Read bura-pabir Luka 14 Bible Online

Luka 14 - bura-pabir bible

Luka 14

¹Vir laga akwa Vir Ghərəmtaghəra, antə Yesu mwari kamnyar səm susəma aviyar mdə laga na ola akwa nca mjir Farisi. Antə mji ləkwa putə nca ata tsa swaiswai.

²Təng təkəma mdə laga na ka səlari ka tsiyari fikfikari si adzə ni.

³Antə Yesu yu maləmayeri ar thlipə tsawur Musa ka mjir Farisi abbər ni, “Tsawur mburu ku hir ka mdə mbantə mdə Vir Ghərəmtaghəra ya, nənga tsa aɗi hir wa ri?”

⁴Amma da aɗi ndər wa. Antə Yesu tamtə mdə ni, ka mbantə ni, ka salamtə ni tə tsa təra.

⁵Antə tsa pəla ala ɗa, “Wan akwa nca giri, natə ma ɓzərni wala gyal thlarni ku tərkwa jiɓa Vir Ghərəmtaghəra, tsa aɗi ata hwihwi taktar ka tsa ra kəɓəla ni akwa jiɓə ni wa ri?”

⁶Amma da aɗi mzhi nar amsa ata kəra sur yu ngəni wa.

⁷Sakatə Yesu wuta abbər mji tə mdə kəgatə ni akwa carɓəla vəi ndzəndzi na ɓɗakɓɗaku, antə tsa ngkər ala ɗa karapu laga abbər,

⁸“Ma mdə ku kəga nga ka gə si akwa vəi kucalər kəldzi, ga aɗiya ndzəndzi akwa vəi ndzəndzi na ar mji ol'ol wa, kamnyar ta nuhum mdə ni ku kəga mdə damwa na ku təramta nga ka daraja.

⁹Kamnyar mdə na kəga japwa giri ni ata sə si ka pəla ala ga, ‘Thlata, ka gə nar vəi ndzəndzi aka mdə ngəni.’ Antə ata sə ndzi sur səli ala ga sakatə ga ata sə ləghəi ka ndzəndzi ata di ni.

¹⁰Amma ma mdə ku kəga nga akwa vəi kəldzi, ka gə mwari kara ndzəndzi ata di. Antə ma sakatə mdə na kəga ngə ni ku si, tsa ata pəla ala ga, ‘Pazhi, thlatə ka gə ndzəndzi ata kujara ngəni.’ Sakanda ga ata ndzi ka daraja akəma shanga mji tə mdə kəgata akwa vəi kucali ni.

¹¹Kamnyar kəlara mdə na ku haptə kərni, mda ata tərghəi ni. Tsuwa kəlara mdə na ku tərghəi kərari, mda ata haptə ni.”

¹²Antə Yesu pəla aka mdə na ku kəgatə ni ni abbər, “Ma sakatə ga ku kəga mda akwa səm susəma, wala akwa susəmər kucali na ola, ga aɗiya kəga pazhayeri ar nga, wala maɗama' nga, wala yangkura ga, wala ntəwulayeri ar nga na mjir gəna wa, ta da asə kəga nga ata vəyari, ka da ntəmta ala ga.

¹³Amma sakatə ga akwa hara kucalər kəldzi ka gə kəga mjir tura, ka mji na abdala, ka mji nggurdəkəi, kəga mji na mdlyang,

¹⁴antə ga ata ndzi ka barka, kamnyar da amzhi ntəmta ala gə wa. Hyel ata sə ntəmta ala ga akwa sakatə mji na pwa akwa thlata akwa mtəmta.”

¹⁵Sakatə pal akwa nca mji na andzəndzi akwa vəi səm susəm ni nggatə su ngəni, an tsa pəla aka Yesu abbər, “Da ka barka mji na ata sə səm susəma akwa kuthlikurər Hyel!”

¹⁶Amma Yesu pəla alari, “Mdə laga aɗi na ku ɗəmhə kucali na ola, ka kəgatə mji hang.

¹⁷Sakatə sakar kucali ni ku hara, antə tsa thlentə mafarni ka tsa pəla aka shanga mji tə mdə ku bara ɗa ni abbər, ‘Asəra giri, kamnyar mdə ku kuri ɗəmhə shanga su.’

¹⁸Amma shanga ɗa baɗitə səntə damitədzər ɗa. Mdə na ntangkəma pəla, ‘I haɗa mastə faku, tsuwa ku ndzi dwali ali kəi ra wulhari, antə kətə kanaɗi ali usa.’

