Read bura-pabir Luka 6 Bible Online

Luka 6 - bura-pabir bible

Luka 6

¹Vir Ghərəmtaghəra laga sakatə Yesu akwa təramta akwa fakər mthli, təng mjirthlipərni baɗitə ɓəgəli sanggam mthli ni akwa humsari akwa tsiya ɗa ka da ɓɗa.

²Antə mjir Farisi laga pəla, “Kamnyar mi tə giri akwa hara su tə tsawur Musa aɗi hir ka mdə hara Vir Ghərəmtaghəra wa nə ri?”

³Antə Yesu shinau ala ɗa abbər, “Giri aɗi karatə su tə Dauda hara wa ya, sakatə tsa kəga mji na adzə ni akwa ngga mi ni?

⁴Laku tə tsa ləkwa mbwar Hyel, ka kətə buradi tə mdə ku hamta aka Hyel, ka kwasa, natə aɗi kalkal ka kəlara mdə kwasə wa, tar pristayeri daci ni. Har ma tsa ku hamta aka mji na adzə ni.”

⁵Antə Yesu pəla ala ɗa, “Ɓzər ar Mda an Mthlakər Vir Ghərəmtaghəra.”

⁶Akwa Vir Ghərəmtaghəra na damwa, antə Yesu ləkwa mbwar vəngkər səli, ka ləkwa thlipa. Tsuwa mdə laga aɗi anda na ka tsi mazəmari mtəmtari.

⁷Antə maləmayeri ar thlipə tsawur Musa kəga mjir Farisi ləkwa bara laku tə ka da wutə vəi shar Yesu. Antə da ku wul ni ka hangkal, abbər nuhum tsa ata mbantə mdə ngəni akwa Vir Ghərəmtaghəra ni.

⁸Amma Yesu ku səndə dzamər ɗa, antə tsa ku pəla aka mdə na ka tsiyari mtəmtari ni, “Thlatə kara si azi akəma.” Antə mdə ni ku thlatə kara thləthlata anda.

⁹Antə Yesu pəla ala ɗa, “I akwa yu giri su, Man tə kalkal ka mdə hara akwa Vir Ghərəmtaghəra ri? Ka mdə hara ɓɗakkur nənga ka mdə hara ɗimikur ri, kalkal ka mdə mbantə mpika mdə nənga ka mdə kəl mpika mdə ri?”

¹⁰Antə Yesu wul ɗa shang, ka pəla aka mdə ni, “Ndəraɓəla tsiya ga.” Antə tsa ku ndəraɓəla, antə tsiyari ku jaktə ndzi lapiya apa na hwatu.

¹¹Amma ɗəffa ɗa ku ɓzi ka duna, antə da baɗitə ngkərha akwa daɓwa ɗa su tə ka da hara aka Yesu.

¹²Vir laga Yesu lətə kəra gar kamnyar hara adduwa. Antə tsa pi anda akwa hara adduwa aka Hyel.

¹³Sakatə viri ku kuri, antə tsa kəga shanga mjirthlipərni, ka carɓəla mji kumnya suɗa akwa nca ɗa, ka vəta ala ɗa thləm aposəlayeri.

¹⁴Siman, natə tsa ku vəta alari thləm Bitrəs, ka Andrawus na ɓzərma'ni, ka Yakub, ka Yahwana, ka Filibus, ka Barthlolomiu,

¹⁵ka Mathliyu, ka Thlomas, ka Yakub na ɓzər Halfa, ka Siman na hir tsəɗiyirni,

¹⁶ka Yahuda na ɓzər Yakub, ka Yahuda Iskariyoti na ɓəli ni.

¹⁷Antə Yesu ku ləghəi ata gar ni kəga aposəlayeri, ka thləthlata akwa bəbal laga patərathlu. Tsuwa mjirthlipərni laga aɗi anda hang ata kəma duku ka mji damwa dlama dlama na thlata ahar Yahudiya, ka Urushalima, kəga mji na thlata ata mnya yimi akwa bwar Taya ka Sidon. Da si kamnyar ka da nggatə labarərni, ka tsuwa ka da wutə mbantədzi ta shilkayeri arɗa.

¹⁸Antə mji na ka damitədzi ar mambəlayeri na ɗimi ɗimi ku mbantədzi.

¹⁹Antə shanga mji ku bara ka da tsəkwar ni, kamnyar duna akwa səɓəla akwa dzari, na akwa mbantə ɗa shang.

