Read bura-pabir Markus 6 Bible Online

Markus 6 - bura-pabir bible

Markus 6

¹Antə Yesu ku təra kazhar vəi nda, ka ngka akwa diyirni, antə mjirthlipərni ku nutə ni.

²Sakatə Vir Ghərəmtaghəra ku si antə tsa ləkwa mbwar vəngkər səli ka baɗitə thlipa aka mji, antə mji hang na nggatə ni, ku ndatədzi, ka pəla, “Mdə ngəni wuta ama shanga su ngəni ri? Tsa wuta ama jili ɗəɗukur ngəni, natə har tsa akwa hara surndatayeri ngəni kəgari nə ri?

³Aɗi ngəni an kapənta ni pwa? Ngəni aɗi ɓzər Maryamu pwa? Tsuwa aɗi tsa an ɓzərma' Yakub, ka Yusuf, ka Yahuda, ka Siman wa ya? Tsuwa aɗi shanga maɗama'ni na maɗankwi azi adzə mburu wa ya?” Antə da ləkwa səlkərni.

⁴Antə Yesu pəla ala ɗa, “Vəi aɗi tə naɓi kula daraja ata wa, tar akwa diyirni, ka akwa nca maɗama'ni, ka kutakəyirni.”

⁵Antə Yesu aɗi mzhi hara surndata anda wa, təng mji laga yiɗauwa na nggawa nggawa daci antə tsa vəngkər tsiyari ala ɗa, ka mbantə ɗa.

⁶Tsa ku ndatədzi ata kəra tur hamta jirər ɗa. Antə Yesu ku dlarhə kauyayeri ni akwa thlipa ala ɗa.

⁷Antə tsa kəgatə mjirthlipərni na kumnya suɗə ni adzə ni, ka baɗitə thlentə ɗa suɗsuɗa, ka hamta ala ɗa duna ata kəra mambəlayeri na ɗimi ɗimi.

⁸Tsa tsawa ala ɗa abbər, “Giri aɗiya kəl su kamnyar lənggur giri wa, wala susəma, wala thləvu, wala kwaba akwa dlipur giri wa, təng zwal daci antə ka giri kəsi.

⁹Ka giri hatə ɓaɓiyir giri, amma giri aɗiya kətə ləptu damwa wa.

¹⁰Kəlara sakatə giri ku ləkwa kəi laga, ka giri ndzi tsu akwa kəi nda, har tar ma sakatə giri ata zhar di nda.

¹¹Tsuwa akwa kəlara vəi tə mda aɗi dlu giri akwa wa, wala psi thləm aka ndərər giri wa, ma sakatə giri ata zhar vəi nda, ka giri ɓumta bərbər na ata səla giri, ka ndzi seɗa ala ɗa.”

¹²Antə da ku təra kara ngkər ndərər Hyel aka mji abbər ka mji tubi.

¹³Antə da ku kədləɓəla shatanayeri hang akwa dza mji, ka kəkərtə mji na nggawa nggawa hang ka mal zaitun ka mbantə ɗa.

¹⁴Kuthli Hirudus ku nggata ata kəra shanga suayeri ngəni, kamnyar tə thləma Yesu ku tuwa ka duna akwa kəlara bwa. Har mji laga akwa pəla abbər, “Sakani Yahwana na mdər hara baptizma ni an thlata akwa mtəmta, an su na hara tə tsa ka dunar hara surndatayeri ngəni ni.”

¹⁵Amma mji laga pəla, “Tsa an Iliya.” Mji laga tsuwa pəla, “Awa, naɓi laga diya zum, apa pal akwa nca naɓiyayeri na waci.”

¹⁶Amma sakatə Hirudus ku nggata apani, antə tsa pəla, “Ai ngəni Yahwana natə I nthləmta kərari ni an jaktə thlatə ka mpika!”

¹⁷Kamnyar Hirudus surni an thlenta abbər ka mdə ngkəi Yahwana, ka mbwahə ni, ka hambwa ni akwa pərsəna. Hirudus hara apani kamnyar Hirudiya na mwalar ɓzərma'ni Filibus, kamnyar Hirudus ku kəl mwala ni.

¹⁸Kamnyar Yahwana ku kəɗar pəla aka Hirudus abbər, “Aɗi kalkal ka gə kəl mwalar ɓzərma' ngə wa!”

