Read bura-pabir Luka 5 Bible Online

Luka 5 - bura-pabir bible

Luka 5

¹Vir laga tə Yesu athləthlata ata mnya Mandar Jannisaret, antə dlamar mji ku mwari adzə ni kamnyar ka da nggatə labar Hyel.

²Antə tsa ku wutə sharayeri suɗa ata mnya manda ni, amma mjir ngka kəlfa an ləɓəla ka zhari ata kəcimta banggamar ɗa.

³Antə Yesu ku ləkwa kuta shar na dukwari, na ar Siman, tə tsa kiɗə ni abbər ka tsa tərkəma raka ta mnya maghəm. Antə Yesu ku ndzəndzi akwa shar ni ka thlipa aka dlamar mji.

⁴Sakatə Yesu ku kuri labarər ni, antə tsa pəla aka Siman, “Ka gə tərkəma shar ni akwa vəi na zurang, kara psəghəi banggamar nga kamnyar tamwa.”

⁵Antə Siman shinau ka pəla, “Mthlaku, aviri ni shang yeru ku hara kəthlər ka duna, amma yeru aɗi ngkəi suma wa. Amma kamnyar tə ga an pəla ni, antə I ata psəghəi banggama ni.”

⁶Sakatə da ku psəghəi banggama ni antə da ku ngkəgəi kəlfayeri dlama dlama, apa ka banggamayeri arɗa thləhumtadzi.

⁷Antə da ku kəga nvwa ɗa akwa shar na damwa kamnyar ka da sə dlar ɗa. Antə da ku si ka nghyantə sharayeri japu suɗə ni, tə da abaka ncighəidzi akwa yimi.

⁸Sakatə Siman Bitrəs ku wutə su na ku hara apani, antə tsa ndla adzə nggilanga Yesu akəmari, tə tsa pəla, “Təra ka zhar ra Mthlaku, kamnyar I mdər biku.”

⁹Kamnyar tsa, ka mji na adzə ni antə shanga ɗa ku ndatədzi ata kəra hangkur kəlfayeri natə da ku ngkəi ni.

¹⁰Ku ndzi tsu apani aka Yakub ka Yahwana, maɗa' Zabadi, na mjir kəthlər ata kəma duku kəga Siman. Antə Yesu pəla aka Siman, “Ga aɗiya thlivər wa, akəmazi mji antə ga ata sə sənta ali.”

¹¹Sakatə da ku səntə sharayeri arɗa adzə mnya maghəm, antə da zhar shanga su ka nutə Yesu.

¹²Vir laga sakatə Yesu ku mwari akwa di laga, təng mdə laga natə shilkər kəsəm dza ku hartə dzari shang, ku mwari anda tsuwa. Sakatə mdə ni wutə Yesu, antə tsa ndla ka kəmari ata di, ka kiɗə ni abbər, “Mthlaku, ma gə hira, ga ata mzhi namtə ra kəi ndzi ndəlang.”

¹³Antə Yesu ku ndərar tsiyari ka tsəkwar ni akwa pəla, “I ku hira, ndzi ndəlang!” Təkəma antə shilkər kəsəm dzari ni ku kuri adzə ni.

¹⁴Antə Yesu ku tsawa alari abbər, “Ga aɗiya ngkər su ngəni aka mdə wa. Amma mwari, ka gə ncantə kər nga aka prist.Tsuwa ka gə hamta saɗaka natə Musa thlamta kamnyar kəcimtadzi. Ka gə hara apani kamnyar ka mji sənda abbər ga ku mbantədzi.”

¹⁵Amma wala apani tsu labar ni ku titiləmtadzi ata kərari bamama, antə dlamar mji hang ku si kamnyar ka da nggatə labarər ni, ka tsuwa ka da mbantədzi ta shilkayeri natə da kəgari.

¹⁶Amma tsa ku təra mwari akwa vəi laga na kula mda akwa, kara hara adduwa.

¹⁷Vir laga sakatə Yesu akwa thlipa, antə mjir Farisi kəga maləmayeri na ar Tsawa, na ku thlata akwa kəlara di madi na akwa tsəɗi Galili ka tsəɗi Yahudiya ka ahar Urushalima, natə da aɗi andzəndzi anda, antə dunar Mthlaku aɗi adzə Yesu kamnyar ka tsa mbantə mdə na nggawa.

¹⁸Da aɗi da aɗi, təng mji laga səntə mdə laga ka dzari mtəmtari apəpəi ata algau. Antə da kəɗar abbər ka da ləmbwa ka tsa, ka da vəi ni akəma Yesu,

¹⁹amma da aɗi mzhi mwari adzə Yesu wa, kamnyar hangkur mji. Antə da ləmta ka tsa ata kəra mbwa ni, ka mbwaləmta kəra mbwa ni ata vəi laga, ka haghəi ni tsu ata algau ni akwa gula ni, ka vəi ni akwa nca mji akəma Yesu.

