Read bura-pabir Mathliyu 7 Bible Online

Mathliyu 7 - bura-pabir bible

Mathliyu 7

¹“Giri aɗiya hara shariya aka wama wa, ta mda asə hara shariya ala giri.

²Kamnyar apatə giri ana hara shariya aka mji, antə mda ata sə hara shariya ala giri tsuwa. Ka jili tasa natə giri ana ngkərtə su aka nvwa giri akwa, antə mda ata sə ngkərwa ala giri.

³Kamnyar mi tə ga akwa wul kusar na raka akwa nca ɓzərma' nga, amma ga aɗi damitədzi ka gang na akwa nca gə wa ri?

⁴Wala apa madi tə ga ata pəla aka ɓzərma' nga abbər, ‘Ndzi kəi kəɓəla ala gə kusar raka akwa nca ga,’ amma ar nga gang ana akwa nca gə ri?

⁵Gə shimnya! Ntangkəma, tar ka gə kəɓəla gang na akwa nca gə ni, antə ga ata mzhi wulɓəla su karkar, har ka gə mzhi kəɓəla kusar na raka akwa nca ɓzərma' nga.

⁶“Giri aɗiya nar su na ɓɗakkarkara aka kilayeri wa, ta da asə shinardzi ka kəgaltə giri. Tsuwa giri aɗiya vəi su na ka daraja apa gənar wulya giri akəma gaduwayeri wa, ta da asə ntsəntsartə ka səla ɗa.”

⁷“Ka giri kiɗa, antə mda ata na ala giri, ka giri bara antə giri ata wutari, ka giri tsarar nyarmbwa, antə mda ata kəlar ala giri nyarmbwa ni.

⁸Kamnyar kəlara mdə na ku kiɗa, mda ata na alari, kəlara mdə na ku pakə su, tsa ata wutari, tsuwa kəlara mdə na ku tsarar nyarmbwa, mda ata kəlar alari.

⁹Nənga wan akwa nca giri tə ma ɓzərni ku kiɗə buradi, tsa ata na alari pela ri?

¹⁰Wala ma tsa ata kiɗə kəlfa, tsa ata na alari pwapu ri?

¹¹Ma giri na ɗimi ni ata səndə hamta suayeri na ɓɗakɓɗaku aka maɗa' giri apani, to ai ma Təddar giri na amtazi shang tsa ata hamta suayeri na ɓɗakɓɗaku hang ta ni aka mji na ku kiɗə su akəlari.

¹²“Antə akwa shanga su, ka giri hara aka mji su tə giri ata hir ka mji hara ala giri. Kamnyar ngəni an su tə tsawur Musa ka naɓiyayeri ni akwa thlipa ata kər.”

¹³“Ka giri ləvəi ata nyarfu na cinggəthlu. Kamnyar nyarfu na bau aɗi na ata mwantə mda akwa mta. Tsuwa lakurni an kasəla, antə mji hang an ata ləkwa nyarfu ndaga.

¹⁴Amma nyarfu na ata mwantə mda akwa mpika an cinggəthlu. Tsuwa lakurni ni mwavər, antə mjir nuwari aɗi hang wa.”

¹⁵“Ka giri hara hangkal ka naɓiyayeri na ana thlandər, na ana si adzə giri akwa dludzər təma, amma avivi akwa ɗəffa ɗa da ndzi apa kilamtakayeri na ka mi.

¹⁶Giri ata nggaɓəla ɗa atar surharar ɗa. Mda ana ɗəm yar anap ata nfur mtəhəra ya, wala yar kamnda ata nfur mtəhəra ya.

¹⁷Tsu apani tsuwa tar ka kəlara nfu na ɓɗaku ya su na ɓɗaku, ka kəlara nfu na ɗimi ana ya su na ɗimi.

¹⁸Kamnyar nfu na ɓɗaku amzhi ya su na ɗimi wa, tsuwa nfu na ɗimi amzhi ya su na ɓɗaku wa.

¹⁹Antə kəlara nfu na aɗi ata ya su na ɓɗaku wa, mda ata nthləmta ni ka psu akwa u'u.

²⁰Apani antə giri ata nggaɓəla naɓiyayeri ar thlandər atar surharar ɗa.”

²¹“Aɗi shanga mji na ana kəga ra, ‘Mthlaku, Mthlaku’ an ata ləkwa kuthlikur na amtazi wa, amma tar mji na ana hara su tə Təddarna na amtazi ku hira.

²²Vir nda mji hang ata sə pəla ali ‘Mthlaku, Mthlaku! Diya yeru ku ngkər ndərər Hyel akwa thləma ga, ka kədləɓəla shatanayeri na ɗimi ɗimi ga akwa thləma ga, ka hara surndatayeri zumzum hang akwa thləma ga!’

²³Antə I ata sə pəla ala ɗa ata bəbal abbər, ‘I aɗi ɗar səndə giri wa. Tərar girdzi kazhar ra, giri an mji na ɗimi!’ ”

²⁴“Kəlara mdə na ata nggatə ndərərna ka kələngkər akari, tsa ata ndzi tsu apa mdə na ɗəɗu na latə mbwarni ata pela.

²⁵Yimi ku təri, antə pərtu ku nghyantə zərkayeri ka puɓəladzi, antə shambar ku fya ka duna ka tsa mbwa ndaga. Amma tsa aɗi ndla wa, kamnyar mdə nci səlari ata pela.

²⁶“Amma kəlara mdə na ata nggatə ndərərna, ka nggəlar kəthlər kəgari, tsa ata ndzi apa mdə na caku na həntə mbwarni ata wuyaku.

²⁷Sakatə yimi ku təri, tə pərtu ku si, antə shambar ku fya ka duna ka tsa mbwa ndaga, antə tsa ku ndla. Antə tsa ku ndla na ɗimiyari ka duna!”

²⁸Sakatə Yesu ku kuri pəla suayeri ngəni, antə mji na tsaptədzi dlama dlama ni ku ndatədzi ata kəra thlipərni ni,

²⁹kamnyar tsa akwa thlipa ala ɗa apa mdə na ka kuthlikur, aɗi apa maləmayeri arɗa wa.