Read bura-pabir Markus 13 Bible Online

Markus 13 - bura-pabir bible

Markus 13

¹Sakatə Yesu ku səɓəla akwa mbwar vəngkər səli, antə pal akwa nca mjirthlipərni pəla alari, “Maləm, wul jili ɓɗakkur mbwayeri ngəni akwa ndatə mdə ni! Wul jili ol'olkur pelayeri na akwa dza mbwayeri ni!”

²Antə Yesu pəla alari, “Ga akwa wul shanga mbwayeri ngəni ol'ol ni ja wa! Pela aɗi wala duku na ata sə mbila ata kəra nvwani kula mdə huzamta wa.”

³Sakatə Yesu andzəndzi ata Gar Zaitun awul mbwar vəngkər səli, antə Bitrəs, ka Yakub, ka Yahwana, ka Andrawus, si adzə ni da shiɗa ka pəla alari,

⁴“Pəla ala yeru, nawa antə suayeri ngəni ata sə hara ri? Tsuwa man ata ndzi seɗar shanga suayeri ngəni abbər da abaka hara nə ri?”

⁵Antə Yesu pəla ala ɗa, “Ka giri hara hangkal ta mda asə shamta giri.

⁶Kamnyar mji hang ata sə si akwa thləmi ka pəla, ‘I an Kristi ni,’ har ka da shamta mji hang.

⁷Giri ata sə nggatə mji akwa mpayeri, ka mji thlivərantə giri abbər da ata sə mpa giri, amma hangkala giri aɗiya thlatə wa. Kamnyar dwali ka suayeri ngəni hara, amma sakar kurari aɗi hara katagu wa.

⁸Tsəɗi ata sə mpa ka tsəɗi nvwani, ka kuthlikur mpa ka kuthlikur nvwani, antə mi ata sə təri, tsuwa di ata sə kənggərantədzi akwa vəyayeri zumzum. Amma shanga suayeri ngəni an baɗitər bwani daci.

⁹“Antə tar ka giri hara hangkal, kamnyar da ata sə mwantə giri aka alkaliyayeri, ka da ɓu giri akwa mbwayeri ar vəngkər səli. Da ata sə mwantə giri akəma gwamnayeri ka kuthlyayeri kamnyar thləmi, kamnyar hara ala ɗa seɗa ata kəri.

¹⁰Amma na ntangkəma, tar ka mdə ngkər labar na msəra ni aka shanga mji.

¹¹Tsuwa kəlara sakatə da ku fatə giri ka mwantə giri akwa shariya, giri aɗiya huvə damitədzi ata kəra su tə giri ata sə pəlari wa. Ar giri, pəla giri kəlara su na ku si akwa ɗəffa giri akwa saka ndaga. Kamnyar aɗi giri an ata gari nə wa, amma Mambəl na Ɓɗakkarkara.

¹²Mda ata sə ɓəli ɓzərma'ni, har ka mdə tsi ni, tsuwa baba ata sə ɓəli ɓzərni. Maɗankyar ata sə nggəlar ndərər mji na ya ɗa, har ka da hara ka mji tsəgəi mji na ya ɗa ni.

¹³Shanga mji ata nggəlar giri kamnyar na, amma kəlara mdə na ku nggitə har ka vədza aka kurari, tsa ata mbantədzi.”

¹⁴“Ma sakatə giri ku wutə sur cika na ɗimi ni athləthlata akwa vəi na aɗi kalkal ka tsa thləthlata ata wa. Ka mdər karatə ni vədzə hangkalari. Tsuwa sakanda ka mji na akwa Yahudiya hwi mwari akwa garayeri.

¹⁵Mdə na ata kəra mbwarni aɗiya səghəi wa, wala ləkwa mbwarni kamnyar kətə su wa.

¹⁶Tsuwa mdə na akwa fakəu aɗiya ngka avi kamnyar kətə sur pudzərni wa.

¹⁷Tsuwa sha ku wutə mwanki na ka dza ɗa suɗa, ka mwanki na ka maɗa' ata hili akwa saka ndaga!

