Read bura-pabir Markus 4 Bible Online

Markus 4 - bura-pabir bible

Markus 4

¹Antə Yesu jaktə baɗitə thlipa ata mnya Mandar Galili. Antə mji dlama dlama ku tsaptədzi adzə ni, har tə tsa ləkwa shar ka ndzəndzi akwa ata kəra manda ni. Antə shanga mji ni thləthlata ata wuyakər mnya manda ni.

²Antə tsa thlipa ala ɗa su hang akwa karapu. Akwa thlipərni ni tsa pəla,

³“Psi gir thləma giri! Mdər tsuhwa laga aɗi na ku ləɓəla kamnyar ɓucə hwulfərni.

⁴Sakatə tsa akwa ɓucə hwulfə ni antə laga ku təri akwa kuta laku, antə ɗikayeri ku si ka ntəntwakəmnya ɗa.

⁵Hwulfayeri laga tsuwa ku təri akwa vəi na ka pirakthlya, vəi tə həi aɗi ata hang wa, antə tsa ku ptsi taktar kamnyar tə həi aɗi ata kərari hang wa.

⁶Amma sakatə pci ku səɓəla, antə da tətəɓumtadzi ka ulantədzi kamnyar tə da aɗi ka nggilang wa.

⁷Tsuwa hwulfayeri laga ku təri akwa nca mtəhərayeri, antə mtəhərayeri ni ku kələngkərdzi ala ɗa ka ngkatə ɗa kəla, antə da aɗi ya munya wa.

⁸Amma hwulfayeri laga ku təri akwa həi na ɓɗaku, antə da ku ptsi, ka kəla, ka pu munya, laga makkumari, laga ngkwakumari, laga tsuwa aru.”

⁹Antə Yesu pəla, “Mdə na ka thləmər nggatə su, ka tsa nggata.”

¹⁰Sakatə Yesu shini, antə mjirthlipərni na kumnya suɗə ni ka mji na akwa nu ni ku yu ni ata kəra karapwayeri ni

¹¹Antə tsa pəla ala ɗa, “Ar giri mdə ku hir ka giri sənda ashira kuthlikurər Hyel ni. Amma aka mji na aɗi akwa nca giri wa, shanga su sai akwa karapu.

¹²An su na hara ta, “ ‘Da ata ləkəma ka wulari, amma shang da aɗi ata wulɓəlari wa. Da ata ləkəma ka nggatari, amma shang da aɗi ata nggaɓəlari wa. Ma da ku nggaɓəla, da ata tubi, antə mda ata yafitə ɗa.’ ”

¹³Antə Yesu pəla ala ɗa, “Azha giri aɗi səndə karapu ngəni wa! Apa madi tə giri ata nggaɓəla karapu damwa ri?

¹⁴Mdər tsuhu ni akwa ɓucə ndərər Hyel.

¹⁵Antə hwulfayeri na təri akwa kuta laku ni ndzi apa mji laga na ku nggatə ndərər Hyel ni. Amma təkəma aghəla tə da nggatə ndər ni, təng Shatan si ka kəɓəla ndər ni akwa ɗəffa ɗa.

¹⁶Tsuwa hwulfə na təri akwa vəyayeri na ka pirakthlya ni an mji na ku nggatə ndər ni, ka dlu təkəma ka kucali.

¹⁷Amma təng tə da aɗi ka nggilang wa, da aɗi fəi wa. Apani sakatə bwaniyayeri na mwavər mwavər ku thlata ata kəra ndər ni, antə da ngka ka bwahili.

¹⁸Hwulfə na təri akwa mtəhərayeri ni an mji na ku nggatə ndərər Hyel ni,

¹⁹amma damitədzayeri, ka bara gəna, ka mwaɓər sur duniya, ku ləkwa ɗəffa ɗa ka ngkatə ɗa ta da akəla, antə da ku ndzi kula ampani.

²⁰Amma hwulfə na təri akwa həi na ɓɗaku ni an mji na ku nggatə ndər ni ka dluwa, ka hara kəthlər kəgari, ka wutə riɓari, laga makkumari, laga ngkwakumari, ka laga aru.”

