Read bura-pabir Luka 13 Bible Online

Luka 13 - bura-pabir bible

Luka 13

¹Ata saka nda, mji laga aɗi anda na pəla aka Yesu ata kəra mjir Galili natə Bilatus vu tə mdə tsəgəi ɗa akwa sakar hamta saɗaka nda.

²Antə Yesu ku shinau ala ɗa ka pəla, “Giri akwa tamata abbər bikər mjir Galili natə mdə tsəgəi akwa laku ngəni ni, ku təramta bikər shanga mjir Galili na mbili ni ya?

³Awa, hun wa! Tsuwa I akwa pəla ala giri abbər ma giri aɗi tubi ka zhar bikayeri ar giri wa, shanga giri ata kurəmtadzi tsu apa da.

⁴Nənga giri ana wuta apa mji kumnya ncisu tə mbwa na nal na ahar Silowam ndlangkərdzi ala ɗa ka kurəmta ɗa ni, da an mji na ɗimi ta shang akwa Urushalima ya?

⁵Awa, hun wa. Tsuwa I akwa pəla ala giri abbər ma giri aɗi tubi ka zhar bikayeri ar giri wa, shanga giri ata kurəmtadzi tsu apa da.”

⁶Antə Yesu ku ngkər ala ɗa karapu ngəni ka pəla, “Mdə laga aɗi na ka nfur kamnda akwa fakər anap arni. Təng vir laga tsa mwari abbər ka tsa ɗəmtsə yar kamndə ni, amma sakatə mwari tsa aɗi wutə ya ata wa.

⁷Antə tsa pəla aka mdər wul fakə ni, ‘Wul diya kulini məva makər I akwa si akwa bara kamnda ata nfu ni, amma I aɗi ana wutə su ata wa. Antə I ata nthləmta ni! Kamnyar mi tə tsa akwa ngkata ali vəi kula suari aɗi ri?’ ”

⁸“Amma mdər wul fakə ni shinau alari ka pəla, ‘Zanuwa, jaktə zhar ni ka pal avana, kəi latə vəi na kalaktə ni ni ka pudza alari kuɓa.

⁹Antə ma tsa ku ya apta, shanga su ata ndzi lapiya. Amma ma shang tsa aɗi ya wa, ga amzhi nthləmta ni.’ ”

¹⁰Vir Ghərəmtaghəra laga Yesu akwa thlipa akwa mbwar vəngkər səli,

¹¹antə tsa wutə mwala laga anda natə shatan hara ala nggawakur tə dzari ndzi apa mtəmtari har məva kumnya ncisu. Shilku ni takurtə mwala ni tə hilari ndzi ɗukɗukwari, har tə tsa amzhi thlentədzi dwaɗu kəra wa.

¹²Sakatə Yesu ku wutə ni, antə tsa ku kəga ni ka pəla alari, “Mwala, ga ku msərantədzi ta bwaniyir ngə ni!”

¹³Antə tsa ku vəngkər tsiyari alari, təkəma antə tsa thlentədzi dwaɗu ka ləkwa hu Hyel.

¹⁴Amma ɗəffa olər mbwar vəngkər səliyir mjir Yahudi ni ku ɓzi, kamnyar tə Yesu mbantə mwala ni akwa Vir Ghərəmtaghəra. Antə tsa pəla aka mji abbər, “Vir ngkwa aɗi natə kalkal ka mdə kəthlər akwa. Ka giri si akwa virayeri ngəni kamnyar ka giri wutə mbantədzi, amma aɗi Vir Ghərəmtaghəra wa.”

¹⁵Antə Mthlaku pəla alari, “Giri shimnya! Wan akwa nca giri na aɗi ana mpəli thlarni wala kwararni ata səkwam Vir Ghərəmtaghəra, ka mwantə ni akwa thlyagha kamnyar ka tsa sa yimi wa ri?

¹⁶Antə aɗi kalkal ka mdə msərantə mwala ngəni akwa bwaniyirni Vir Ghərəmtaghəra wa ya, mwala na akwa durər Ibrahim, natə Shatan ku mbwi ni har məva kumnya ncisu ni?”

¹⁷Antə gari ngəni tə tsa pəla ni vu tə shanga dawayeri arni ləkwa səli. Amma shanga mambila mji ku hara kucali ata kəra shanga surndatayeri tə tsa hara ni.

