Read bura-pabir Markus 7 Bible Online

Markus 7 - bura-pabir bible

Markus 7

¹Antə mjir Farisi ka maləmayeri laga na ana thlipə tsawur Musa ku thlata ahar Urushalima ka si adzə Yesu.

²Antə da wutə bwadukwa mjirthlipər Yesu akwa səm susəma ka tsiya ɗa ka diɗi, watau da aɗi kəcimta tsiya ɗa wa.

³Kamnyar mjir Farisi, ka shanga mjir Yahudi aɗi ana səm susəma kula da kəcimta tsiya ɗa wa. Da ana nu su tə kəkayeri arɗa thlipa ala ɗa.

⁴Tsuwa kəlara sakatə da ku thlata akwa kasəku, da aɗi ana səm su wa, tar ma da ku kəcimta kərɗa katagu. Tsuwa surharar kəkayeri arɗa aɗi hang damwa tə da ana nuwa, apa kəcimta kapayeri, ka tughumayeri, ka samtalayeri ar əmza.

⁵Kamnyar ngəni antə mjir Farisi kəga maləmayeri ar thlipə tsawur Musa ni yu Yesu abbər, “Kamnyar mi tə mjirthlipər nga aɗi ana nu surthlipər kəkayeri ar mburu wa ri? Kamnyar da ana səm su kula da kəcimta tsiya ɗa!”

⁶Antə tsa pəla ala ɗa, “Giri an mji na shimnya! Kalkal tə Ishaya hara naɓikur ata kəra giri ni. Apatə mdə rəbuta abbər, “ ‘Mji ngəni ana ni səli ata mnya ɗa ndzang, amma ɗəffa ɗa ciju ka iya.

⁷Da ana vəngkər səli ali gapani, ka thlipə tsawur mji aka mji abbər da akwa thlipə ndərər Hyel.’ ”

⁸“Giri ana zhar tsawur Hyel ka ɓəla surthlipayeri ar mji.”

⁹Antə tsa pəla ala ɗa, “Giri ɗəɗu abwar səndə lakur nggəlar Tsawur Hyel kamnyar ka giri kəsi surharar giri.

¹⁰Kamnyar Musa pəla, ‘Ka gə nar olkur aka baba' nga, ka mama' nga,’ tsuwa ‘Kəlara mdə na ku nggəl baba'ni wala mama'ni, mda ata tsi ni.’

¹¹Amma giri ana zhar mdə na zhar ta wul baba'ni wala mama'ni akwa sakatə da akwa tura, na pəla, ‘Shanga su tə kalkal ka giri wuta akəli ni I ku kurtə hamta aka Hyel.’

¹²Apani giri aɗi akwa psi laku alari ka tsa dlar baba'ni wala mama'ni kəra wa.

¹³Apani atar surharar giri tə giri ana thlipa aka mji ni, giri akwa hilantə ndərər Hyel. Tsuwa jili suayeri ngəni hang tə giri ana hara.”

¹⁴Antə Yesu jaktə kəgatə dlamar mji ka pəla ala ɗa, “Psi gir thləma giri ali, shanga giri, ka giri nggaɓəla su.

¹⁵Su aɗi na thlata aɓəla ka ləkwa kuta mda na ata mzhi namtə mdə ni adiya wa, tar su na ana səɓəla akwa mnya mda andər namtə mdə adiya.

¹⁶Mdə na ka thləm ar nggatə ka tsa nggata.”

¹⁷Sakatə tsa ku təra kazhar dlamar mji ka ləvəi akwa kutakəi, antə mjirthlipərni yu ni ka tsa ngkərɓəla ala ɗa karapur ndər ngəni.

¹⁸Antə tsa pəla ala ɗa, “Azha giri aɗi nggaɓəla tsu əng? Giri aɗi nggaɓəla wa ya abbər su aɗi na ata thlata aɓəla ka ləkwa kuta mda na ata mzhi namtə ni ni adiya wa?

