Read bura-pabir Luka 12 Bible Online

Luka 12 - bura-pabir bible

Luka 12

¹Sakatə mji dəpu dəpu ku tsaptədzi, har tə da akwa ntsəntsartə səla nvwa ɗa, antə Yesu baɗitə gari na ntangkəmari aka mjirthlipərni abbər, “Ka giri hara hangkal ka yistər mjir Farisi, watau shimnyakurər ɗa ni.

²Kamnyar su aɗi na harharari na kula ata sə kəlardzi wa, wala na ɗuwarɗuwarari na kula mda ata sə səndari wa.

³Apani kəlara su tə giri ku pəla akwa kuthlu, mda ata sə nggatari akwa parakəu, tsuwa su tə giri ku cicuhta aka nvwa giri akwa ambwa, mda ata sə psəmnyari ata kəra mbwayeri.”

⁴“I akwa pəla ala giri, giri na pazhirna, giri aɗiya thlivər mji na ana tsi dza mda, amma aghəla nda su aɗi tə da ata mzhi jaktə harari kəra wa ni wa.

⁵Amma I akwa pəla ala giri mdə tə ka giri thlivər ni. Ka giri thlivər Hyel natə aghəla tə tsa ku tsi dza, tsa ka dunar ndzəhəuwa mda akwa u'u. Jiri, tsa antə ka giri thlivər ni!

⁶“Mda aɗi ana ɗələmta addər ntəfu ata kəra kwaba suɗə wa ya? Amma wala apani aɗi wala pal akwa nca ɗa tə Hyel ana fwari ata kərari wa.

⁷Ar giri har shishir kəra giri ma mdə ku jikatə ɗa shang. Antə apani giri aɗiya thlivər wa, kamnyar darajar giri ku təramta addərayeri na hang ni.”

⁸“I akwa pəla ala giri abbər, kəlara mdə na ata haptə səliyirna akəma mji, Ɓzər Mda ata haptə səliyirni akəma mjirthlentərhyel na ar Hyel.

⁹Amma kəlara mdə na ata nggəlar ra akəma mji, Ɓzər Mda ata nggəlar ni akəma mjirthlentərhyel na ar Hyel.

¹⁰“Tsuwa kəlara mdə na ata pəla su na ɗimi ata kəra Ɓzər Mda, mda ata tifəmta alari, amma kəlara mdə na ata pəla su na ɗimi ata kəra Mambəl na Ɓɗakkarkara, mda aɗi ata tifəmta alari wa.

¹¹“Ma sakatə mdə səntə giri akwa mbwar vəngkər səli, ka akəma kuthlyayeri kəga mji na ka tsawa akwa tsiya ɗa, giri aɗiya damitədzi ata kəra laku tə ka giri msərantə kər giri akwa wa, wala su tə ka giri pəla wa.

¹²Kamnyar Mambəl na Ɓɗakkarkara ata thlipa ala giri su tə ka giri pəla akwa saka na ndaga.”

¹³Antə mdə laga akwa nca dlamar mji ni pəla aka Yesu abbər, “Maləm ka gə pəla aka ɓzərma'na ka tsa ndəkəi ala yeru kifa natə baba' yeru mtə ka zhar ala yeru.”

¹⁴Amma Yesu pəla alari, “Mdə ragai, wan vəi ra alkali, wala mdər ndəkəi ala giri su ngəni ri?”

¹⁵Antə tsa ləkəma ka pəla, “Ka giri hara hangkal, ka giri ɓəlatə kəra giri ta shanga mbulamkur, kamnyar aɗi hangkurər su an mpikə ni wa!”

¹⁶Antə Yesu ku ngkər ala ɗa karapu ngəni abbər, “Mdər gəna laga aɗi natə fakərni ku ya ka duna.

¹⁷Antə tsa baɗitə dzama akwa ɗəffari abbər, ‘I aɗi ka vəi tə kəi pwi shanga sur fakər na akwa wa, man tə kəi hara ri?’

¹⁸Antə tsa pəla, ‘Nggədza su tə I ata harari, I ata pukthləmta shanga biyayeri arna, kəi həntə na ol'olari, kəi pu mthlir na ni akwa, ka shanga surna na mbila.

¹⁹Tsuwa I ata pəla aka ɗəffi abbər, “Ai kulini kam, gə ka su hang apwi tə ga ata səmari məva ka məvangkər! Antə ndzəndzi ka gə ghərəmtaghəra. Səm su, ka gə sangkər, kara nggatə msərakur.” ’

²⁰Amma Hyel pəla alari, ‘Caku ragai! Tsu ashina aviri ni, antə mda ata dlu mpika ga. Antə suayeri ngəni shang tə gə ɗəmhə ni, ata sə ndzi aka wa ri?’

