Read bura-pabir Mathliyu 3 Bible Online

Mathliyu 3 - bura-pabir bible

Mathliyu 3

¹Akwa saka ndaga antə Yahwana na mdər hara baptizma ku si akwa mtakər Yahudiya, tə tsa baɗitə ngkər labar ka pəla,

²“Ka giri tubi diya, ka kamnyar kuthlikur na amtazi ku hara kudzəha.”

³Kamnyar ngəni an mdə tə naɓi Ishaya ngkər labar ata kərari abbər, “Kuraka mda akwa kəga akwa mtaku abbər, ‘Namtə gir laku aka Mthlaku, namtə gir alari laku ni dwaɗu.’ ”

⁴Tsuwa Yahwana hatə ləptu tə mdə nam ka shishir dləkəmau, ka mbwi kusarari ka sur mbwadzi tə mdə nam ka kəsəm. Tsuwa susəmərni an hawa ka cirməma na akwa mtaku.

⁵Antə mji ku thlata ahar Urushalima, ka shanga tsəɗi Yahudiya, ka shanga mji na ata mnya Thlyagha Jodan, ka si adzə ni,

⁶akwa jikaɓəla bikər ɗa. Antə tsa ku hara ala ɗa baptizma akwa Thlyagha Jodan ni.

⁷Sakatə Yahwana wutə mjir Farisi ka mjir Saddukiya hang akwa si adzə ni kamnyar ka tsa hara ala ɗa baptizma, antə tsa pəla ala ɗa, “Giri na pwapwayeri, wan tsaktə giri abbər ka giri hwi ta bwani na akwa si nə ri?

⁸Ka giri hara kəthlərayeri na ata ncanta abbər giri ku tubi ata kəra bikər giri.

⁹Tsuwa giri aɗiya pəla abbər giri ata msər ta bwani ni atar pəla abbər Ibrahim an baba' giri wa. Kamnyar I akwa pəla ala giri abbər Hyel ata mzhi namtə maɗa' aka Ibrahim ka pelayeri ngəni.

¹⁰Kulini ma mdə ku kurtə vətə kəma ata nggilanga nfwayeri, antə kəlara nfu na aɗi ata ya na ɓɗakɓɗaku wa, mda ata nthləmta ni, ka psəmta ni akwa u'u.

¹¹I ana hara ala giri baptizma ka yimi kamnyar ncanta abbər giri ku tubi, amma mda aɗi na ata si aghəli na ku təramta ra ka dunar kuthlikur, natə ɓɗakkurərna aɗi mzhi wala kəi kəsi ɓaɓiyirni wa. Tsa ata hara ala giri baptizma ka Mambəl na Ɓɗakkarkara, ka u'u tsuwa.

¹²Tsa ka sur puha akwa tsiyari, antə tsa ata puhəɓəla su na ata laliyirni, ka tsa tsapta alkama arni akwa bi, amma tsa ata mbamta cwangcwangari ka u'u na amtə wa.”

¹³Sakanda antə Yesu thlata ahar Galili ka si adzə Yahwana akwa Jodan, kamnyar ka Yahwana hara alari baptizma.

¹⁴Amma Yahwana ku bara ngkatə ni, tə tsa pəla alari, “I na akwa bara ka ga an hara ali baptizma ni, antə ga an ata si adzə ra ya tsuwa?”

¹⁵Amma Yesu pəla alari, Zhari ka tsa ndzi apani, kamnyar apani antə mwa ata nghyaɓəla shanga ɓɗakkur tə Hyel akwa barari. Antə tsa ku kələngkər alari.

¹⁶Təkəma sakatə Yesu ku dlu baptizma, tə tsa səɓəla akwa yimi ni, antə vəi na amtazi ku kəlardzi, tə tsa wutə Mambələr Hyel səghəi apa bukəl ka pwa ata kərari.

¹⁷Antə kuraku laga ku thlata amtazi akwa pəla, “Ngəni an Ɓzərna natə hira! I akwa nggatə msərakurərni ka duna.”