Read bura-pabir Luka 18 Bible Online

Luka 18 - bura-pabir bible

Luka 18

¹Antə Yesu ngkər karapu laga aka mjirthlipərni, kamnyar thlipa ala ɗa abbər ka da sə hara adduwa tədəku, da aɗiya ghər wa.

²Tsa pəla, “Akwa bərni laga, alkali laga aɗi na aɗi ana thlivər Hyel wa, wala damitədzi ka mji wa.

³Tsuwa mwala kughung laga aɗi akwa bərni nda na akwa si adzə ni tədəku, akwa pəla, ‘Hara ali shariyar jirkur bu, ka gə msərantə ra akwa tsiya dawarna.’

⁴Ntangkəmari alkali ni aɗi hir wa. Amma aghəla nda tsa pəla akwa ɗəffari abbər, ‘Wala tə I aɗi ana thlivər Hyel wa, wala damitədzi ka mdə wa ni,

⁵təng tə mwala ngəni akwa dingngga damitə ra ni, I ata hara shariyar jirkur kəi msərantə ni, ta tsa asə ghərantə ra ka səyirni tədəku ni!’ ”

⁶Antə Mthlaku pəla, “Giri ku nggatə jili su tə alkali na kula jirkur ni pəla wa!

⁷Kaha, ma apani, Hyel aɗi ata msərantə mjirni na carcara na ana tuwa alari pci ka viri wa ya? Giri tamatə tsa hir ndzi tihtihha akwa dlar ɗa ya?

⁸I akwa pəla ala giri, tsa ata msərantə ɗa kula shamta saka. Amma akwa sakatə Ɓzər Mda ata si ngka, tsa ata mzhi wutə mdə na ka hamta jiri akwa duniya ni ya?”

⁹Yesu ku ngkər karapu ngəni aka mji na ana kətə kərɗa abbər da mji na pwa, har ka rutə mambila mji.

¹⁰Tsa pəla, “Mji laga aɗi suɗa na ku ləkwa mbwar vəngkər səli kamnyar hara adduwa, mdə na pal mdər Farisi, mdə na palari tsuwa mdər dlu tsəma.

¹¹“Antə mdər Farisi ni thlatə ka thləthlata, ka hara adduwa akwa pəla, ‘Hyel, I akwa usar nga kamnyar tə I aɗi apa mambila mji wa, apa mjir zamba, ka mjir dlərpəkur, ka mjir ləka, wala apa mdər dlu tsəma ngəni wa.

¹²I ana hara asham ka suɗa akwa sati pal, ka hamta zaka ar shanga su tə I wuta.’

¹³“Amma ar mdər dlu tsəma ni, tsa thləthlatə ciju, tsa aɗi hir wala haptə ncari amtazi wa, amma tsa nggyarghəi kərari, ka akwa pəla, ‘Hyel, ka gə kətadzə ra, I an mdər biku!’

¹⁴I akwa pəla ala giri, mdər dlu tsəma ni ata ngka aharngkiɗa ka kərari pasəyang akəma Hyel ta mdər Farisi ni. Kamnyar kəlara mdə na ku haptə kərari abbər tsa an ola, mda ata tərghəi ni. Tsuwa kəlara mdə na ku tərghəi kərari, mda ata haptə ni.”

¹⁵Vir laga mji laga akwa səntə maɗankyarər ɗa na raka raka aka Yesu kamnyar ka tsa vədza ala ɗa barka. Amma sakatə mjirthlipərni ku wuta apani, antə da mpa ala ɗa.

¹⁶Amma Yesu ku kəgatə maɗankyar ni adzə ni, ka pəla, “Zhar giri maɗankyar na raka raka ni ka da si adzə ra, giri aɗiya ngkatə ɗa wa, kamnyar kuthlikurər Hyel ni an kamnyar mji na apa maɗankyar nayeri ni.

¹⁷I akwa pəla ala giri jirkur, kəlara mdə na aɗi dlu kuthlikurər Hyel apa ɓzəngkyar na raka wa, tsa aɗi ata ləkwari cap wa.”

¹⁸Antə mdə laga na ola akwa nca mjir Yahudi yu Yesu abbər, “Maləm na pwa, man tə kəi hara kamnyar kəi wutə mpikə na akur wa ri?”

¹⁹Antə Yesu pəla alari, “Kamnyar mi tə ga akwa kəga ra abbər mdə na pwa ri? Ai mda aɗi na pwa wa, tar Hyel duku shini.

