Read bura-pabir Markus 14 Bible Online

Markus 14 - bura-pabir bible

Markus 14

¹Kulini mbili vir suɗa ka mdə hara Kucalər Fəlɓəla Kəi ka Kucalər Buradi Na Kula Yist. Antə pristayeri na ol'ola, kəga maləmayeri ar thlipə tsawur Musa, ləkwa bara laku tə ka da ngkəi Yesu akwa ɗuwari, ka da tsi ni.

²Amma da pəla, “Amma aɗi akwa sakar Susəmər Kucali ni wa, ta mji laga asə ti bwari.”

³Sakatə Yesu andzəndzi akwa vəi səm susəma ahar Bethlani, aviyar Siman, na ɗar ndzi ka shilkər kəsəm dzari ni, antə mwala laga si adzə ni ka kwalɓa laga raka tə mdə nam ka pela oniks, nghyinghyari ka mal shiwura na msəra tə mdə nam ka nard shini, natə masari mwavər. Antə tsa kəlar kwalɓa ni, ka pungkər mal ni ata kəra Yesu.

⁴Amma mji laga aɗi anda na aɗi nggatə msərakur su ngəni wa, antə da pəla aka nvwa ɗa abbər, “Kamnyar mi tə mda ata gyalntə mal shiwur na msəra ngəni nə ri?

⁵Kamnyar ma mda an ɗələmta mal ngəni, mda ata mzhi wutə hangkur kwaba na ata ntəmta mdər kəthlər ar vir aru makər, ka mdə na aka mjir bwani.” Antə da mpa aka mwala ni ɗimi ɗimi.

⁶Amma Yesu pəla ala ɗa, “Zhar giri ni! Kamnyar mi tə giri akwa bwani alari? Ai su na ɓɗak laga antə tsa hara ali.

⁷Kamnyar giri ka mjir bwani adzə giri tədəku, tə giri ata mzhi dlar ɗa kəlara sakatə giri hira. Amma aɗi tədəku antə giri ata wutə ra adzə giri wa.

⁸Ai tsa hara su na kalkal ka dunari. Tsa kəkərtə dzi ka mal tsu tə vəi ɗəm kamnyar ɗəmhə ra kamnyar hara.

⁹I akwa pəla ala giri jirkur, akwa kəlara vəi akwa duniya ngəni tə mdə ku ngkər labar ngəni msəra ni, mda ata dingngga ngkər su tə tsa hara ni kamnyar ɗangtə ni.”

¹⁰Antə Yahuda Iskariyoti, na pal akwa nca mjirthlipər Yesu ni, mwari adzə pristayeri na ol'ola kamnyar ka tsa ɓəli Yesu ala ɗa.

¹¹Sakatə da nggatə ndər ni antə da hara kucali ka duna, har tə da kətə alkawalər na alari kwaba. Antə Yahuda ləkwa bara lakur ɓəli ni ala ɗa.

¹²Akwa vir na ntangkəma ar Kucalər Buradi Na Kula Yist, vir natə mdə ana tsi ɓzər gam kamnyar susəmər Kucalər Fəlɓəla Kəi ni, antə mjirthlipər Yesu yu ni abbər, “Ama antə ga ata bara ka yeru ɗəmha ala gə susəmər Kucalər Fəlɓəla Kəi nə ri?”

¹³Antə Yesu thlentə mji suɗa akwa nca mjirthlipərni ka pəla ala ɗa, “Mwar giri akwa kuta di, antə giri ata kəɓa ka mdə laga na ka tughum ka yimi ata kərari. Nu giri ni.

¹⁴Kəlara kəi tə tsa ku ləkwa, ka giri pəla aka mthlakər kəi ni abbər, ‘Maləm pəla akwa mbwar mətəpi madi antə tsa ata səm susəmər Kucalər Fəlɓəla Kəi kəga mjirthlipərni ri?’

¹⁵Antə tsa ata sə ncanta ala giri mbwa na ola amta namnamari ɗəmhəɗəmhari, antə giri ata wutə shanga su akwa, anda antə ka giri ɗəmha ala mburu.”