¹⁸Antə Yesu pəla, “Kuthlikurər Hyel ni dludzi ka mə ri? Ka mi antə I ata gira nə ri?

¹⁹Tsa ndzi tsu apa hwulfər munya mastad tə mdə laga kətə ka ra thləkamtari akwa fakərni. Antə tsa ku kəla ka hara nfwa, har tə ɗikayeri ku si ka pwa tsiyayerari.”

²⁰Antə Yesu jaktə pəla, “Ka mi antə I ata mzhi gira kuthlikurər Hyel nə ri?

²¹Tsa ndzi tsu apa yist natə mwala laga kətə ka hərtə ka mpwa ar tasa makər, har tə yist ni ndlətə shanga mpu na hərhərari ni.”

²²Sakatə Yesu ku tamtə lakur mwari ahar Urushalima, antə tsa nutə bərniyayeri kəga kauyayeri akwa thlipa aka mji.

²³Antə mdə laga yu ni abbər, “Mthlaku təng mji laga daci an ata sə wutə mbantədzi ni ya?” Yesu pəla ala ɗa,

²⁴“Mbalɓəla girdzi ka giri ləmbwa ata nyarmbwa na cinggəthlu. Kamnyar I akwa pəla ala giri, mji hang akwa mwaɓə ka da ləmbwa, amma da aɗi ata mzhari wa.

²⁵Ma sakatə mthlakər kəi ku thlatə ka hartə nyarmbwa ni, wala giri an thləthlata aɓəla akwa tsarar nyarmbwa akwa pəla, ‘Mdərkəi, kəlar ala yeru nyarmbwa ni,’ tsa ata pəla ala giri, ‘I aɗi səndə vəi tə giri thlata akwa wa.’

²⁶Sakanda antə giri ata pəla alari, ‘Diya mburu ku səma ka sa ata vəi duku kəga ga, tsuwa ga ku thlipa akwa kauyayeri ar yeru!’

²⁷Amma tsa ata shinau ka pəla, ‘I aɗi səndə giri wa, wala vəi tə giri thlata akwa wa. Tərar girdzi kazhar ra, shanga giri na mjir hara ɗimikur!’

²⁸Anda antə giri ata tuwa ka ɓɗə thlir, kamnyar giri ata s wutə Ibrahim, ka Ishaku, ka Yakub, ka shanga naɓiyayeri ni akwa kuthlikurər Hyel, amma ar giri mda ata puɓəla giri aɓəla!

²⁹Mji ata sə thlata abwar raghəi ka bwar ramta, ka abwar yala ka bwar, anəm ka si kamnyar səm susəma akwa kuthlikurər Hyel.

³⁰Sakanda mji na aghəli kulini ata sə ndzi na ntangkəma, antə mji na ntangkəma kulini ata sə ndzi akwa tsikərari.”

³¹Tsu akwa sakanda, antə mjir Farisi laga si adzə Yesu ka pəla alari, “Təra ka zhar vəi ngəni, kamnyar Hirudus akwa bara tsi nga.”

³²Antə Yesu pəla ala ɗa, “Mwar giri, ka pəla aka pwagha na ndaga abbər, ‘I ata kədləɓəla shatanayeri ka kuri shilkayeri ashina ka ɗəpa, antə akwa vir na makərkur, I ata sə kuri kəthlərərna.’

³³Amma wala apani tar kəi ləkəma ka mwarna ashina ka ɗəpa ka appsara pwanda, kamnyar aɗi ndzi kalkal aka naɓi ka mdə tsi ni akwa vəi damwa wa, amma tar akwa Urushalima.

³⁴“Aiyi Urushalima, Urushalima! Mjir nga ku tsəgəi naɓiyayeri, ka ndzəndzəhtə mji tə Hyel thlentə ala giri! Ka yiɗau, antə I bara kəi tsaptə maɗa' nga apatə anggira mtəka ana tsaptə maɗa'ni akira ɓəɓəkari, amma giri aɗi hir wa ri!

³⁵Nggədza ja kulini mdə ku zhar ala giri mbwar Hyelər giri kula mda akwa. Tsuwa I akwa pəla ala giri, giri aɗi ata jaktə wutə ra kəra wa tar ma sakatə giri ku pəla, ‘Tsa ka barka mdə na ata si akwa thləma Mthlaku.’ ”