Read bura-pabir Luka 2 Bible Online

Luka 2 - bura-pabir bible

Luka 2

¹Akwa virayeri na ndaga antə tsawa ku thlata akəla Kaisar Augustus, abbər ka mdə jikatə shang mji na akira kuthlikur ar tsəɗi Rom.

²Ngəni an jika na ntangkəma tə mdə ku hara sakatə Kiriniyus ku ndzi olər tsəɗi Siriya.

³Shanga mji ku mwari kamnyar ka mdə jikatə ɗa, waskəi ku mwari akwa diyirni.

⁴Antə Yusuf ku thlata ahar Nazareth, akwa tsəɗi Galili ka mwari ahar Bethlelehem akwa tsəɗi Yahudiya, vəi natə mdə ku yaɓəla kuthli Dauda akwa. Yusuf ku mwari anda kamnyar tə tsa akwa dur ar Dauda.

⁵Kamnyar ka mdə jikatə ɗa japu ka Maryamu natə da ku hara alkawal ar kəldzi hwatu, natə hurər ni ku kəl ola.

⁶Sakatə da tsu ahar Bethlelehem, antə sakar yarni ku hara.

⁷Antə tsa ku yaɓəla ɓzər sal na yarakəmari, ka pərta ni akwa zhaɓi, tə tsa peri ni akwa vəi pwi susəma aka mwaɓi, kamnyar tə vəi ndzəndzi aɗi ala ɗa akwa vəi natə da ku fəli akwa wa.

⁸Tsuwa akwa bwar na ndaga ar tsəɗi ni, mjir ɓəla aɗi na ta sək kəra ciɓər ɗa aviri akwa mtaku.

⁹Antə mdərthlentərhyel ku si ka thləthlata adzə ɗa, antə səliyir Mthlaku tsuwa ku kalaktə ɗa ata mbila, antə da ku thlivəra ka duna.

¹⁰Amma mdərthlentərhyel ni pəla ala ɗa, “Giri aɗiya thlivər wa, kamnyar nggədza I ku sənta ala giri labar na msəra ar ɗəffu mwapu na ola, na ata ndzi aka shang mji,

¹¹kamnyar ashina mdə ku yaɓəla ala giri Mdər Mbanta akwa Bərniyir Dauda, tsa an Kristi Mthlaku.

¹²Antə ngəni ata ndzi seɗa ala giri: giri ata sə wutə ɓzəngkyar pərpərari akwa zhaɓi apəpəi akwa nggaɓa.”

¹³Təkəma nggədza dlamar mji na amtazi adzə mdərthlentərhyel ni, ata hu Hyel ka pəla,

¹⁴“Səli aka Hyel na akwar amta ta shang, ka akwa duniya tsuwa msərakur aka mji natə tsa ka kucali ata kəra ɗa ka duna.”

¹⁵Sakatə mjirthlentərhyel ni ku təra ka zhar ɗa ka ləmtazi, antə mjir ɓəla ni ku pəla aka nvwa ɗa abbər, “Ndzi ka mburu mwari kulini ahar Bethlelehem kara wutə su ngəni na ku hara, natə Mthlaku ku pəla ala mburu ni.”

¹⁶Antə da ku mwari ka huva, kara wutə Maryamu ka Yusuf, ka ɓzəngkyar ni tsuwa apəpəi akwa nggaɓa.

¹⁷Sakatə mjir ɓəla ni ku wutə ɓzəngkyar ni, antə da ku pəla ala ɗa su tə mdərthlentərhyel ku pəla ala ɗa ata kəra ɓzəngkyar ni.

¹⁸Shanga mji na ku nggatə labar ni ku ndatədzi ata kəra su tə mjir ɓəla ni ku pəla ala ɗa.

¹⁹Amma Maryamu ku kəsi labar nayeri ni shang, ata dzama ata kəra ɗa akwa ɗəffari.

²⁰Antə mjir ɓəla ni ku ngka ata nar olkur aka Hyel ka hu ni tsuwa kamnyar shanga su tə da ku nggatə ka wuta, tsu apatə mdərthlentərhyel ni ku pəla ala ɗa.

²¹Sakatə vir ncisu ku hara, tə mdə ku thlamta kaciya aka ɓzəngkyar ni, antə mdə ku vətə thləm alari Yesu, tsu thləm natə mdərthlentərhyel ni ku pəla akəmata hurər ni akətədzi.

²²Sakatə virayeri ar kəcimtadzi arɗa ku hara, apatə Musa ku tsawa, antə da ku mwantə ɓzəngkyar ni ahar Urushalima kamnyar ka da hamta ni aka Mthlaku,

²³Apatə ku rəbutədzi akwa Tsawa ar Mthlaku abbər, “Kəlara ɓzər sal na an yarakəma, antə mda ata pəla tsa an ɓɗakkarkara aka Mthlaku.”

²⁴Antə da ku mwari kamnyar hamta saɗaka ka bukəl suɗa wala maɗa' katapar suɗa, apatə mdə ku pəla akwa Tsawa Mthlaku.

²⁵Akwa saka na ndaga antə mdə laga aɗi ahar Urushalima ka thləmari Simeyon, mdə ngəni tsa mdə na pwa na ana hir Hyel, tə tsa akwa səka mdə na ata sə mbantə Israila, antə Mambəl na Ɓɗakkarkara aɗi adzə ni.

