Read bura-pabir Mathliyu 5 Bible Online

Mathliyu 5 - bura-pabir bible

Mathliyu 5

¹Sakatə Yesu wutə mji dlama dlama, antə tsa ku ndlətə gar ka ndzəndzi. Antə mjirthlipərni ku si adzə ni,

²tə tsa baɗitə thlipa ala ɗa.

³“Da ka barka mji na ku səndə vəi kətəkətəkurər ɗa abwar mambəla, kamnyar kuthlikur na amtazi an arɗa.

⁴“Da ka barka mji na ka ɗəffə ɓzəɓza, kamnyar mda ata sə shiktə ɗa.

⁵“Da ka barka mji na ka tərghəikər, kamnyar da ata sə fa kifər duniya.

⁶“Da ka barka mji na ka mi ka thləli kamnyar hara su na ata kəskəra Hyel, kamnyar Hyel ata sə ndlantə ɗa.

⁷“Da ka barka mji na ana kətadzə mda, kamnyar Hyel ata sə kətadzə ɗa tsuwa.

⁸“Da ka barka mji na ka ɗəffa ɗa kəcəkəcari, kamnyar arɗa da ata sə wutə Hyel.

⁹“Da ka barka mji na ana səntə ndzəndzi ar lapiyakur akwa daɓwa mji, kamnyar arɗa mda ata sə kəga ɗa abbər da maɗa' Hyel.

¹⁰“Da ka barka mji na ana ɗar bwani kamnyar jirkur, kamnyar kuthlikur na amtazi an arɗa.

¹¹“Giri ka barka sakatə mji ata nggəl giri, ka hara bwani ala giri, ka pəla suayeri ɗimi ɗimi ata kəra giri gapani, kamnyar na.

¹²“Ka giri hara kucali ka ndzi ka ɗəffu mwapu, kamnyar watsəɓər giri an ola amtazi, kamnyar tsu apani antə mdə hara bwani aka naɓiyayeri na akəmata giri.”

¹³“Giri an unər duniya. Amma ma msərakur un ni ku mti, apa madi tə vəi unkurərni ni ata jaktə namtədzi ka damwa ri? Tsa aɗi ka ampani kəra wa! Antə tar ka mdə pumta ni, ka mji ntsəntsarəmta ni ka səla ɗa.

¹⁴“Giri an parakəu aka shanga mjir duniya. Ai bərni na ata kəra gar amzhi ɗuwamtadzi wa.

¹⁵“Tsuwa mda aɗi ana njiu u'u akwa pitəla ka vəi akira balang wa, amma tsa ana vəi ni ata vəi na haptəhaptari, kamnyar ka tsa hamta parakəu aka shanga mji na akwa kutakəi ni.”

¹⁶“Antə zhar giri ka parakər giri mbəla akəma mji, kamnyar ka da wutə kəthlərayeri ar giri na ɓɗakɓɗaku ni, ka da nar olkur aka Təddar giri na amtazi.”

¹⁷“Giri aɗiya dzama abbər I si kamnyar kəi tsi tsawur Musa ka surthlipər naɓiyayeri ni wa, amma kəi nghyaɓəla ɗa.

¹⁸Kamnyar I akwa pəla ala giri jirkur, abbər apatə vəi na amtazi ka duniya aɗi, antə ɗahə na raka ta shang, wala an su laga tith aɗi na ata ləɓəla akwa Tsawu ni wa, tar ma shanga su ku nghyaɓəladzi.

¹⁹Kamnyar ngəni, kəlara mdə na ata ɓəli wala na raka ta shang akwa nca tsawayeri ni, ka thlipa aka mji ka da ɓəli tsawu ni tsuwa, tsa ata ndzi mdə na raka ta shang akwa kuthlikur na amtazi. Amma kəlara mdə na ku ɓəlatə tsawu ni, ka thlipa aka mji ka da ɓəlatə tsawu ni, tsa ata ndzi mdə na ola akwa kuthlikur na amtazi.

²⁰Kamnyar I akwa pəla ala giri, ma ɓɗakkurər giri aɗi təramta ɓɗakkur maləmayeri na ol'ola ka mjir Farisi wa, giri aɗi ata ləkwa kuthlikur na amtazi ni cap wa.”

²¹“Giri ku nggatə su tə mdə pəla aka kəkayeri ar giri na waci abbər, ‘Ga aɗiya tsi mdə wa, kamnyar kəlara mdə na ku tsi mda, mda ata hara alari shariya.’

²²Amma I akwa pəla ala giri, abbər kəlara mdə natə ɗəffari ku ɓza adzə ata kəra ɓzərma'ni, mda ata hara alari shariya. Tsuwa kəlara mdə na ku nggəl ɓzərma'ni, mda ata səntə ni akəma mjir hara shariya. Tsuwa kəlara mdə na ku pəla aka ɓzərma'ni abbər, ‘Caku ragai!’ Tsa ata ləkwa u'u na akur wa.

²³Apani ma sakatə ga akwa bara hamta cautər nga aka Hyel akwa vəi hamta saɗaka, antə gə ɗangta abbər ɗəffa ɓzərma' nga ku ɓzi ata kəra ga,

²⁴ka gə zhar cautər ngə ni tsu anda akwa vəi hamta su ni, ka gə mwari, ka giri shwalatədzi ka ɓzərma' nga, kambəla gə jaktə ngka ka hamta cautər ngə ni.

