Read bura-pabir Markus 12 Bible Online

Markus 12 - bura-pabir bible

Markus 12

¹Antə tsa jaktə ləkəma ka gari ala ɗa akwa karapu. Tsa pəla, “Waci mthlakər fakə laga aɗi na ncimta nfur anap akwa fakərni, ka kalaktə fakə ni ka kadaka, ka namtə vəi ntsarɓəla yimər anap ni akwa, ka latə mbwar səka. Antə tsa hamta fakə ni aka mjir hayari, ka təra mwari akwa tsəɗi damwa.

²Sakatə anap ni ku hara, antə tsa thlentə mafarni laga adzə mjir haya fakə ni kamnyar ka tsa dlu bwadukwa yar nfu na akwa fakə ni.

³Amma mjir haya fakə ni ku ngkəi mafa ni, ka dlaɓu ni, ka kədləmta ni ka tsiyari shwalang.

⁴Antə tsa jaktə thlentə mafa damwa. Antə da pukthli kərari, ka taratə ni ka kəli səliyirni.

⁵Antə tsa jaktə thlentə mdə damwa, antə arni da tsi ni hwatu. Antə tsa ku thlentə mji damwa hang, natə mdə ku dlaɓu bwadukwa ɗa, ka tsi bwaduku.

⁶Tsa tsu ka mdə pal tə tsa ata mzhi thlentari, watau ɓzərni natə tsa hira. Akwa tsikərari antə tsa thlentə ɓzərni ni ala ɗa, ka pəla, ‘I ka hamta jiri abbər da ata wutə səliyir ɓzərna ni.’

⁷Amma mjir haya fakə ni pəla aka nvwa ɗa, ‘Yauwa! Nggədza mdə na ata sə fa kifər fakə ni ja! Asər giri ka mburu tsi ni, ka kifərni ni ndzi ala mburu.’

⁸Antə da kətə ni, ka tsi ni, ka ndzəhəɓəla mshiyirni kazhar fakə ni.”

⁹“Kaha, man tə ka mthlakər fakə ni hara ri? Tsa ata si ka tsa tsəgəi mjir haya fakə ni, ka tsa hamta hayar fakə ni aka mji damwa.

¹⁰Giri aɗi ɗar karatə vəi na ngəni akwa kakaɗər Hyel ni wa ya? Vəi ni pəla, “ ‘Pela natə mjir hən mbwa ku nggəlari, an sə ndzi pelar həna na ɓɗakta shang.

¹¹Ngəni an harar Mthlaku, tsa sur ndatə tə mda abara ka wula!’ ”

¹²Antə mjir Yahudi na ol'ola ku bara lakur ngkəi ni, kamnyar da ku nggaɓəla abbər tsa hara karapu ni ata kəra ɗa. Amma da akwa thlivər dlamar mji. Antə da zhar ni ka təra.

¹³Aghəla nda antə da thlentə mji laga akwa nca mjir Farisi ka mjir Hirudus adzə Yesu, kamnyar ka da ngkəi vəi sharni akwa ndərayeri tə tsa ata pəlari.

¹⁴Sakatə da mzhita, antə da pəla alari, “Maləm, yeru ku sənda abbər ga ana pəla jirkur, tsuwa ga aɗi ana damitədzər su tə waskəi ata pəlari ata kər wa, kamnyar ga aɗi ana wul olkurər mdə wa. Ga ana thlipə lakur Hyel ka jirkur. Akwa wulər nga, kalkal ka yeru ntə tsəma aka Kaisar, nənga aɗi kalkal wa ri?”

¹⁵Amma Yesu ku sənda abbər da mji na shimnya, antə tsa pəla ala ɗa, “Kamnyar mi tə giri akwa ngkərtə ra ri? Səntə giri ali kwabar ntə tsəma ni, kəi wulha.”

¹⁶Antə da sənta alari kwaba ni. Antə tsa pəla, “Ngəni dludzər kəma wa ri, tsuwa thləma wa an ata nə ri?” Antə da pəla, “Ar Kaisar.”

¹⁷Antə Yesu pəla ala ɗa, “Hamta giri aka Kaisar su na ar Kaisar, ka aka Hyel su na ar Hyel.” Antə da ku ndatədzi ata kərari.

¹⁸Antə mjir Saddukiya laga si adzə Yesu. Da andər pəla abbər thlata akwa mtəmta aɗi wa ni. Antə da yu ni abbər,

¹⁹“Maləm, Musa ku rəbuta ala yeru abbər ma mdə tə ɓzərma'ni ku mti kazhar mwalankiɗa kula ɓzər, tar ka ɓzərma'ni ni kətə mwalankiɗa natə tsa mtə kazhar ni, ka da wutə maɗankyar aka ɓzərma'ni na mtə ni.

²⁰To, mji shili laga aɗi murfa mji ka ɓzərma. Antə mdə na ntangkəma ni ku kəl mwala ka mtə kula ɓzər.

²¹Antə mdə na suɗkur kətə mwala ni, ka mti tsuwa kula da wutə maɗankyar. Antə mdə na makərkur hara tsu apani.

²²Apani shanga ɗa murfə ni ku kəl mwala ni ka mtə kula ya ka mwala ni.Aghəla nda antə mwala ni ku mtə tsuwa.

²³Akwa sakar thlata akwa mtəmtə ni, tsa ata ndzi mwalar wa akwa nca ɗa nə ri, təng tə shanga ɗa na murfə ni ku kəl ni ni?”