¹⁹Antə mdə damwa pəla, ‘I haɗa mastə thlar tsuhwa garma ntəfu, antə ngəni I akwa lakur ra ngkərtə ɗa, antə kətə kanaɗi ali usa.’

²⁰Antə mdə damwa tsuwa pəla, ‘I haɗa kəl mwala, antə I aɗiya wutə lakur mwari wa.’

²¹“Antə mafa ni ku ngka ka jikata aka mdərkəyirni shanga su tə mdə pəla alari ni. Antə ɗəffa mdərkəyirni ni ku ɓzi ka duna, tə tsa pəla aka mafarni ni abbər, ‘Mwari taktar akwa lakwayeri na ol'ola kəga na raka raka akwa bərni ni, ka gə tsaptə mjir bwani, ka mji na nggurdəkəi, ka mji na mdlyang, ka mji na abdala, ka gə səntə ɗa azi.’

²²Antə mafa ni mwari ka ngka kula shamta saka, ka pəla aka mdərkəyirni, ‘Zanuwa, I ku kuri hara su tə gə pəla ni, amma ba kulini vəi ndzəndzi ku mbili.’

²³Antə mdə ni pəla aka mafarni ni, ‘Mwari akwa lambatayeri na ol'ola kəga na raka raka ata hildi, ka gə pəla aka mji ka da si, kamnyar ka kəyirna nghyi ka mji.

²⁴Kamnyar I akwa pəla ala giri, wala pal akwa nca mji natə mdə ku yu ɗa ntangkəma ni aɗi ata sə ɗar susəmərna wa!’ ”

²⁵Sakatə dlamar mji hang akwa mwa ata kəma duku kəga Yesu, antə tsa shinardzi ka pəla ala ɗa,

²⁶“Kəlara mdə na ata si adzə ra, amma tsa aɗi hir ra təramta laku tə tsa hir baba'ni, ka mama'ni, ka mwalankiɗa, ka maɗa'ni, ka maɗama'ni shili ka mwanki wa, har ma ka tsa nggəlar mpikari wa, tsa amzhi ndzi mdərthlipərna.

²⁷Tsuwa kəlara mdə na aɗi kətə udzəm kadləkadla arni ka nu ra wa, tsa amzhi ndzi mdərthlipərna wa.

²⁸“Kamnyar wan akwa nca giri antə ma tsa ata bara la mbwa na ola, antə tsa aɗi ata ndzəndzi ka dzama ata kəra hangkurər su tə tsa ata shamtari wa ri? Kamnyar ka tsa wuta abbər su na akəlari ni ata sə mzhi lata alari, wala nuhum liyar ni amzha kuri alari kəthlərari wa.

²⁹Kamnyar ma tsa aɗi hara apani wa, antə aghəla sakatə tsa ku kurtə nci səla mbwa ni, amma tsa aɗi mzhi kuriyari wa, antə shanga mji na ata wutari ata sə hara kyartəkur alari,

³⁰ka pəla, ‘Wuta, mdə ngəni ku baɗitə səla mbwa amma tsa aɗi mzhi kuri kərari wa!’

³¹Wala tsuwa ma kuthli laga ata kəɓa akwa dləra ka kuthli damwa, amma tsa ka sojayeri dəpu kuma, amma kuthli na damwa nda ka sojayeri dəpu sərkumari, antə na ntangkəma, tar ka tsa wuta abbər tsa ka sojayeri na ɓəɓal amzhi mpa ka kuthli na ndaga.

³²Amma ma tsa wuta abbər tsa amzhi wa, antə tsa ata thlentə mdərthlentərni adzə kuthli nda sakatə tsa tsu ciju, kamnyar ka tsa kiɗə lakur shwalatədzi ka tsa.

³³Tsu apani tsuwa kəlara mdə na aɗi ata mzhi nggəlar shanga su tə tsa kəgari wa, tsa aɗi ata mzhi ndzi mdərthlipərna wa.”

³⁴“Unə msəra. Amma ma msərakur un ni ku mti, apa madi tə vəi unkurərni ni ata jaktə namtədzi ka damwa ri?

³⁵Tsa aɗi ndzi ka ampani aka fakəu wala apa kuɓə wa, tar ka mdə pumta ni daci. Mdə na ka thləmər nggatə su, ka tsa nggata.”