¹⁶Antə mjirthlipərni təra ka mwari akwa kuta di ni, ka wutə shanga su kalkal apa tə Yesu ku pəla ala ɗa ni. Antə da ɗəmhə susəmər Kucalər Fəlɓəla Kəi ni.

¹⁷Sakatə tahaku ku hara, antə Yesu si ka mjirthlipərni na kumnya suɗə ni.

¹⁸Sakatə da ku ndzəndzi akwa səm susəma, antə Yesu pəla ala ɗa, “I akwa pəla ala giri jirkur, mdə pal akwa nca giri ata sə ɓəli ra, mdə tə yeru akwa səm susəma ata vəi duku ka tsa ni.”

¹⁹Antə ɗəffa mjirthlipərni ku ɓzi, tə da baɗitə yu ni duku duku abbər, “I iya?”

²⁰Antə Yesu pəla ala ɗa, “Tsa an pal akwa nca giri na kumnya suɗə ni, natə yeru ata səm susəma akwa kwatam duku ka tsa ni.

²¹Ɓzər Mda ata mta tsu apatə mdə ku rəbuta ata kərari akwa kakaɗər Hyel. Amma ata ndzi sur kətadza aka mdə na ata ɓəli Ɓzər Mdə ni! Ata ndzi alari kuji mda aɗi ya ni wa!”

²²Sakatə da akwa səm susəm ni, antə Yesu kətə buradi, ka usar Hyel ata kər, ka ɓəgəlwa buradi ni, ka hamta aka mjirthlipərni, akwa pəla, “Dlu giri, ngəni an dzi.”

²³Antə tsa kətə kwapə na ka yimər anap ni, ka usar Hyel ata kər, ka hamta ala ɗa, tə shanga ɗa ku sa akwa.

²⁴Antə tsa pəla ala ɗa, “Ngəni an mamshirna na kamnyar nghyaɓəla alkawal, mamshi na pumtadzi kamnyar mji hang.

²⁵I akwa pəla ala giri jirkur, I aɗi ata jaktə sa yimər anap ngəni kəra wa, tar vir tə I ata sə sa yimər anap na bilənari akwa kuthlikurər Hyel.”

²⁶Sakatə Yesu ka mjirthlipərni ku hara ha laga, antə da ləɓəla ka mwari akwa Gar Zaitun.

²⁷Antə Yesu pəla ala ɗa, “Shanga giri ata sə hwi kazhar ra, apatə mdə ku rəbuta abbər, ‘I ata sə tsa mdər ɓəla, antə təmayeri ata sə titiləmtadzi.’

²⁸Amma aghəla tə mdə ku thlentə ra ka mpika, I ata mwari akwa tsəɗi Galili kəmata giri.”

²⁹Antə Bitrəs pəla alari, “Wala ma shanga ɗa ata sə hwi kazhar nga, arna I aɗi ata hwi wa.”

³⁰Antə Yesu pəla aka Bitrəs, “Jiri, I akwa pəla ala ga abbər tsu ashina aviri, akwabə fugəm atuwa ka suɗa, gə ka kəra ga ata sə kampiku ka makər abbər ga aɗi səndə ra wa.”

³¹Amma Bitrəs jaktə pəla ka duna abbər, “Wala ma I an ata mta ata kəma duku ka ga, I aɗi ata kampikər ngə cap wa!” Antə shanga mambila mji pəla tsu apani.

³²Antə da mwari akwa vəi laga tə mda ana pəla Gethsemani, antə Yesu pəla aka mjirthlipərni, “Ndzəndzi giri azi, kəi ra hara adduwa.”

³³Antə tsa fatə Bitrəs, ka Yakub, ka Yahwana adzə ni. Antə ɗəffari baɗitə ɓza, tə tsa ləkwa damitədzi ka duna.

³⁴Antə tsa pəla ala ɗa, “Ɗəffi ɓzəɓzari ka duna, har apa ka ɗəffi ləɓəla. Ndzəndzi giri azi, ka giri səka.”