²⁰Sakatə Yesu ku wutə hamta jirər ɗa, antə tsa pəla aka mdə ni abbər, “Mdə ragai, mdə ku tifəmta ala gə bikər nga.”

²¹Antə maləmayeri ar thlipə tsawur Musa ni ka mjir Farisi baɗitə pəla aka nvwa ɗa abbər, “Ngəni wan akwa gari ar rutə Hyel nə ri? Wan ka dunar tifəmta biku aka mda, ka təra kəra Hyel shini ri?”

²²Yesu ku səndə su na akwa ɗəffa ɗa, antə tsa yu ɗa abbər, “Kamnyar mi tə giri akwa dzam suayeri ngəni akwa ɗəffa giri ri?

²³Na madi an kasəlari ri, ka mdə pəla, ‘Mdə ku tifəmta ala gə bikər nga,’ nənga ka mdə pəla, ‘Thlatə kara mwa ri?’

²⁴Amma ka giri sənda abbər Ɓzər Mda ka dunar kuthlikur akwa duniya kamnyar tifəmta bikayeri.” Aghəla ngəni antə tsa pəla aka mdə na ka dzari mtəmtari ni, “I akwa pəla ala ga, thlata, ka gə kətə algauwur ngə ni, ka gə təra ləha.”

²⁵Antə mdə ni thlatə ka thləthlata akəma ɗa, ka kətə su tə tsa pəpəi ata ni, ka təra ləha, akwa hu Hyel.

²⁶Antə shanga mji ku ndatədzi, ka hu Hyel, kamnyar da ku thlivəra, ka pəla, “Ashina mburu ku wutə sur ndatə na ola.”

²⁷Aghəla ngəni, antə Yesu ku ləɓəla ka wutə mdər dlu tsəma laga ka thləmari Lawi, andzəndzi akwa vəi dlu tsəma. Antə Yesu pəla alari, “Nu ra.”

²⁸Antə Lawi ni ku thlata, ka zhari shanga su ka nutə ni.

²⁹Antə Lawi ku ɗəmhə susəmər kucali na ola aharngkiɗa kamnyar Yesu. Tsuwa mjir dlu tsəma kəga mjir biku hang ku tsaptədzi dlama dlama ka ndzəndzi akwa səm susəma ata kəma duku kəga da.

³⁰Antə mjir Farisi kəga maləmayeri arɗa na ar Tsawa, ku nggungguni aka mjirthlipər Yesu ka pəla, “Kamnyar mi tə giri ana səm ka sa ata vəi duku kəga mjir dlu tsəma ka mjir biku ri?”

³¹Antə Yesu shinau ala ɗa abbər, “Mji na lapiya aɗi ana tur mdər kuzəku wa, tar mji na nggawa.

³²I aɗi si kamnyar kəi kəga mji na ɓɗakɓɗaku wa, amma mjir biku kamnyar ka da tubi.”

³³Antə mji laga ku pəla aka Yesu abbər, “Tədəku mjirthlipər Yahwana ana hara asham ka hara adduwa, tsuwa mjirthlipər mjir Farisi ana hara apani, amma parang mjirthlipər nga akwa ləkəma ka səm ka sa.”

³⁴Antə Yesu pəla ala ɗa, “Giri ata mzhi vu ka pazhayeri ar sala mwala kəl asham akwa sakatə sala mwala ni tsu adzə ɗa ya?

³⁵Ai saka akwa si tə mda ata sə kələmta sala mwala ni kazhar ɗa. Sakanda antə da ata kəl asham.”

³⁶Antə Yesu hara ala ɗa karapu abbər, “Mda aɗi ana kwahətsə mnya ləptu na bilən ka mbuɓəla ləptu na halhalari kəgari wa. Kamnyar ma tsa ku hara apani, tsa ata hilantə ləptu na bilən ni, tsuwa paci tə tsa hara ka yadi na bilən ata ləptu na halhalari ni, aɗi ata kəɓa wa.

³⁷Tsuwa mda aɗi ana pu yimər anap na bilənari akwa zamzamiya na halhalari wa, Kamnyar ma tsa ku hara apani, yimər anap na bilənari ni ata thləhumta zamzamiya na halhalari ni. Antə yimər anap na bilən ni ata pumtadzi, tsuwa zamzamiya ni ata hilantədzi.

³⁸Ai tar zamzamiya na bilənari antə mda ata mzhi pu yimər anap na bilənari akwa.

³⁹Tsuwa ma mdə ku kurtə sa yimər anap na fəifəyari, antə tsa aɗi ana hir na bilənari kəra wa, kamnyar tsa ata pəla abbər na fəifəyari ni an msərari.”