Read bura-pabir Markus 8 Bible Online

Markus 8 - bura-pabir bible

Markus 8

¹Tsu akwa kuta virayeri nda, antə mji jaktə tsaptədzi dlama dlama adzə Yesu. Tsuwa da aɗi ka susəma tə ka da səm wa. Antə Yesu kəgatə mjirthlipərni ka pəla ala ɗa,

²“Mji ngəni akwa hara kətadzə ra, kamnyar ashina vira ɗa makər adzə ra, kula su tə ka da səma.

³Ma I salamtə ɗa ka mi ni ka da ləha, nuhum da asə thləvamtadzi ata laku, kamnyar bwadukwa ɗa thlata akwa vəi na ciju ka si.”

⁴Antə mjirthlipərni pəla alari, “Ka, akwa mtaku ngəni, ama antə mburu ata mzhi wutə susəma na ata mzhi ndlantə mji ngəni dlama dlama nə ri?”

⁵Antə Yesu pəla ala ɗa, “Kər buradi yiɗau an akəla giri ri?” Antə da pəla, “Murfa.”

⁶Antə tsa pəla aka mji na dlama dlama ni ka da ndzəndzi ata di. Antə tsa kətə kər buradi na murfə ni, ka usar Hyel, ka ɓəgəlwa, ka hamta aka mjirthlipərni. Antə mjirthlipərni ndəkəmta aka dlamar mji ni.

⁷Tsuwa da ka maɗa' kəlfa yiɗauwa. Sakatə tsa usar Hyel ata kəra kəlfayeri ni, ka pəla aka mjirthlipərni ka da ndəkəmta aka mji tsuwa.

⁸Antə shanga ɗa ku səma ka ndli, antə mjirthlipərni tsaptə na ɓushirəmtadzi, har ka nghyantə thlambəl murfa.

⁹Tsuwa hangkur mji na səm susəm ni ku mwanta apa mji shili dəpu nfwar. Antə tsa ku salamtə ɗa.

¹⁰Aghəla nda təkəma antə tsa ləkwa shar ni ata kəma duku kəga mjirthlipərni, ka mwari akwa tsəɗi Dalmanuthla.

¹¹Antə mjir Farisi laga si adzə Yesu, ka baɗitə beɗi kəga tsa. Da akwa bara ka da ngkərtə ni, antə da pəla ka tsa ncanta ala ɗa sur ndatə na ata thlata amtazi.

¹²Antə Yesu mpikəmta mpika ka duna, ka pəla, “Kamnyar mi tə mji na akwa zaman ngəni ana bara sur ndatə ri? I akwa pəla ala giri jirkur, seɗa aɗi tə mda ata harari aka mjir zaman ngəni wa!”

¹³Antə tsa ku zhar ɗa, ka jaktə ləkwa shar ni, ka təra mwari aɓəla bwanda manda ni.

¹⁴Akwa saka ngəni mjirthlipərni aɗi ɗangtə si ka buradi wa, təng kər buradi duku daci an akəla ɗa akwa shar ni.

¹⁵Antə Yesu tsaktə ɗa abbər, “Ka giri hara hangkal, ka giri ngga ngga yistər mjir Farisi ka ar Hirudus ni.”

¹⁶Antə da gari akwa daɓwa ɗa abbər, “Sakani kamnyar tə mburu aɗi ka buradi wa ni ya?”

¹⁷Amma Yesu ku səndə su tə da akwa pəlari, antə tsa pəla ala ɗa, “Kamnyar mi tə giri akwa gari abbər giri aɗi ka buradi wa nə ri? Ba kulini giri aɗi wulɓəla wala nggaɓəla wa ya? Nənga ɗəffa giri an hara ɓəɓal kamtə ri?

¹⁸I ana wuta apa giri ka nca, ka kamnyar mi tə giri aɗi akwa wutə su wa ri? Tsuwa I ana wuta apa giri ka thləm, ka kamnyar mi tə giri aɗi akwa nggatə su wa ri? Tsuwa kamnyar mi tə giri amzhi ɗangtə su wa ri?

¹⁹Sakatə I ɓəgəlwa buradi na ntəfu nda aka dəpu ntəfu ni, thlambəl yiɗau tə giri nghyantə ka na ɓushirəmtadzi nə ri?” Antə da pəla alari, “Kumnya suɗa.”