³⁵Antə tsa ləkəma raka, ka zuzuri ata di ka hara adduwa abbər ma ahara ka su ngəni təramta kazhar ni.

³⁶Tsa pəla, “Baba, Təddarna! Ala ga shanga su ata mzhi hara. Kələmta kwapər bwani ngəni ka zhar ra. Wala apani aɗi abbər ka gə hara su tə I akwa barari ni wa, amma su tə gə hira.”

³⁷Antə tsa ngka adzə mjirthlipərni na makər ni ka wutə ɗa akwa heni. Antə tsa pəla aka Bitrəs, “Siman, ga akwa heni ya? Azha ga amzhi ndzi ata wula wala ar awur pal wa ya?

³⁸Ka giri səka, ka hara adduwa ta giri asə ləkwa ngkərtədzi. Jiri ɗəffa giri akwa barari, amma dza giri mtathlaku.”

³⁹Antə tsa jaktə təra mwari akwa vəi hara adduwa ni, ka jaktə pəla su tə tsa pəla nda.

⁴⁰Antə tsa jaktə ngka adzə ɗa, ka wutə ɗa akwa heni, kamnyar da akwa ngga heni ka duna. Da aɗi səndə su tə ka da pəla alari wa.

⁴¹Sakatə tsa ngka adzə ɗa na makərkurari ni, antə tsa pəla ala ɗa, “Har ba kulini giri tsu akwa heni ka ghərəmtaghəra ya? Daci! Saka ku hara! Kulini mda ata hamta Ɓzər Mda aka mjir biku.

⁴²Thlatə giri, ka mburu təra. Kamnyar mdə na ata ɓəli ra ni ku si kulini!”

⁴³Sakatə Yesu tsu akwa gari ni, antə Yahuda si, tsa na pal akwa nca mjirthlipərni na kumnya suɗə ni. Tsa si ka dlamar mji na ka katsakarayeri kəga zwalayeri akwa tsiya ɗa, tsuwa pristayeri na ol'ola ka maləmayeri ar thlipə tsawur Musa, kəga mji ol'ola, an thlentə ɗa.

⁴⁴Tsuwa mdə na ata ɓəli ni ni ku hamta ala ɗa seɗa laga, abbər, “Mdə tə I ku vədza mnyi alari, an tsa. Antə ngkəi gir ni, ka giri təra ka tsa, ka giri kəsi ni ɓɗaku.”

⁴⁵Təkəma mwarər Yahuda adzə Yesu antə Yahuda pəla, “Maləm!” Antə tsa vədzə mnyari aka Yesu.

⁴⁶Antə mji ni ngkəi Yesu, ka kəsi ni ɓəɓal.

⁴⁷Amma pal akwa nca mji na athləthlata anda ni, ntsuɓəla katsakarərni, ka nthlə mafar prist na ol ni kəgari, ka nthləmta thləmari.

⁴⁸Antə Yesu pəla ala ɗa, “Giri səɓəla ka katsakarayeri kəga zwalayeri kamnyar ngka ra apa dlu I mdər thla laku ya?

⁴⁹Tədəku viri I adzə giri akwa thlipa akwa mbwar vəngkər səli, giri aɗi ngkəi ra wa. Amma su ni hara apani ni kamnyar ka su tə mdə rəbuta akwa kakaɗayeri ni nghyaɓəladzi.”

⁵⁰Sakanda antə shanga mjirthlipərni təra kazhar ni ka hwi.

⁵¹Antə ɓzərdakwi laga na pudza zhaɓər lilin ni, ku nutə Yesu amma sakatə sojayeri ni bara ka da ngkəi ni,

⁵²antə tsa ku hwi təra dura kazhar ləptərni.

⁵³Antə da mwantə Yesu aka prist na ola, antə shanga pristayeri na ol'ola, ka mji na ol'ola damwa, kəga maləmayeri ar thlipə tsawur Musa, ku tsaptədzi anda.

⁵⁴Amma ar Bitrəs tsa akwa nu ghəla ɗa ka daɓwa ɗa tauwa, har tə da ləvəyar prist na ol ni. Antə tsa ndzəndzi adzə mjir gadi akwa thlir u'u.

