bara ti bwari, antə tsa kətsə yimi ka kəcimta tsiyari kəgari akəma dlamar mji, akwa pəla, “Arna mnyi aɗi akwa tsi mdə ngəni wa! Hara giri ka kər giri!”

²⁵Antə shanga mji ni shinau ka pəla, “Ka mamshirni ndzi ata kəra yeru kəga maɗa' yeru!”

²⁶Antə Bilatus psi ala ɗa Barabbas. Aghəla tə tsa vu ka mdə ɓu Yesu ka kwandeng, antə tsa hamta ni ka da ra kukwamta ni.

²⁷Antə sojayeri ar gwamna ni kətə Yesu ka mwantə ni akwa bəbalər ɓukcir gwamna ni, ka tsaptə shanga sojayeri ni akəmari.

²⁸Antə da fəi ləptərni ka hadza alari ləptu na ola mamza.

²⁹Antə da namtə dzakwar kuthlikur ka mtəhəra, ka tsangkər alari, ka vu zwal akwa tsi mazəmari. Antə da zuzuri akəmari ka hara kyartəkur alari, akwa pəla, “Ka far ngə fəi, kuthlir mjir Yahudi!”

³⁰Antə da tifəngkər alari mtili, ka kətə zwal ni ka tsa ni akwa kərari kəgari.

³¹Sakatə da ku kuri hara kyartəkur alari, antə da fəi ləptu lipəla nda, ka jaktə hadza alari ləptərni, ka təra ka tsa, kamnyar ka da ra kukwamta ni.

³²Sakatə da ləɓəla, antə da kəɓa ka mdər Sayirin laga na ka thləmari Siman. Antə da vu ni dwali ka tsa kəl udzəm kadləkadla ar Yesu ni.

³³Sakatə da mzhitə vəi laga tə mda ana kəga abbər Golgothla, natə karapwari an “Vəi Kugwar Kər”,

³⁴antə da hamta alari yimər anap gwargwarari ka su laga ɗəɗahu. Amma sakatə tsa ku ɗari, antə tsa nggəlar sari.

³⁵Sakatə da ku kukwamta ni, antə da ndəkəi ləptayeri arni atar ndzəh kuriya.

³⁶Aghəla nda antə da ndzəndzi anda akwa sək kərari.

³⁷Antə da rəbutə biku tə mdə burkatə ni ata kər ni, abbər “NGƏNI AN YESU, KUTHLIR MJIR YAHUDI”, ka vəi abwa kərari.

³⁸Tsuwa mjir thla laku aɗi suɗa tə mdə kukwamta ɗa adzə ni, pal abwa mazəmari ka pal abwa matsəkarari.

³⁹Antə mji na akwa təramta adzə ɗa akwa kədaɓ kəra ɗa, ka mnya ɗimi alari,

⁴⁰akwa pəla, “Gə na ata mzhi huzamta mbwar vəngkər səli ka jaktə hənta akwa kuta vir makər, mbantə kər ngə ja! Ma ga an Ɓzər Hyel, səghəi ata udzəm kadləkadla ni!”

⁴¹Tsu apani tsuwa antə pristayeri na ol'ola, ka maləmayeri ar thlipə tsawur Musa, kəga mji damwa na ol'ola, ku hara kyartəkur alari, akwa pəla,

⁴²“Tsa ku mbantə mji laga, amma tsa amzhi mbantə kərni wa! Nənga aɗi tsa an kuthlir mjir Israila ni wa ri? Ma tsa, to ka tsa səghəi ata udzəm kadləkadlə ni kulini, antə mburu ata hamta jiri alari.

⁴³Tsa ku mbərsa ka Hyel. Ndzi ka Hyel ni mbantə ni ja kulini, ma tsa ata hir ni jiri. Kamnyar tsa pəla, ‘I Ɓzər Hyel.’ ”

⁴⁴Antə mjir thla laku tə mdə kukwamta ɗa ata vəi duku ka tsa ni tsuwa, mnya ɗimi alari.

⁴⁵Sakatə pci təpkər, antə kuthlu si ka hartə shanga tsəɗi ni, har ka mwanta aka saka makər.

