Read bura-pabir Mathliyu 6 Bible Online

Mathliyu 6 - bura-pabir bible

Mathliyu 6

¹“Ka giri hara hangkal ta nu Hyelər giri ni asə ndzi kamnyar ka mji wutə ka nca daci. Kamnyar ma ku ndzi apani, giri aɗi ka watsəɓa akəla Təddar giri na amtazi wa.

²“Antə ma sakatə ga akwa hamta su aka mdər bwani, ga aɗiya mburəngkər təmbəl wa, kamnyar apani antə mji na shimnya ana hara akwa mbwayeri ar vəngkər səli ka akwa lakwayeri ar kuta di, kamnyar ka mji hu ɗa. I akwa pəla ala giri jirkur, da ku kurtə dlu watsəɓər ɗa.

³Ma sakatə ga akwa dlar mdə na ka tura, ga aɗiya hir ka mdə wutə su tə akwa bara harari nə wa, wala mdə na kudzəhə ka ga.

⁴Antə ɓɗakkur tə gə hara akwa ɗuwari aka mdə ni, Təddar nga na ana wutə su akwa vəi ɗuwari ni ata ntəmtari ala ga.”

⁵“Tsuwa sakatə giri ata hara adduwa, giri aɗiya ndzi apa mji na shimnya wa. Kamnyar da hir thləthlata akwa mbwayeri ar vəngkər səli ka akwa matəngndlayeri na ol'ola ka hara adduwa, kamnyar ka shanga mji wutə ɗa. I akwa pəla ala giri jirkur, da ku kurtə dlu watsəɓər ɗa.

⁶Amma sakatə ga ata hara adduwa, ka gə ləmbwarngkiri, ka gə hartə nyarmbwa, ka gə hara adduwa aka Təddar nga na akwa vəi ɗuwarɗuwari. Antə Təddar nga na ana wutə su akwa vəi ɗuwarɗuwari ata na ala gə watsəɓari.

⁷“Tsuwa ma sakatə giri akwa hara adduwa, giri aɗiya ndəkərtə adduwa ni saɓəl akwa mnya gapangapani, apatə mji na kula səndə Hyel ana hara nə wa. Kamnyar da tamata abbər Hyel ata nggatə ɗa kamnyar hangkur ndərayeri arɗa.

⁸Giri aɗiya ndzi apa da wa, kamnyar Təddar giri asəndə su tə giri akwa turari akəmata giri a yu ni.

⁹Antə ka giri hara adduwa apani, “ ‘Təddar yeru na amtazi, Thləma ga an ɓɗakkarkara.

¹⁰Kuthlikur ar nga ka tsa si, Su tə gə hira antə ka tsa hara akwa duniya, apatə ga ana hara amtazi.

¹¹Ka gə na ala yeru susəmər ɓukcir pci tədəku.

¹²Ka gə tifəmta ala yeru bikər yeru, apatə yeru ana tifəmta aka mji na ku hara ala yeru biku.

¹³Ga aɗiya mwantə yeru akwa ngkərtədzi wa, amma ka gə mbantə yeru ta mdə na ɗimi ni.’ ”

¹⁴“Kamnyar ma giri ata yafitə mji na ku ɓzamta ala giri su, Təddar giri na amtazi ata yafitə giri tsuwa.

¹⁵Amma ma giri aɗi yafitə mji na ku ɓzamta ala giri su wa, Təddar giri aɗi ata yafitə giri tsuwa wa.”

¹⁶“Ma sakatə giri akwa kəl asham, giri aɗiya hərtə kəma giri, apatə mji na shimnya ana hara ni wa. Kamnyar da ana ɓzamtə kəma ɗa ka mji sənda abbər da ka asham. I akwa pəla ala giri jirkur, da ku kurtə dlu watsəɓər ɗa.

¹⁷Amma ma ga ata kəl asham, ka gə kəcimta kəma ga, ka kəkərtə mal,

¹⁸ta mji awuta abbər ga akwa kəl asham. Antə Təddar nga natə mda awutə ni wa ni, na ana wutə su akwa vəi ɗuwarɗuwari ni, ata na ala gə watsəɓari.”