²⁴Antə Yesu pəla ala ɗa, “Aɗi an su na hara tə giri sha ni wa ya, tə giri aɗi səndə kakaɗayeri ar Hyel wa, wala səndə dunar Hyel wa ni?

²⁵Kamnyar ma sakatə mji na ku mti ata thlata, da aɗi ata kəl mwala wa, wala hamta mwala aka sal wa. Amma da ata ndzi apa mjirthlentərhyel amtazi.

²⁶Tsuwa ata kəra mji na ata thlata akwa mtəmtə ni, giri aɗi karata akwa Kakaɗər Musa wa ya? Kamnyar mdə ku rəbutə sakatə Hyel akwa pəla aka Musa ata kəra nfu na raka na tamtə u'u ni abbər, ‘I an Hyelər Ibrahim, ka Hyelər Ishaku, ka Hyelər Yakub.’

²⁷Tsa aɗi Hyelər mji na mtəmtari wa, amma ar mji na ka mpika. Antə giri ku sha ciju ka duna.”

²⁸Antə pal akwa nca maləmayeri ar thlipə tsawur Musa si ka nggatə ɗa akwa beɗi kəga nvwa ɗa. Sakatə tsa nggaɓəla abbər Yesu ku hamta ala ɗa amsa na kalkalari, antə tsa yu ni abbər, “Tsawu madi an olta shang ri?”

²⁹Antə Yesu pəla, “Tsawu na olta shang an apani, ‘Ka giri psi thləm, giri na mjir Israila, Mthlaku na Hyelər mburu an Mthlaku duku.

³⁰Ka gə hir Mthlaku na Hyel ar nga ka ɗəffa gə shang, ka mpika gə shang, ka hangkala gə shang, ka duna gə shang.’

³¹Na suɗkurari tsuwa an apani, ‘Ka gə hir ntəwulər nga apatə gə hir kəra ga.’ Tsawa damwa aɗi na olta nayeri ni wa.”

³²Antə maləm ni pəla aka Yesu, “Maləm, jiri apatə ga ku pəla ni, Hyel an duku antə damwa aɗi wa, təng tsa shini.

³³Tsuwa ka gə hir ni ka ɗəffa gə shang, ka hangkala gə shang, ka duna gə shang, tsuwa ka gə hir ntəwulər nga apatə gə hir kəra ga. Ai suayeri ngəni ku təramta shanga saɗaka mbamba ka shanga sur hamta damwa.”

³⁴Sakatə Yesu ku wuta abbər tsa ku hamta amsa na kalkalari, antə tsa pəla alari, “Gə kudzəha ka kuthlikurər Hyel.” Aghəla nda mda aɗi na jaktə nggitə yu su aka Yesu kəra wa.

³⁵Sakatə Yesu akwa thlipa akwa mbwar vəngkər səli, antə tsa pəla, “Apa madi tə maləmayeri ar thlipə tsawur Musa ana pəla abbər Kristi ɓzər Dauda nə ri?

³⁶Dauda ka kərari atar Mambəl na Ɓɗakkarkara ku pəla, “ ‘Mthlaku ku pəla aka Mthlakərna, ndzəndzi abwa mazəmi, tar ma I ku namtə dawayeri ar nga ka da ndzi akira səla ga.’ ”

³⁷“Dauda ka kərari surni ku kəga ni ‘Mthlaku.’ Ka apa madi tə tsa ata ndzi ɓzər Dauda tsu ri?” Antə dlamar mji ku nggatə msərakur psi thləma ɗa aka thlipə tə Yesu akwa harari ni.

³⁸Sakatə Yesu akwa thlipə ni, tsa pəla, “Ka giri hara hangkal ka maləmayeri ar thlipə tsawur Musa ni. Kamnyar da hir ha ləptayeri na ol'ola. Tsuwa da hir ka mji thlawar ɗa akwa kasukayeri,

³⁹ka bara ka mdə na ɗa vəi ndzəndzi na ka daraja akwa mbwar vəngkər səli, ka vəi ndzəndziyir mji ol'ola akwa vəi səm susəma na ol'ola.

⁴⁰Da ana zambaɓəla kari mwanki tə shilər ɗa ku mtə kazhari, ka ndəkərtə adduwayeri na saɓəl saɓəl kamnyar ncanta abbər da mjir Hyel. Jili mji apani mda ata ɗi ɗa ka bwani na mwavər ta shang!”

⁴¹Antə Yesu ndzəndzi kudzəhə ka vəi pwi kwaba ar mbwar vəngkər səli ni, akwa wul mji na akwa pu kwaba akwa vəi pwi kwaba ni. Mji hang na ka gəna ku pu kwaba hang.

⁴²Antə mwala kughung laga na ngguɗi si ka pu anini suɗa, natə darajar ɗa aɗi mzhi kwaba pal wa.

⁴³Antə Yesu kəga mjirthlipərni adzə ni, ka pəla ala ɗa, “I akwa pəla ala giri jirkur, mwala kughung ngəni na ngguɗi ni an pu kwaba na hang ta shang akwa vəi pu kwaba ni.

⁴⁴Kamnyar arɗa shanga ɗa kətsəkətsa akwa gənar ɗa ka hamta, amma ar mwala ni, akwa ngguɗikurərni antə tsa hamta shanga su, an kurkura su tə tsa kəgari akwa ndzəndziyirni.”