²¹“Ata ndzi tsu apani aka kəlara mdə na ata vəi gəna aka kərari, amma tsa aɗi ka gəna na abwar Hyel wa.”

²²Antə Yesu pəla aka mjirthlipərni abbər, “Apani I akwa pəla ala giri, giri aɗiya damitədzi ata kəra mpika giri wa, wala ata kəra susəma tə giri ata səmari, wala ləptu tə giri ata hadza aka dza giri wa.

²³Kamnyar mpika ku təramta susəma, tsuwa dza ku təramta ləptu.

²⁴Dzama giri ata kəra zəlakayeri bu! Ai da aɗi ana thləka wa, wala nthləi mthli wa, tsuwa da aɗi ka mbwar pwi su wala bi wa. Amma wala apani Hyel ana ndlantə ɗa. To, ai giri ku təramta ɗikayeri ni ka səli ka bwa hang!

²⁵Tsuwa wan akwa nca giri tə damitədzərni ata mzhi jaka alari awur pal aka ndzəndziyir mpikari ri?

²⁶Kamnyar ma giri aɗi mzhi hara kanaɗi ata kəra su na raka wa, kamnyar mi antə giri akwa damitədzi ata kəra suayeri na damwa ri?

²⁷Dzama giri ata kəra laku tə pukdlayeri ana kəla akwa mtaku bu! Da aɗi ana kəthlər wa, wala shi puwa wa. Amma wala apani I akwa pəla ala giri abbər, wala Kuthli Solaman ka shanga olkur tə tsa kəgari aɗi ɗar dəɓatədzi apa pal akwa nca pukdlayeri ngəni wa.

²⁸Antə ma Hyel ana dəɓatə kusar na akwa mtaku apani, natə ashina tsa ka mpika, ɗəpa mda ata psu akwa vir u'u, tsa aɗi ata hadza ala giri su na təramta ngəni wa ya? Hamta jirər giri an raka!

²⁹“Apani giri aɗiya dzama ata kəra su tə giri ata səmari wala sari wa. Giri aɗiya damitədzi ata kər wa.

³⁰Kamnyar mji na asəndə Hyel wa ana pakə shanga suayeri ngəni, tsuwa Təddar giri na amtazi ku sənda abbər giri akwa tur shanga suayeri ngəni.

³¹Amma ka giri bara kuthlikur ar Hyel antə mda ata sə hamta shanga suayeri ngəni ala giri.”

³²“Giri aɗiya thlivər wa, giri ciɓə na raka, kamnyar Təddar giri akwa nggatə msərakur na ala giri kuthlikurərni.

³³Ka giri ɗələmta shanga su tə giri kəgari ka giri hamta kwabari aka mjir bwani. Ka giri namtə thləvur kəs kwaba na aɗi ata hal wa aka kəra giri, watau ka giri pwi gəna aka kəra giri akwa vəi na ata hal wa amtazi, vəi tə həla amzhi həltari wa, tsuwa ləma amzhi hilantari wa.

³⁴Kamnyar vəi tə gənar nga ata, antə ɗəffa ga ata ndzi anda tsuwa.”

³⁵“Ka giri ndzi ɗəmhəɗəmhari kamnyar kəlara su na ata si, ka giri ndzi ka kariyir giri hahari kamnyar hara kəthlər, ka u'u akwa pitəlayeri ar giri.

³⁶Ka giri ndzi tsu apa mafayeri na ata sək kəra mdərkəi ɗa akwa vəi kəldzi, kamnyar ka da kəlar alari nyarmbwa taktar kəlara sakatə tsa ku si ka tsarari.

³⁷Mafayeri na ndaga an ka barka natə mdərkəi ɗa ata sə wutə ɗa ɗəmhəɗəmhari ata wula sakatə tsa ku si. Jiri I akwa pəla ala giri, tsa ata mbwadzi, ka pəla ala ɗa ka da ndzəndzi akwa vəi səm susəma kəga tsa, antə tsa ata si ka hamta ala ɗa susəma.

³⁸Ar mafayeri ndaga da ka sa'a. Kamnyar wala ma tsa an si kərathlər viri, wala ɗəɗəpə mbing akwa, tsa ata wutə ɗa ɗəmhəɗəmhari.

³⁹Amma ka giri sənda abbər, ma mthlakər kəi an səndə sakatə həla ata sə si aharngkiɗa, tsa ɗi ata heni wa, kamnyar tsa aɗi ata zhar ka həl ni ɓələmta kəyirni ka ləvəi wa.

⁴⁰Antə apani, tar ka giri ndzi ɗəmhəɗəmhari tsuwa, kamnyar Ɓzər Mda ata sə si akwa sakatə giri aɗi tamatə wa.”