¹⁹Kamnyar su ngəni antə Hirudiya ku kəsi Yahwana akwa ɗəffari, akwa pakə lakur tsi ni. Amma tsa aɗi mzhi wa,

²⁰kamnyar tə Hirudus akwa thlivər Yahwana. Tsa ku sənda abbər Yahwana ka jirkur, tsuwa tsa mdə na kula biku, antə Hirudus ku wulwul kərari ta su awutə ni. Wala tə kəlara sakatə Hirudus ku nggatə Yahwana akwa gari, tsa ana damitədzi ni, tsu tsa ana nggatə msərakur gariyirni.

²¹Amma laku ku sə wutədzi aka Hirudiya, sakatə Hirudus kəgatə mji akwa kucalər vir tə mdə yaɓəla ni ni. Tsa kəgatə ajiyayeri arni, kəga mji na ol'ola ata kəra sojayeri arni, kəga mji na ol'olər Galili.

²²Kamnyar sakatə ngkwar Hirudiya səmbwa ka ɓathla akəma Hirudus ka mətəpiyayeri arni ni, shanga ɗa ku nggatə msərakurari. Antə kuthli ni pəla aka ngkwa ni abbər, “Yu kəlara su tə ga akwa barari, I ata hamta ala ga.”

²³Tsuwa har kuthli ni ku kahyel aka ngkwa ni abbər, “Kəlara su tə ga ku yu akəli, I ata hamta ala ga, wala an retar kuthlikur arna.”

²⁴Antə ngkwa ni ləɓəla ka pəla aka mama'ni, “Man su tə kəi kiɗə ri?” Antə mama'ni pəla alari, “Kəra Yahwana na Mdər hara Baptizma.”

²⁵Təkəma antə ngkwa ni jaktə ngka adzə kuthli ka huva ka pəla alari, “I akwa bara ka gə ni kəra Yahwana na mdər hara baptizma kulini ata paranti!”

²⁶Gari ngəni ku ɓzamtə ɗəffa kuthli ka duna! Amma kamnyar kahyel tə tsa hara, ka tsuwa mətəpiyayeri arni, tsa aɗi bara ka tsa ɓəli alkawal tə tsa hara alari wa.

²⁷Təkəma antə kuthli ni thlentə pal akwa nca sojayeri arni na ana sək kərari, ka tsa ra nthləi kəra Yahwana. Antə soja ni ku mwari, ka nthləi kəra Yahwana akwa pərsəna ni,

²⁸ka səntə kəra Yahwana ni ata paranti, ka hamta aka ngkwa ni. Antə ngkwa ni ku dluwa ka mwanta aka mama'ni.

²⁹Sakatə mjirthlipər Yahwana nggatə su ngəni, antə da si ka kətə mshiyirni, ka ra harəmtari.

³⁰Antə aposəlayeri ku ngka adzə Yesu, ka pəla alari ata kəra shanga su tə da ku hara, ka su tə da ku thlipa.

³¹Mji hang akwa dingngga si ka təra adzə Yesu, har tə mjirthlipərni aɗi wutə saka wala raka ka da səm susəm wa. Antə Yesu pəla ala ɗa, “Asər giri ka mburu mwari akwa vəi laga na kula mda, ka giri ɗar ghərɓəlaghəra.”

³²Antə da ləkwa shar, da shiɗa, ka təra mwari akwa vəi na kula mda.

³³Amma mji hang ku wutə ɗa akwa təra ni, ka nggaɓəla ɗa. Antə mji ku thlata akwa kauyayeri arɗa ka hwi mwari ka səl, har ka mzhitə vəi nda akəmata da.

³⁴Sakatə Yesu ku səɓəla akwa shar ni, ka wutə dlamar mji na tsaptədzi ni, antə tsa kətadzə ɗa, kamnyar da ndzi apa təmayeri na kula mdər ɓəla. Antə tsa baɗitə thlipa ala ɗa suayeri hang.

³⁵Sakatə pci abaka təri, antə mjirthlipərni si adzə ni ka pəla alari, “Vəi ngəni ku hara ciju ta kuta di. Nggədza tsuwa pci abaka təri.