²⁶Tsuwa Mambəl na Ɓɗakkarkara ku pəla alari abbər tsa aɗi ata mtə wa, tar ma tsa ku wutə Kristi na ar Mthlaku katagu.

²⁷Atar dlarər Mambəl antə Simeyon ku ləkwa mbwar vəngkər səli aka Hyel. Sakatə mji na ya ni ku ləkwa mbwar vəngkər səli aka Hyel kamnyar ka da hara alari tsu apatə Tsawa ku pəla,

²⁸antə Simeyon ku dlu ɓzəngkyar ni akwa tsiyari akwa hu Hyel ka pəla,

²⁹“Kulini, Mthlaku, antə ka gə zhar mafar nga ka tsa təra ka msərakur, tsu apa alkawal natə ga ku pəla.

³⁰Kamnyar nci ku wutə mbantədzər nga

³¹natə ga ku ɗəmha akəma shanga mji.

³²Parakəu tsuwa kamnyar ncantə nga aka mji na aɗi mjir Yahudi wa, ka səli tsuwa aka mjir nga Israila.”

³³Antə baba'ni ka mama'ni ku ndatədzi ata kəra suayeri natə Simeyon ku pəla ata kəra ɓzəngkyar ni.

³⁴Tsuwa Simeyon ku vədza barka ala ɗa, tə tsa pəla aka Maryamu mama'ni abbər, “Wuta, Hyel ku vəi ɓzər ngəni kamnyar ndla, ka thlatər mji hang akwa Israila. Tsa ata sə ndzi seɗa na thlata akəla Hyel natə mji hang ata sə nggəlar ni.

³⁵Antə dzamər ɗəffa mji hang ata sə kəlardzi. Ɗəffə ɓzəɓza na ata ndzi apa katsakar na ata ntsəvəi ɗəffa ga.”

³⁶Antə naɓi mwala, laga aɗi tsuwa na halhalari ka duna, natə tsa an kughung ka thləmari Hannatu. Tsa an ngkwar Fanuwel, akwa durər Ashir. Tsa ku kəl sal, antə da ku ndzi ka sal ni məva murfa daci antə sal ni mti aghəla ɓzərngkwakurər ni, antə kulini tsa ka məvari nciskumari ka nfwar. Tsa aɗi ɗar zhar mbwar vəngkər səli aka Hyel wa, amma tsa ana vəngkər səli aka Hyel pci ka viri, ka hara asham ka adduwa tsuwa.

³⁷

³⁸Tsu ata saka na ndaga antə tsa ləmbwa ka hu Hyel ka hara labar ata kəra ɓzəngkyar ni aka shanga mji na ata səka Hyel kamnyar ka tsa sə msərantə Urushalima.

³⁹Sakatə da ku kuri hara shanga su apa natə Tsawa Mthlaku ata turari, antə da ku ngka akwa diyir ɗa Nazareth akwa tsəɗi Galili.

⁴⁰Antə ɓzəngkyar ni ku kəla ka hara ɓəɓal, nghyinghyari ka ɗəɗukur, tə msərakurər Hyel aɗi ata kərari.

⁴¹Tədəku məva antə mji na ya ni ana mwari ahar Urushalima kamnyar susəmər Kucalər Fəlɓəla Kəi.

⁴²Sakatə Yesu ku hara məva kumnya suɗa, antə da ku mwari akwa susəm ni tsu apatə da ana hara hwatu.

⁴³Sakatə sakar susəm ni kuri, antə da ku baɗitə ngka avi, amma Yesu ɓzəngkyar ngəni ku ɗarndzi aghəli akwa Urushalima kula səndər mjir yarni.

⁴⁴Da tamata abbər tsa akwa nca mjir ɗa. Sakatə da ku mwa vir pal, antə da ku sə baɗitə pakə ni akwa nca yangkura da kəga mji natə da asəndə ɗa.

⁴⁵Amma sakatə da aɗi wutə ni wa, antə da ku jaktə ngka ahar Urushalima ata pakə ni.

⁴⁶Aghəla vir makər antə da ku sə wutə ni akwa mbwar vəngkər səli aka Hyel, andzəndzi akwa nca maləmayeri ar mjir Yahudi ata ngga ɗa, tə tsa akwa yu yu suayeri ala ɗa.

⁴⁷Antə shanga mji na ku nggatə ni, da ku ndatədzi ata kəra nggaɓəla surni ka amsayeri natə tsa akwa hamtari.

⁴⁸Sakatə mji na ya ni ku wutə ni, antə da ku ndatədzi, antə mama'ni pəla alari abbər, “Ɓzərna kamnyar mi antə ga ku hara ala yeru apani ri? Wuta, baba' nga ka iya akwa pakə nga ka ɗəffə ɓzəɓza.”

⁴⁹Antə tsa pəla ala ɗa, “Man hara tə giri ata pakə ra ri? Giri aɗi sənda abbər tar kəi ndzi akwa kəyir Təddarna wa ya?”

⁵⁰Amma da aɗi nggaɓəla su tə tsa ku gari ala ɗa ata kər wa.

⁵¹Antə Yesu ku ngka ka ləha kəga da ahar Nazareth, tə tsa ana kələngkər ala ɗa, antə mama'ni ku kəsi suayeri ngəni shang akwa ɗəffari.

⁵²Antə Yesu ku kəla, ka ləkəma akwa ɗəɗukur ka wutə msərakur akəla Hyel ka akəla mji.