¹⁹Kamnyar su ni aɗi ana ləkwa ɗəffari wa, amma akwa kutari, ka sə ləɓəla akwa dzari.” Ngəni akwa ncanta abbər susəma aɗi na adiya wa.

²⁰Antə tsa jaktə pəla, “Su na ana səɓəla akwa ɗəffa mda andər namtə mdə adiya.

²¹Kamnyar akwa ɗəffa mda antə dzamayeri na ɗimi ɗimi ana səɓəla, apa karwakur, ka həla, ka tsi mda, ka ləka,

²²ka nggukə sur mda, ka kəmanggarkur, ka pwaktə mda, ka adiyakur akwa daɓwa sal ka mwala, ka səlka, ka ɗəffər olkur, ka səlka, ka hilantə thləma mda, ka gaya, ka tsuwa cakukur.

²³Shanga suayeri ngəni ɗimi ɗimi ni ana thlata akwa ɗəffa mda, antə da andər namtə mdə adiya ni.”

²⁴Antə Yesu ku təra kazhar vəi nda, ka mwari akwa bwar Taya ka Sidon. Antə tsa ləvəi akwa kəi laga, amma tsa aɗi bara ka mdə sənda abbər tsa anda wa. Amma wala apani tsa aɗi mzhi ɗuwardzi wa.

²⁵Təkəma tə mwala laga na ka ngkwarni raka ka shatan akwa dzari, nggata ata kəra Yesu, antə tsa si ka ndla akəmari.

²⁶Tsuwa mwala ngəni ngkwar Helleni. Mdə yaɓəla ni akwa tsəɗiyir Finikiya akwa Siriya. Antə tsa kiɗə Yesu abbər ka tsa kədləɓəla shatan na akwa dza ngkwarni ni.

²⁷Antə Yesu pəla alari, “Ndzi ka maɗankyar ndli katagu. Kamnyar aɗi kalkal ka mdə kətə susəmər maɗankyar ka psəmta aka kilayeri wa.”

²⁸Antə mwala ni pəla, “Jiri kam, Mthlaku! Amma wala kilayeri na akira tebər ana səm susəma na ku təgəri akəla maɗankyar.”

²⁹Antə Yesu pəla alari, “Kamnyar gari ngəni tə gə pəla ni, ga ata mzhi ngka avi, shatan ni ku ləɓəla akwa dza ngkwar ngə ni.”

³⁰Antə mwala ni təra ləha, ka wutə ngkwar ni apəpəi ata vəi pi, shatan ni ku təra.

³¹Antə Yesu ku ləɓəla kazhar tsəɗiyir Taya, ka təra akwa tsəɗiyir Sidon, ka diyayeri na kuma tə mda ana kəga Dikapolis, ka mwari adzə Manda Galili.

³²Antə mji sənta alari mdə laga na twangtwang ka mnyari dləɓdləɓari, tə da kiɗə ni ka tsa vəngkər tsiyari alari, ka tsa mbantə ni.

³³Antə Yesu ku kəgamta ni kazhar nca mji, ka hau kuleng tsiyari akwa thləma mdə na twangtwang ni, ka tiftə mtili ata kulengari ka tsəkwar kyanggyara mdə na twangtwang ni kəgari.

³⁴Antə Yesu haptə ncari amtazi, ka mpikəmta mpika, ka pəla aka mdə ni, “Iffathla!” Watau “Kəlardzi!”

³⁵Təkəma təng thləma mdə ni kəlardzi, tsuwa su na mbwi kyanggyarari ni ku mpəlidzi. Antə tsa baɗitə mnya cau kula damitədzi.

³⁶Antə Yesu tsaktə mji abbər da aɗiya ngkər su ngəni aka wama wa. Amma kəlara sakatə tsa akwa ngkatə ɗa, da ana vəri vəri titil labar ni.

³⁷Antə mji ku ndatədzi ka duna, akwa pəla, “Tsa ku hara shanga su kalkal! Har tsa namtə mji na twangtwang ka da nggatə su, ka mji na ka mnya ɗa dləɓdləɓari ka mzhi mnya!”