²¹Antə Yesu pəla ala ɗa, “Nənga giri ana səmbwa ka pitəla ka giri hangkir akira balang wala akira dəkəl ri? I ana wuta abbər giri ana vəi ni ata vəi vətə ni.

²²Kamnyar kəlara su na ɗuwarɗuwarari kulini, ata sə kəlardzi. Tsuwa kəlara su na ku ndzi akwa ashir, suari ata sə səɓəla ata bəbal.

²³Kəlara mdə na ka thləmər nggatə su, ka tsa nggata.”

²⁴Antə tsa pəla ala ɗa, “Ka giri hara hangkal ka su tə giri ana nggata. Ka jili tasa natə giri ana ngkərtə su aka nvwa giri akwa, antə mda ata sə ngkərwa ala giri kəgari, har ma ka mdə jakəngkər ala giri.

²⁵Kamnyar mdə na ka su, antə mda ata jakəngkər alari damwa. Amma kəlara mdə na aɗi ka su wa, wala su tə tsa kəgari ma, mda ata dluɓəlari.”

²⁶Antə Yesu jaktə pəla, “Kuthlikurər Hyel ndzi tsu apa mdə na ku thləkamta hwulfə laga akwa fakərni.

²⁷Da aɗi da aɗi, har tə hwulfə ni ptsa, ka kəla, mdə ni aɗi səndə laku tə su ni hara akwa wa.

²⁸Amma həi ni ka kərari an akwa hara kəthlərərni. Ntangkəma thlali an səɓəla, aghəla nda tsa ata haɓəla kər, kambəla tsa pu munya.

²⁹Sakatə munya mthli ni ku ng'həi, antə mdə ni ata kətə təkatəka ka tsa baɗitə nthlari, kamnyar tə sakar nthlə mthli ku hara.”

³⁰Antə Yesu pəla, “Ka mi antə mda ata mzhi gira kuthlikurər Hyel ri? Karapu madi antə mda ata mzhi kəthlər kəgari kamnyar ngkərɓəlari ri?

³¹Tsa ndzi tsu apa hwulfər munya mastad, hwulfə na raka ta shang tə mda ana thləkamta akwa di.

³²Amma wala apani ma mdə ku thləkamta ni, tsa ana kəla, ka ndzi olta shanga suayeri na ptsa akwa fakə ni. Tsa ana hara tsiyayerari ol'ola har tə ɗikayeri ata mzhi pwa ata, ka thlir shanggurari.”

³³Ka karapwayeri hang apani, antə Yesu ngkər labarər Hyel aka mji, kalkal ka su tə da ata mzhi nggaɓəlari.

³⁴Su aɗi tə tsa ngkər ala ɗa amma kula akwa karapu wa. Amma sakatə da shiɗa kəga mjirthlipərni, tsa ana ngkərɓəla ala ɗa shanga su ata bəbal.

³⁵Tsu vir nda tahaku, antə Yesu pəla aka mjirthlipərni, “Ndzi ka mburu mwari aɓəla bwanda.”

³⁶Antə da ku təra kazhar mji ni, ka kətə ni adzə ɗa akwa shar tə tsa akwa hwatu ni. Tsuwa sharayeri damwa aɗi adzə ɗa.

³⁷Amma təkəma təng shambar yimi laga na mwavər baɗitə fya, akwa pu yimi akwa shar ni, har tsa abaka nghyantari.

³⁸Amma ar Yesu tsa aghəli nda akwa kuta shar ni, ka kərari ata sur vətə kər akwa heni. Antə mjirthlipərni mwari ka thlentə ni, ka pəla alari, “Maləm, mburu ata kurəmtadzi diya, ga aɗi damitədzi wa ya?”

³⁹Antə Yesu thlata ata heni ni, ka mpa aka shambar ni ka pəla aka mpar yimi ni, abbər, “Thləthlatə tsəkəm! Zhar fi ni!” Antə shambar yimi ni ku zhar fya, tə shanga su ku pəpəi.

⁴⁰Antə Yesu pəla aka mjirthlipərni, “Kamnyar mi tə giri akwa thlivər nə ri? Har ba kulini giri aɗi ka hamta jiri wa ya?”

⁴¹Amma da ku thlivər ka duna, tə waskəi ku pəla aka nvwani, “Wa ngəni, tə wala shambar ka manda akwa kələngkər alari ni ri?”