¹⁸Ka giri kiɗə Hyel diya, ta su ngəni asə hara aviyar!

¹⁹Kamnyar jili bwani na ata sə hara akwa saka ndaga ni, aɗi ɗar hara təng tə Hyel namtə duniya har ka vədza aka vir na ashina wa. Tsuwa mda aɗi ata jaktə harari kəra wa.

²⁰Ma abbər Mthlaku an aɗi namtə virayeri ni ka da ndzi kwadang wa, mda aɗi na ata wutə mbantədzi wala duku wa. Amma kamnyar mji carcara, natə tsa an carɓəla, antə tsa kəmta virayeri nda ka da ndzi kwadang.

²¹“Sakanda wala mdə laga an pəla ala giri, ‘Wula, nggədza Kristi azi!’ wala, ‘Ndaga ni anda!’ Giri aɗiya kələngkər wa.

²²Kamnyar mji laga ata sə thlata ka thlandər abbər da an Kristi, wala thlandər abbər da naɓi, ka da hara seɗayeri kəga surndatayeri, kamnyar ka da shamta mji, har ma purəm kəga mji na carcara, ma ahara.

²³Antə ka giri hara hangkal, nggədza I ku kurtə pəla ala giri shanga su akəmata sakari ahara.”

²⁴“Amma təkəma aghəla sakar bwani na mwavər nda, “ ‘Antə pci ata hara kuthlu, tsuwa thliya aɗi ata mbəl wa.

²⁵Sasəlkayeri tsuwa ata təgəri akwar amtazi, tsuwa Hyel ata kənggərantə shanga su na amtazi.’ ”

²⁶“Sakanda antə da ata sə wutə Ɓzər Mda akwa si akwa dlambayeri ka kuthlikur na ola ka səli.

²⁷Tsuwa tsa ata sə thlentə mjirthlentərni, ka da tsaptə shanga mjirni na carcarari akwa shanga duniya, baɗita abwani har ka mwanta aka datari na abwanda.”

²⁸“Thlipə giri su ata kəra nfur kamnda. Kəlara sakatə tsiyari ku hara ngyingyaɓu ka baɗitə ɗəɗa thlali, giri ku sənda abbər vəya ku hara kudzəha.

²⁹Tsu apani tsuwa ma sakatə giri ku wutə suayeri ngəni akwa hara, ka giri sənda abbər saka ku hara kudzəha, har anyarmbwa.

³⁰I akwa pəla ala giri jirkur, mjir zaman ngəni aɗi ata mtəgəmtadzi wa, tar ma shanga suayeri ngəni ku hara.

³¹Vəi na amtazi ka duniya ata sə kura, amma ndərayeri arna aɗi ata kur cap wa.”

³²“Amma mda aɗi na səndə viri wala sakatə suayeri ngəni ata sə hara nə wa, wala mjirthlentərhyel na amtazi, wala Ɓzər, aɗi səndə wa, tar Tədda shini an sənda.

³³Ka giri vədzə hangkala giri, ka ndzi ɗəmhəɗəmhari, kamnyar giri aɗi asəndə sakatə saka ndaga ata sə hara wa.

³⁴Ata sə ndzi tsu apa mdə na ata lənggu. Sakatə tsa abaka zhar kəyirni antə tsa ata vu kəi ni akwa tsiya mafayeri arni, ka hamta kəthlər ala ɗa, waskəi ka kəthlərərni, ka tsawa aka mdər wul nyarfu tsuwa abbər ka tsa ndzi ɗəmhəɗəmhari.

³⁵Apani kuji ka giri ndzi ɗəmhəɗəmhari, kamnyar giri aɗi səndə sakatə mdərkəi ata sə ngka avi wa. Kamnyar tsa ata mzhi ngka wala tahaku, wala kərathlər viri, wala tuwar fugəm, wala ɗəɗəpa.

³⁶Ta ma tsa asə si kakər kula səndər giri ka wutə giri ata heni.

³⁷Su natə I pəla ala giri antə I akwa pəla aka shanga mji, abbər, Ka giri ndzi ɗəmhəɗəmhari.”