Read bura-pabir Mathliyu 9 Bible Online

Mathliyu 9 - bura-pabir bible

Mathliyu 9

¹Antə Yesu ku ləkwa shar ni, ka mwari aɓəla bwanda manda ni, ka si akwa di tə tsa kəla akwa.

²Antə mji ku sənta alari mdə laga apəpəi ata algau ka dzari mtəmtari. Sakatə Yesu ku wutə hamta jirər ɗa, antə tsa pəla aka mdə na ka dzari mtəmtari ni abbər, “Ɓzərna, ga aɗiya damitədzi wa, mdə ku tifəmta ala gə bikər nga.”

³Antə mji laga akwa nca maləmayeri ar thlipə tsawur Musa ni pəla akwa ɗəffa ɗa, “Mdə ngəni akwa rutə Hyel.”

⁴Amma Yesu ku səndə su na akwa ɗəffa ɗa, antə tsa pəla, “Kamnyar mi tə giri akwa dzam su na ɗimi akwa ɗəffa giri nə ri?

⁵Kamnyar madi an kasəlari tə ka mdə pəla ri, ka mdə pəla, ‘Mdə ku tifəmta ala gə bikər nga,’ nənga ka mdə pəla, ‘Thlatə kara mwa’ ri?

⁶Amma ka giri sənda abbər Ɓzər Mda ka dunar kuthlikur akwa duniya kamnyar tifəmtar bikayeri.” Aghəla ngəni antə tsa pəla aka mdə na ka dzari mtəmtari ni abbər, “Thlata, kara kətə algauwur nga, ka gə təra ləha.”

⁷Antə mdə ni thlatə ka təra ləha.

⁸Sakatə mji ni wutə su ngəni, antə da thlivər, ka haptə səliyir Hyel, na hamta duna aka mji ar hara su apani.

⁹Sakatə Yesu akwa ləkəma ka mwarni, antə tsa wutə mdər dlu tsəma laga ka thləmari Mathliyu, andzəndzi akwa vəi dlu tsəma. Antə Yesu pəla alari, “Nu ra.” Antə Mathliyu ku thlatə ka nutə ni.

¹⁰Sakatə Yesu akwa səm susəma akwa kəyir Mathliyu, antə mjir dlu tsəma kəga mjir biku laga hang, ku si ka ndzəndzi akwa səm susəma ata kəma duku ka Yesu kəga mjirthlipərni.

¹¹Sakatə mjir Farisi laga wuta apani, antə da pəla aka mjirthlipərni, “Kamnyar mi tə maləmər giri ana səm susəma ata kəma duku kəga mjir dlu tsəma ka mjir biku nə ri?”

¹²Sakatə Yesu ku nggatə ndər ngəni, antə tsa pəla, “Mji na lapiya lapiya aɗi ana tur mdər hamta kuzəku wa, tar mji na nggawa nggawa.

¹³Mwari giri, ka giri thliptə karapur su ngəni tə kakaɗu pəla ni abbər, ‘Kətadzə mda antə I akwa barari akəla giri, aɗi saɗaka wa.’ Kamnyar I aɗi si kəi kəga mji na kula biku wa, amma mjir biku.”

¹⁴Antə mjirthlipər Yahwana na Mdər hara Baptizma ku si adzə Yesu ka yu abbər, “Kamnyar mi tə yeru kəga mjir Farisi ana hara asham tədəku, amma mjirthlipər nga aɗi ana hara asham wa nə ri?”

¹⁵Antə Yesu pəla ala ɗa, “Apa madi tə pazhayeri ar sala mwala ata mzhi ndzi ka ɗəffə ɓzəɓza akwa sakatə sala mwala tsu adzə ɗa ri? Ai saka akwa si tə mda ata sə kələmta sala mwala ni kazhar ɗa. Sakanda antə da ata kəl asham.

¹⁶“Mda aɗi ana mbuɓəla ləptu na halhalari ka yadi na bilənari wa, kamnyar vəi tə mdə mbuɓəla ni kwahəɓəladzi. Antə thləhu ni ata hara ɗimi kamta.

¹⁷Tsuwa mda aɗi ana pu yimər anap bilən akwa zamzamiya na halhalari wa. Kamnyar ma mdə ku hara zamzamiya ni ata ndəlamtadzi, ka yimər anap ni ata pumtadzi, tsuwa zamzamiya ni ata hila. Amma mda ana pu yimər anap bilən akwa zamzamiya na bilən, antə japwa ɗa ata fəi.”