²⁰Ga səndə tsawayeri abbər, ‘Ga aɗiya ləkə wa, ga aɗiya tsi mdə wa, ga aɗiya həl wa, ga aɗiya thlandər ata kəra mdə wa, ka gə nar olkur aka baba'nga ka mama' nga!’ ”

²¹Antə ɓzərdakwi ni pəla, “Ai I ku ɓəlatə shanga tsawayeri ngəni təng tə I ɓzəngkyar.”

²²Sakatə Yesu ku nggatə gari ngəni, antə tsa pəla alari, “Su duku daci an mbila ala gə ka gə hara. Ɗələmta shanga su na akəla ga, ka gə hamta kwabari aka mjir bwani, antə ga ata wutə watsəɓari amtazi. Tsuwa ka gə si ka gə nu ra.”

²³Amma sakatə mdə ni ku nggatə ndər ngəni, antə ɗəffari ɓzi ka duna, kamnyar tsa mdə na ka gəna hang.

²⁴Sakatə Yesu ku wuta abbər ɗəffari ku ɓzi, antə tsa pəla, “Ata ndzi mwavər ka mji na ka gəna ləkwa kuthlikurər Hyel!

²⁵Kamnyar ata ndzi kasəla aka dləkəmau ka tsa ləɓəla akwa gular liɓəra ta ka mdər gəna ləkwa kuthlikurər Hyel!”

²⁶Antə mji na nggatə ndər ngəni ni pəla, “Kaha, ma apani, wan ata mzhi wutə mbantədzi ri?”

²⁷Amma Yesu pəla, “Su na mwavər aka mda, aɗi mwavər aka Hyel wa.”

²⁸Antə Bitrəs pəla, “Nggədza yeru ku zhar kəyayeri ar yeru ka nutə nga.”

²⁹Antə Yesu pəla ala ɗa, “I akwa pəla ala giri jirkur, mda aɗi na ata zhar kəyirni, wala mwalankiɗa, wala maɗama'ni shili wala mwanki, wala mjir yarni, wala maɗa'ni, kamnyar kuthlikurər Hyel,

³⁰kula tsa dlu watsəɓari hang akwa zaman ngəni wa. Tsuwa akwa duniya na ata si tsa ata wutə mpikə na akur wa.”

³¹Antə Yesu ku kəgamta mjirthlipərni na kumnya suɗə ni abwa duku, ka pəla ala ɗa, “Nggədza mburu akwa ləmta ahar Urushalima, antə shanga su tə naɓiyayeri rəbuta ata kəra Ɓzər Mda ni ata nghyaɓəladzi.

³²Kamnyar mda ata sə hamta ni aka mjir Rom, ka da mnya ɗimi alari, ka taratə ni, ka tifəngkər alari mtili.

³³Da ata sə dlaɓu ni ka kwandeng, ka sə tsi ni, amma akwa vir na makərkur antə tsa ata sə thlatə ka mpika.”

³⁴Amma mjirthlipərni aɗi nggaɓəla gari tə tsa pəla ni wa. Mdə ku ɗuwamta karapur ndərayeri ni kazhar ɗa, antə da aɗi mzhi nggaɓəla su tə tsa akwa pəlari ni wa.

³⁵Sakatə Yesu ku hara kudzəhə ka Yariko, antə tsa wutə mdlyang laga andzəndzi ata mnya laku akwa kiɗa.

³⁶Sakatə tsa nggatə dlamar mji akwa təramta, antə tsa yu mji abbər man akwa hara ri?

³⁷Antə da pəla alari, “Yesu ar Nazareth an akwa təramta azi.”

³⁸Antə tsa haptə kurakari akwa pəla, “Yesu, Ɓzər Dauda! Kətadzə ra!”

³⁹Antə mji na akwa mwa akəma ni mpəmpatə ni, ka pəla alari ka tsa ndzi ɗiɗi. Amma tsa jaktə haptə kurakari ka duna ta na hwatu ka pəla, “Ɓzər Dauda! Kətadzə ra!”

⁴⁰Antə Yesu thləthlatə ka pəla ka mdə səntə ni alari. Sakatə tsa ku si, antə Yesu yu ni abbər,

⁴¹“Man tə ga akwa bara kəi hara ala gə ri?” Antə mdlyang ni pəla alari, “Mthlaku, I akwa bara ka nci jaktə wutə su.”

⁴²Antə Yesu pəla alari, “Kara wutə su! Hamta jirər nga ku mbantə nga.”

⁴³Təkəma antə ncari ku kəlardzi, antə tsa ku nutə Yesu akwa hu Hyel. Sakatə dlamar mji wutə su ngəni, antə da hu Hyel tsuwa.