⁴¹Antə Bitrəs pəla, “Mthlaku, ga ata ngkər karapu ngəni ala yeru nənga, aka shanga mji ri?”

⁴²Antə Mthlaku pəla, “Wan mafa na ka jirkur ka ɗəɗukur ri? Tsa an mdə natə mdərkəyirni ata vəngkər ni ata kəra kutakəyirni, ka tsuwa ka tsa hamta susəma aka mambila mafayeri arni akwa sakari.

⁴³Msəra aka mafa ndaga, natə ma sakatə mthlakərni ku si, tsa ata wutə ni ata kəra kəthlər.

⁴⁴I akwa pəla ala giri jirkur, mdə ni ata vəngkər mafa ndaga ata kəra shanga su tə tsa kəgari.

⁴⁵Amma tsa an mafa na ɗimi, na ata pəla akwa ɗəffari abbər ‘Mdərkəyirna aɗi akwa si mbwaɗi wa,’ tə tsa baɗitə dlaɓu mafayeri shili kəga mwanki, ka səm ka sa har ka ləkwa wika,

⁴⁶to, mdərkəyir mafa ngəni ata sə si akwa vir tə tsa aɗi tamatə wa, ka akwa sakatə tsa aɗi səndə wa. Antə mdərkəyirni ni ata dlaɓu ni ɗimi ɗimi, ka paktə ni kəga mji na kula jirkur.

⁴⁷“Mafa na ku səndə su tə mthlakərni hir ka tsa hara, amma tsa aɗi ɗəmhə kərni ka hara wa, antə mda ata sə dəkə ni na mwavərari.

⁴⁸Amma mafa na aɗi səndə su tə mthlakərni ku hir ka tsa hara wa, amma tsu tsa ku hara su na ku mzhi dəka, antə mda ata sə dəkə ni raka. Kamnyar kəlara mdə tə mdə ku hamta alari su hang, mda ata sə bara su hang akəlari. Antə mdə tə mji ku hamta alari su hang, da ata sə bara su hang akəlari tsuwa.”

⁴⁹“I si kamnyar kəi hangkər u'u aka duniya, tsuwa I ku hir kəi wuta abbər tsa akwa mba kasha!

⁵⁰I ka baptizma na mwavər tə mda ata hara ali, tsuwa hangkali ku dzatədzi ka duna akwa səkari, har tar ma mdə ku kuri ali!

⁵¹Giri tamata abbər I si kamnyar kəi səntə msərakur akwa duniya ya? Awa, aɗi msərakur wa, amma ndəkəmtadzi.

⁵²Kamnyar akəmazi mji ntəfu akwa kəi duku ata sə ndəkəmtadzi, mji na makər ata sə ndzi dawa ka mji na suɗa, antə mji na suɗə ni ata ndzi dawa ka mji na makər ni tsuwa.

⁵³Da ata sə ndəkəmtadzi, ka mdə sal ndzi dawa ka ɓzərni, antə ɓzər ni ata ndzi dawa ka baba'ni tsuwa. Mwala ata sə ndzi dawa ka ngkwarni, antə ɓzərngkwa ata ndzi dawa ka mama'ni tsuwa. Mama' sal ata sə ndzi dawa ka mwala ɓzərni, antə mwala ɓzər ata ndzi dawa ka mama' salngkiɗa tsuwa.”

⁵⁴Antə Yesu jaktə pəla aka dlamar mji abbər, “Kəlara sakatə giri ku wutə dlamba akwa səɓəla abwar ramta, giri ana pəla yimi ata si, antə ana hara apani jiri.

⁵⁵Tsuwa ma giri ku wutə shambar akwa fya akwa səɓəla bwar anəm, giri ana pəla ‘Ashina pci ata mbəla.’ Tsuwa ana ndzi apani jiri.

⁵⁶Giri shimnya! Giri ana mzhi wul mwar su na akwa duniya ka na ata kutahyel ka ngkərɓəla su na ata hara, amma giri amzhi ngkərɓəla seɗar zaman ngəni wa.”

⁵⁷“Kamnyar mi tə giri ka kəra giri aɗi ana mzhi dzama ka nggaɓəla su na kalkal wa ri?

⁵⁸Ma mdə laga ku burkatə nga akwa shariya, ka gə vu duna ga ka giri shwalatədzi ka tsa tsu ata laku, ta tsa amwanta adzə alkali. Antə alkali ni tsuwa ata ha nga aka dakwali, ka dakwali ni hambwa nga akwa pərsəna.

⁵⁹I akwa pəla ala ga, ga aɗi ata səɓəla anda wa, tar ma ga ku ntəmta shanga su tə mda akwa nu nga, wala kwaba duku aɗi ata mbiləmta wa.”