¹⁹“Giri aɗiya vəi gəna aka kəra giri akwa duniya, ata vəi tə ləma ka zəmərvəya ata ɓzamtari wa, vəi tə həlayeri ata ɓələmta mbwa ka həltə ni wa.

²⁰Ka giri tsaptə gəna aka kəra giri amtazi, ata vəi tə ləma ka zəmərvəya amzhi ɓzamtari wa, vəi tə həlayeri tsuwa amzhi ɓələmta mbwa ka həltə wa.

²¹Kamnyar vəi tə gənar nga ata, antə ɗəffa ga ata ndzi anda tsuwa.”

²²“Nca ndzi apa pitəla aka dza mda. Antə ma nca ga lapiya, shanga dza ga ata ndzi ncir parakəu.

²³Amma ma nca ga aɗi lapiya wa, antə shanga dza ga ata ndzi akwa kuthlu. Apani ma parakəu na akwa dza ga ku ndzi kuthlu, kuthlu ngəni ata ndzi tinding na ka duna jiri!”

²⁴“Mda aɗi na amzhi hara kəthlər aka mdərkəi suɗa ata saka duku wa. Kamnyar tar ka tsa nggəlar na duku, ka hir na dukwari, wala ka tsa kələngkər aka na duku, ka rutəmta na dukwari. Giri amzhi hara kəthlər aka Hyel ka aka gəna ata kəma duku wa.”

²⁵“Antə I akwa pəla ala giri abbər, giri aɗiya damitədzi ata kəra mpika giri wa, ata kəra su tə giri ata səmari, wala su tə giri ata sa ri, wala ata kəra laku tə giri ata wutə ləptu kamnyar dza giri wa. Mpika aɗi təramta susəm wa ya? Tsuwa dza giri aɗi təramta ləptu wa ya?

²⁶Wul giri ɗikayeri bu! Da aɗi ana thləka wa, wala nthləi mthli wa, wala tsaptə su akwa bi wa. Amma wala apani Təddar giri na amtazi ana ndlantə ɗa ka susəma. Tsuwa giri aɗi təramta ɗa ka səli wa ya?

²⁷Tsuwa wan akwa nca giri tə damitədzərni ata mzhi jaka alari awur pal aka ndzəndziyir mpikari ri?

²⁸“Kamnyar mi tə giri ana damitədzi ata kəra ləptu ri? Wul giri laku tə pukdlayeri na akwa mtaku ana kəla akwa bu! Da aɗi ana kəthlər wa, wala shi puwa wa.

²⁹Amma wala apani I akwa pəla ala giri abbər, wala Kuthli Solaman ka shanga olkur tə tsa kəgari, aɗi ɗar hara dəɓa apa pal akwa nca pukdlayeri ngəni wa.

³⁰Antə ma Hyel ana dəɓatə kusar na akwa mtaku apani, natə ashina tsa ka mpika, ɗəpa mda ata psu akwa vir u'u, tsa aɗi ata hadza ala giri su na təramta ngəni wa ya? Hamta jirər giri an raka!

³¹“Antə giri aɗiya damitədzi wa ka pəla, ‘Man tə yeru ata sə səmari ri? Wala man tə yeru ata sə sari ri? Wala man tə yeru ata hatari ri?’

³²Kamnyar mji na asəndə Hyel wa ana pakə shanga suayeri ngəni. Tsuwa Təddar giri na amtazi ku sənda abbər giri akwa tur shanga suayeri ngəni.

³³Amma su na olta shang tə ka giri bara an kuthlikur ar Hyel, ka haratə su na ata kəskərari, antə mda ata sə hamta shanga suayeri ngəni ala giri.

³⁴Antə apani, giri aɗiya damitədzi kamnyar su na ɗəpə wa, kamnyar ɗəpa ka damitədzərni zum. Bwani ar pci na ashina ku mzhi kamnyar pci na ashina.”