²⁵Ma mdə laga ku burkatə nga, ka gə hangkər ka giri shwalatədzi ka tsa sakatə giri akwa mwari akwa shariya ni, akəmata tsa asə hamta nga aka alkali, ka alkali tsuwa hamta nga aka dakwali, ka mdə hambwa nga akwa pərsəna.

²⁶Jiri, I akwa pəla ala ga, ga aɗi ata səɓəla anda wa, tar ma ga ku ntəmta shanga su tə mda akwa nu nga.”

²⁷“Giri ku nggatə su tə mdə pəla abbər, ‘Ga aɗiya ləkə wa.’

²⁸Amma I akwa pəla ala giri abbər kəlara mdə na ku wutə mdə mwala, ka ngguktə ni, to tsa ku kurtə bara mwala ni akwa ɗəffari.

²⁹Apani, ma nca gə na abwa mazəm ata vu nga akwa biku, ntsuɓəla ni, ka gə psəmta ni. Kamnyar kuji ka gə ni ka vəi laga ata dza ga, ta shanga dza ga aləkwa kəyir u'u.

³⁰Tsuwa ma tsiya gə na abwa mazəm akwa vu nga akwa biku, nthləmta ni, ka ra psəmta ni. Kamnyar kuji ka gə ni ka vəi laga ata dza ga, ta shanga dza ga aləkwa kəyir u'u.”

³¹“Tsuwa mdə ku pəla abbər, ‘Kəlara mdə na ku nggəlar mwalankiɗa, tar ka tsa na alari kakaɗər ndəka.’

³²Amma I akwa pəla ala giri abbər, kəlara mdə na ku nggəlar mwalankiɗa, amma aɗi kamnyar bikər ləkə wa, ata namtə mwala ni mdər ləka. Tsuwa kəlara mdə na ku kəl mwala na ku ndəka ka salngkiɗa, tsa akwa ləka.”

³³“Tsuwa giri ku nggatə mda akwa pəla aka mji na waci abbər, ‘Ga aɗiya kahyel ata kəra su na thlandər wa, amma ka gə nghyaɓəla su tə ga ku kətə alkawalər harari aka Mthlaku.’

³⁴Amma I akwa pəla ala giri abbər, Giri aɗiya kahyel wala raka wa, wala ka vəi na amtazi wa, kamnyar tsa an dəkəl kuthlikur ar Hyel.

³⁵Tsuwa giri aɗiya kahyel ka duniya wa, kamnyar tsa an vəi putə səl ar Hyel, wala ka Urushalima wa, kamnyar tsa an bərniyir Kuthli na ola.

³⁶Tsuwa ga aɗiya kahyel ka kəra gə wa, kamnyar tə wala shishi duku ga amzhi namtari ka tsa ndzi mwapu wala mənggəl wa.

³⁷Amma zhari ka labar natə giri ata pəlari ndzi ‘I’ wala ‘Awa.’ Kamnyar kəlara su damwa tə giri ata pəlari na ku təramta ndər ngəni an ku thlata akəla mdə na ɗimi ni.”

³⁸“Giri ku nggatə mda akwa pəla abbər, ‘Nca ata vəya nca, ka thlir ata vəya thlir.’

³⁹Amma I akwa pəla ala giri, Giri aɗiya ntə ɗimikur aka mdə na ɗimi wa. Ma mdə laga ku tsa nga ata pukəma gə na abwa mazəm, ka gə shinar alari pukəma gə na abwa matsəkar tsuwa.

⁴⁰Ma mdə laga ku mwantə nga akwa shariya kamnyar bara dlutsə ləptər nga, ka gə zhar alari sur pudzər nga tsuwa.

⁴¹Ma mdə laga ku vu ngə dwali abbər ka giri mwar kilomita pal, ka giri mwar kilomita suɗa ka tsa.

⁴²Ma mdə laga ku kiɗə su akəla ga, ka gə na alari. Tsuwa ma tsa ku bara təpa akəla ga, ga aɗiya ngkata alari wa.”

⁴³“Giri ku nggatə mda akwa pəla abbər, ‘Ka gə hir ntəwulər nga, ka gə nggəlar dawar nga.’

⁴⁴Amma I akwa pəla ala giri, ka giri hir dawar giri, ka hara adduwa aka mji na akwa hara ala giri bwani.

⁴⁵Kamnyar atar apani antə giri ata ndzi maɗa' Təddar giri na amtazi. Kamnyar tsa ana hara ka pcirni mbəla ata kəra mji na ɓɗakɓɗaku kəga mji na ɗimi ɗimi, ka hamta yimərni aka mjir jirkur kəga mji na kula jirkur.

⁴⁶Kamnyar ma giri ata hir mji na ana hir giri daci, watsəɓər mi antə giri ata wutari ri? Kamnyar ai wala mjir dlu tsəma ana hara apani.

⁴⁷Ma giri ata thlawar maɗama' giri daci, to ka mi antə giri təramta mji damwa ri? Kamnyar ai wala dur gapani ana hara apani.

⁴⁸Antə tar ka giri ndzi ɓɗakkarkara, tsu apatə Təddar giri na amtazi an ɓɗakkarkara.”