²⁰“Tsuwa sakatə I ɓəgəlwa kər buradi murfa aka mji dəpu nfwar ni, thlambəl yiɗau antə giri nghyantə ka na ɓushirəmtadzi nə ri?” Antə da pəla alari, “Murfa.”

²¹Antə tsa pəla ala ɗa, “Har ba kulini giri aɗi nggaɓəla wa ya?”

²²Sakatə da si ahar Bethsaida, antə mji laga səntə mdlyang laga aka Yesu, ka kiɗə ni abbər ka tsa tsəkwar mdə na mdlyang ni.

²³Antə Yesu kəsi tsiya mdə na mdlyang ni, ka mwantə ni aɓəla ata hil di, ka tiftə mtili ata nca mdlyang ni, ka vəngkər tsiyari ata kərari, ka yu ni abbər, “Ga ata mzhi wutə su ya?”

²⁴Antə mdə na mdlyang ni haptə ncari amta ka pəla, “I, I akwa wul mji akwa mwa, amma da dludzi ka nfwayeri.”

²⁵Antə Yesu jaktə vəngkər tsiyari aka nca mdə na mdlyang ni, antə mdə ni ɗəmbəla ncari akwa wul su njingnga, antə ncari ngka lapiya apa na hwatu, tə tsa ləkwa wutə shanga su yur.

²⁶Antə Yesu ku salamtə mdə ni ka tsa ngka avi aharngkiɗa, ka pəla alari, “Wala kuta di ni, ga aɗiya ləkwa wa.”

²⁷Antə Yesu ka mjirthlipərni ku ləkəma ka mwari akwa kauyayeri na kalaktə Kaisariya Fəlippi. Ata laku ni antə Yesu yu mjirthlipərni abbər, “Mji ana pəla I an wa ri?”

²⁸Antə da pəla alari, “Mji laga ana pəla abbər ga an Yahwana na Mdər hara Baptizma, mji laga ana pəla, Iliya, mji laga tsuwa ana pəla, ga an pal akwa nca naɓiyayeri.”

²⁹Antə tsa yu da, “Amma ar giri, giri ana pəla I an wa ri?” Antə Bitrəs shinau ka pəla, “Ga an Kristi.”

³⁰Antə Yesu tsaktə ɗa abbər da aɗiya pəla su ata kərari aka wama wa.

³¹Antə Yesu baɗitə ngkər ala ɗa abbər dwali ka Ɓzər Mdə ɗar bwaniyir suayeri hang, ka mji na ol'ola, ka pristayeri na ol'ola, ka maləmayeri ar thlipə tsawur Musa, sə nggəlar ni, har ka da tsi ni. Amma aghəla vir makər tsa ata jaktə thlata.

³²Tsa pəla gari ngəni ni ata bəbal. Antə Bitrəs ndəkərəmta ni ata tenga ka baɗitə mpa alari ata kəra su ngəni.

³³Amma Yesu shinardzi ka wulhə mjirthlipərni, ka mpa aka Bitrəs abbər, “Tərardzi kazhar ra, Shatan ragai! Kamnyar ga akwa dzama apa mda, ga aɗi akwa dzama apa Hyel wa.”

³⁴Antə tsa tsaptə mji dlama dlama adzə ni ata kəma duku kəga mjirthlipərni, ka pəla ala ɗa, “Kəlara mdə na ata bara nu ra, tar ka tsa nggəlar kərni, ka tsa kətə udzəm kadləkadla arni, ka tsa nu ra.

³⁵Kamnyar kəlara mdə na akwa bara mbantə mpikari, mpikari ata sha. Amma kəlara mdə na akwa shamta mpikari kamnyar na, ka kamnyar labar na msəra, tsa ata mbantə mpikari.

³⁶Kamnyar man ampaniyari ri, ma mda ata ndzi mthlakər shanga duniya ni, amma tsa ata ni ka mpikari?

³⁷Wala tsuwa man tə mda ata mzhi paltari ka mpikari ri?

³⁸Kamnyar kəlara mdə na ata səli kamnyar na, ka kamnyar ndərərna akwa zaman ngəni na ar ləka ka ar biku ni, Ɓzər Mdə tsuwa ata sə səli hara seɗa ata kərari, sakatə tsa ata si akwa səliyir Təddarni kəga mjirthlentərhyel na Ɓɗakkarkara.”