³⁶Antə kuji gə salamtə mji ni, kamnyar ka da mzhi mwari akwa kuta di kəga diyayeri na raka raka, kamnyar ka da mastə su tə ka da səma.”

³⁷Amma Yesu shinau ala ɗa ka pəla, “Na giri ala ɗa su tə ka da səm bu.” Antə da pəla alari, “Ka yeru ra mastə susəma ar kwabar ntər mdər kəthlər vir aru suɗa, ka yeru na ala ɗa ka da səm ya?”

³⁸Antə Yesu pəla, “Kər buradi yiɗau an akəla giri ri? Mwar giri ka giri wulha.” Sakatə da ku mwari ka wulha, antə da si ka pəla, “Kər buradi ntəfu ka kəlfa suɗa.”

³⁹Antə Yesu pəla aka mjirthlipərni, ka da tsawa aka shanga mji ka da ndzəndzi ata kusar miraku zara zara.

⁴⁰Antə mji ku ndzəndzi zara zara, laga aru aru, laga ntəfkumari ntəfkumari.

⁴¹Sakatə tsa kətə kər buradi na ntəfu ka kəlfa na suɗə ni, ka haptə ncari amta, ka usar Hyel, antə tsa ɓəgəlwa buradi ni, ka hamta aka mjirthlipərni ka da ndəkəmta aka mji. Apani tsuwa antə tsa ndəkəmta kəlfa ni aka shanga mji.

⁴²Antə shanga ɗa ku səma ka ndli.

⁴³Antə mjirthlipərni tsaptə shanga buradi ka kəlfa na ɓushirəmtadzi ata di, har ka nghyantə thlambəl kumnya suɗə kəgari.

⁴⁴Tsuwa hangkurər mji na kwasə buradi ni an mji shili dəpu ntəfu.

⁴⁵Da akwa kuriyari təkəma, antə Yesu tsawa aka mjirthlipərni ka da ləkwa shar, ka da mwa akəmari ka mwari ahar Bethsaida, ka tsa salamtə dlamar mji ni.

⁴⁶Aghəla tə tsa salamtə mji ni, antə tsa ndlətə gar kamnyar hara adduwa.

⁴⁷Sakatə pci ku təri, shar ni tsu ata ɗəffa manda ni, tsuwa Yesu tsu ata kəra gar ni shini.

⁴⁸Sakatə Yesu wuta abbər mjirthlipərni akwa ɗar bwani akwa nggur shar ni kamnyar shambar na akwa damitə ɗa apa saka makər na aviri, təng da wutə ni akwa mwa ata kəra yimi ni akwa si təbwar ɗa. Apa tsa akwa bara təramta adzə ɗa.

⁴⁹Amma sakatə da wutə ni akwa mwa ata kəra yimi ni, da dzama abbər sakani shatan, antə da hara kuraku,

⁵⁰kamnyar shanga ɗa ku wutə ni ka thlivəra ka duna. Təng təkəma tsa gari ala ɗa ka pəla, “Peri gir hangkala giri! Iya! Giri aɗiya thlivər wa!”

⁵¹Antə tsa ləkwa shar ni adzə ɗa, antə shambar ni thləthlata. Antə da ndatədzi ka duna,

⁵²kamnyar da aɗi nggaɓəla karapur ndlantə mji dəpu ntəfu nda wa, təng tə kəra ɗa ɓəɓal ni.

⁵³Sakatə da ləɓəla aɓəla bwanda manda ni, ka səɓəla akwa shar ni akwa tsəɗi Jannisaret, antə da mbwi shar ni ata mnya manda ni.

⁵⁴Səɓəlar ɗa akwa shar ni, təng təkəma mji nggaɓəla abbər azha Yesu.

⁵⁵Antə da hwi mwari akwa shanga kauyayeri na kalaktə ɗa, akwa sənta alari mjir ɗa na nggawa nggawa ata sərpəyayeri, akwa kəlara vəi tə da nggata abbər Yesu ata.

⁵⁶Tsuwa kəlara vəi tə Yesu ku mwari ata, wala akwa kauyayeri, wala akwa bərniyayeri, wala na ata hildiyayeri, da ana pwi mji na nggawa ni akwa vəi kasəku, ka kiɗə Yesu abbər ka da tsəkwar wala mnya ləptərni. Tsuwa shanga mji na ku tsəkwar ni ku mbantədzi.