¹⁸Sakatə Yesu akwa pəla ala ɗa labar ngəni, antə mdə laga na ola ata kəra mji ku si adzə ni ka zuzuri akəmari, akwa pəla, “Ngkwarna haɗa mtə kulini. Asəra ka gə vəngkər tsiya ga alari, ka tsa jaktə ndzi ka mpika.”

¹⁹Antə Yesu ku thlatə kəga mjirthlipərni, ka nutə mdə ni.

²⁰Təng nggədza mwala laga anda na ku hara məva kumnya suɗa ka mamshi akwa pumtadzi adzə ni. Mwala ni si təbwahilari, ka tsəkwar mnya ləptərni.

²¹Kamnyar mwala ni pəla akwa ɗəffari abbər, “Ma har I ku tsəkwar mnya ləptərni, I ata mbantədzi.”

²²Sakatə Yesu shinardzi ka wutə mwala ni, antə tsa pəla alari, “Mbwi ɗəffa ga, ngkwarna! Hamta jirər nga ku mbantə nga.” Tsu ata saka nda antə mwala ni mbantədzi.

²³Sakatə Yesu ku si akwa kəyir mdə na ola ata kəra mji ni, ka wutə mji akwa mbur shwala akwa vəi tuwa, ka dlamar mji akwa hara kurakə ni,

²⁴antə tsa pəla, “Ləɓəla giri! Kamnyar ngkwa ni aɗi mtə wa, tsa akwa heni.” Antə da kumshi ni.

²⁵Amma sakatə mdə ku kədləɓəla mji ni, antə Yesu ləmbwa ka tamtə tsiya ngkwa ni. Antə ngkwa ni ku thlata.

²⁶Antə labar ar su ngəni ku ndlətə shanga bwar tsəɗi nda.

²⁷Sakatə Yesu akwa təra kazhar vəi na ndaga, antə mji laga suɗa na mdlyang nutə ni, ka kuraku akwa pəla, “Ɓzər Dauda! Kətadzə yeru.”

²⁸Sakatə Yesu ku ləvəi akwa kəi laga, antə mji na mdlyang ni si adzə ni. Antə Yesu yu ɗa abbər, “Giri ku hamta jiri abbər I ata mzhi mbantə giri ya?” Antə da pəla alari, “I Mthlaku.”

²⁹Antə Yesu tsəkwar nca ɗa akwa pəla, “Apa hamta jirər giri antə ka suari ndzi ala giri.”

³⁰Antə nca ɗa ku kəlardzi. Amma Yesu ku tsaktə ɗa abbər, “Giri aɗi ngkər su ngəni aka wama wa.”

³¹Amma ləɓəlar ɗa təkəma antə da baɗitə titil thləma Yesu akwa tuwantə ni akwa shanga bwar tsəɗi na ndaga.

³²Sakatə mji ni akwa təra, antə mdə səntə mdə laga na ka shatan akwa dzari na ngkata alari mnya.

³³Sakatə Yesu ku kədləɓəla shatan ni, antə mdə ni baɗitə gari. Antə shanga mji ku ndatədzi akwa pəla, “Mda aɗi ɗar wutə jili su apani hara akwa Israila wa.”

³⁴Amma mjir Farisi pəla, “Ai ka dunar olər shatanayeri antə tsa akwa kədləɓəla shatanayeri ni.”

³⁵Yesu ku mwari akwa shanga kauyayeri na ol'ola kəga na raka, akwa thlipa akwa mbwayeri ar vəngkər səli, ka ngkər labar na msəra ata kəra kuthlikur ar Hyel, tsuwa tsa akwa mbantə mji ta shanga shilkayeri ka nggawakurayeri.

³⁶Sakatə tsa wutə dlamar mji, antə tsa kətadzə ɗa kamnyar da akwa ɗar bwani, tsuwa mdər dlar ɗa aɗi wa. Da ndzi apa təmayeri na kula mdər ɓəla.

³⁷Antə tsa pəla aka mjirthlipərni, “Sur fakəu ku ni ya hang, amma mjir kəthlər aɗi hang wa.

³⁸Antə kiɗə giri kəra Mthlakər fakə ni ka tsa thlentə mjir kəthlər akwa fakərni na ata fəi sur fakə ni.”