⁴⁶Apa saka makər antə Yesu haptə kuraku ka pəla, “Eloi, Eloi, lama sabakthlani?” Karapwari an, “Hyel arna, Hyel arna, kamnyar mi tə gə təra kazhar ra ri?”

⁴⁷Sakatə mji laga na athləthlata anda nggatə kuraku, antə da pəla, “Tsa akwa kəga Iliya.”

⁴⁸Təng təkəma pal akwa nca ɗa hwi ka ra kətə soso, ka hau akwa yimər anap na mumwasu, ka hata ata zwal, ka ha alari ka tsa sa.

⁴⁹Amma mji laga pəla, “Ndzi ka mburu wutə nuhum Iliya ata si ka tsa mbantə ni.”

⁵⁰Antə Yesu jaktə haptə kuraku ka duna, antə ɗəffari ləɓəla.

⁵¹Ata saka nda təng lapəli ar mbwar vəngkər səli ni ntaudzi ka bwa suɗa, baɗita amta har ka ləghəi, antə di ku kənggərantədzi, tə pelayeri ar gagəma ku ntəntamtadzi.

⁵²Kulayeri tsuwa ku mbugərəmtadzi, antə mji hang na ɓɗakkarkara na mta, ku thlatə ka mpika,

⁵³ka səɓəla akwa kulayeri. Aghəla tə Yesu ku thlata akwa mtəmta antə da ləkwa bərni na ɓɗakkarkara, ka ncantə kər ɗa aka mji hang.

⁵⁴Sakatə olər sojayeri, ka mambila mjir sək kəra Yesu ni, wutə di kənggərantədzi, ka suayeri damwa na hara, antə da thlivər ka duna, ka pəla, “Jiri, ngəni an Ɓzər Hyel!”

⁵⁵Tsuwa mwanki laga aɗi anda hang na thləthlatə catta akwa wul su na akwa hara. Da baɗitə nu Yesu təng ahar Galili, akwa wulwul ni.

⁵⁶Akwa nca ɗa an Maryamu Magdalin, ka Maryamu mama' Yakub ka Yusuf, ka mama' maɗa' Zabadi.

⁵⁷Sakatə tahaku ku hara, antə mdər gəna laga ka thləmari Yusuf thlata ahar Arimathliya ka si, tsa ma tsa mdər nu Yesu.

⁵⁸Antə tsa ku mwari adzə Bilatus ka kiɗə mshiyir Yesu. Antə Bilatus ku tsawa abbər ka mdə hamta alari.

⁵⁹Antə Yusuf kətə mshiyir Yesu, ka pərtə ni akwa zhaɓər lilin na kəcəkəcari ɓɗaku,

⁶⁰ka ra peri ni akwa kulər kərari laga bilən, tə tsa ntula ata pirakthlya. Antə tsa takəltə pela laga ola ka hartə mnya kul ni kəgari, ka təra.

⁶¹Tsuwa Maryamu Magdalin ka Maryamu na dukwari andzəndzi anda, awul kul ni.

⁶²Səɓəla ɗəpari, watau aghəla Vir Ɗəmhədzi, antə pristayeri na ol'ola kəga mjir Farisi tsaptədzi akəma Bilatus,

⁶³ka pəla, “Zanuwa, yeru ku ɗangtə su tə mdər thlandər ngəni pəla, sakatə tsa tsu ka mpika, abbər, ‘Aghəla vir makər, I ata thlata.’

⁶⁴Antə vu ka mdə sək kəra kul ni ɓɗaku, har ka vədza aka vir na makərkur ni, ta mjirthlipərni asə mwari ka həltə mshiyirni, ka sə pəla aka mji abbər tsa ku thlata akwa mtəmta. Thlandər na akwa tsikərari ata sə ndzi ɗimi ta na ntangkəma ni.”

⁶⁵Antə Bilatus pəla ala ɗa, “Giri ka sojayeri na ata mzhi səka. Antə mwar giri, ka giri wuta abbər giri ku ɓəlatə kul ni apatə giri amzha.”

⁶⁶Antə da ku mwari, ka tsatə seɗar vu tsi ar kuthlikur ata pela ni, ka pwi sojayeri na ata sək kəra kul ni.