⁵⁵Antə pristayeri na ol'ola ka shanga mjir majalisa akwa bara ka da wutə seɗa ata kəra Yesu, kamnyar ka da tsi ni, amma da aɗi wutə wala duku wa.

⁵⁶Mji hang ku hara seɗayeri ar thlandər ata kərari, amma seɗayeri ni aɗi kəɓa wa.

⁵⁷Antə mdə laga thlatə ka hara seɗar thlandər ata kəra Yesu, abbər,

⁵⁸“Yeru ku nggatə ni akwa pəla, ‘I ata huzamta mbwar vəngkər səli ngəni tə mdə hən ka tsi ni, kəi həntə damwa akwa kuta vir makər, natə aɗi mda an ata hənari wa.’ ”

⁵⁹Amma wala apani seɗar ɗa aɗi kəɓa wa.

⁶⁰Antə prist na ol ni thlatə ka thləthlata akwa nca ɗa, ka yu Yesu abbər, “Ga aɗi ata hamta amsa wa ya? Man tə ga ata pəlari ata kəra seɗayeri ngəni ata kəra gə nə ri?”

⁶¹Amma Yesu ku dləɓ səri, tsa aɗi ndər wa. Antə prist na ol ni jaktə yu ni abbər, “Ga an Kristi, Ɓzər Hyel na ka barka ni ya?”

⁶²Antə Yesu pəla, “I iya. Tsuwa giri ata sə wutə Ɓzər Mda andzəndzi abwa mazəma Na ka Duna ta Shang, akwa si akwa dlambayeri amtazi!”

⁶³Antə prist na ol ni thləthləhumta ləptərni, ka pəla “Kamnyar mi tə mburu akwa bara seɗa damwa ri!

⁶⁴Giri ku nggatə rutə tə tsa hara aka Hyel ni. Man tə giri wutə ri?” Antə shanga ɗa thlamta shariya abbər ka kalkal ka mdə tsi ni.

⁶⁵Antə mji laga akwa nca ɗa baɗitə tifəngkər alari mtili. Antə da hartə ncari, ka tsa ni ka matəkuma ɗa, ka pəla alari, “Hara naɓikur ja! Wan tsa ngə nə ri?” Antə mjir gadi ni tsuwa ləkwa tsa ni ka mandaɓa.

⁶⁶Sakatə Bitrəs tsu ata di akwa kuta bəbal ni, antə pal akwa nca maɗankwi na ana kəthlər aka prist na ol ni si.

⁶⁷Sakatə ngkwa ni wutə Bitrəs akwa thlir u'u, antə tsa wul ni ɓɗaku, ka pəla, “Gə ma ga ata vəi duku ka Yesu na mdər Nazareth ni.”

⁶⁸Amma Bitrəs kampiku ka pəla, “I asəndə wala nggaɓəla su tə ga akwa gari ata kər ni wa.” An ləɓəlarni akwa nyarfu, təkəma tsuwa təng fugəm tuwa.

⁶⁹Sakatə ngkwa ni jaktə wutə ni anda, antə tsa pəla aka mji na athləthlata anda ni abbər, “Ai mdə ngəni akwa nca ɗa!”

⁷⁰Amma Bitrəs jaktə kampiku. Aghəla saka laga raka antə mji na athləthlata anda ni pəla aka Bitrəs abbər, “Jiri, ga akwa nca ɗa, kamnyar gə mdər Galili.”

⁷¹Antə tsa baɗitə shuwumta kərni, akwa kahyel abbər, “I asəndə mdə ngəni tə giri ata gari ata kər ni wa!”

⁷²Təkəma təng fugəm tuwa na suɗkur. Antə Bitrəs ɗangtə su tə Yesu pəla alari nda abbər, “Akwabə fugəm atuwa ka suɗa, ga ata sə pəlari ka makər abbər ga aɗi səndə ra wa.” Antə Bitrəs pthli tuwa, ka tuwa ka shimwi.