²⁰Antə Yesu haptə ncari abwar mji na akwa nu ni ka pəla, “Giri ka barka, giri na mjir bwani, kamnyar kuthlikurər Hyel an ar giri.

²¹Giri ka barka, giri na ka mi kulini, kamnyar giri ata sə ndlantədzi. Giri ka barka, giri na ata tuwa kulini, kamnyar giri ata sə kumshi.

²²Giri ka barka sakatə mji ata nggəlar giri, tə da ata kədləɓəla ka nggənggəl giri, tə da ata ka thləma giri abwar ɗimikur, kamnyar Ɓzər Mda!”

²³“Kəlara vir tə su ngəni ku wutə giri, ka giri hara kucali, ka giri fəgəlfəgəla kamnyar kucali, kamnyar tsu apani antə kəkayeri arɗa ku hara aka naɓiyayeri.”

²⁴“Amma sha ku wutə giri, giri na mjir gəna, kamnyar giri ku kurtə dlu msərakurər giri.

²⁵Sha ku wutə giri, giri na ndləndlari kulini, kamnyar mi ata sə kətə giri.

²⁶Sha ku wutə giri, sakatə shanga mji ata hu giri, kamnyar tsu apani antə kəkayeri arɗa ku hara aka naɓiyayeri na shimnya shimnya.”

²⁷“Amma I akwa pəla ala giri na akwa nggatə ra abbər, Ka giri hir dawayeri ar giri, ka hara ɓɗakkur aka mji na ku nggəlar nca giri.

²⁸Ka giri vədza barka aka mji na ana shuwumta giri, ka hara adduwa aka mji na ana nggəl giri.

²⁹Ma mdə ku tsa nga ata pukəma gə na duku, ka gə shinar alari bwa na dukwari tsuwa. Ma mdə ku dlutsə ləptər nga na olari, ka gə hamta alari japu ka ləptu na akira.

³⁰Ka gə nar su aka kəlara mdə na ata kiɗa akəla ga, tsuwa ma mdə ku fatə kariyir nga, ga aɗiya jaktə yu wa.

³¹Ka giri hara aka mji su tə giri ata hir ka mji hara ala giri.

³²“Kamnyar ma giri ata hir mji na ata hir giri daci, man riɓari ala giri ri? Kamnyar wala mjir biku ana hir mji na hir ɗa.

³³Ma giri ata hara ɓɗakkur aka mji na ata hara ɓɗakkur ala giri daci, man riɓari ala giri ri? Kamnyar wala mjir biku ana hara apani.

³⁴Ma giri ata təpa aka mji natə giri tamatə giri ata sə jaktə dluwari daci, man riɓari ala giri ri? Kamnyar wala mjir biku ana təpa aka mjir biku nvwa ɗa kamnyar ka da si jaktə dlu tsu apa nda.

³⁵Amma ka giri hir nvwa giri, ka giri hara ɓɗakkur ala ɗa, ka giri təpatə su aka mda, tsuwa giri aɗiya ndzi ka dzama ar jaktə dluwari wa, antə watsəɓər giri ata ndzi ola, antə giri ata ndzi maɗa' Hyel na Amta ta Shang. Kamnyar tsa ana hara ɓɗakkur wala aka mji na ana gwaɗitə wa, kəga mji na kəmanggar.

³⁶Antə tar ka giri ndzi mjir kətadzə mda, tsu apatə Təddar giri ana kətadzə mda.”

³⁷“Giri aɗiya hara shariya aka wama wa, antə mda aɗi ata hara shariya ala giri wa. Giri aɗiya pəlangkər aka wama wa, antə mda aɗi ata pəlangkər ala giri tsuwa wa. Ka giri yafitə nvwa giri, antə mda ata yafitə giri tsuwa.

³⁸Hamta giri, antə mda ata sə hamta ala giri. Mda ata nghyanta ala giri tur, ka mdə ntsarha, ka kənggəlha, ka jaktə mdə pungkər har akwa pumtadzi, har ka mdə pu ala giri mbilari akwa mnya ləptər giri. Kamnyar ka daram natə giri ana ngkərtə su aka nvwa giri, antə mda ata sə ngkərta ala giri akwa.”

³⁹Antə Yesu pəla ala ɗa karapu damwa abbər, “Mdlyang amzhi ndəkər mdlyang nvwani wa, kamnyar japwa ɗa ata tərkwa ku.

⁴⁰Ɓzər makaranta aɗi ana təramta maləmərni ka olkur wa, amma kəlara mdə na ku thliptə su ɓɗaku ata mzhi ndzi apa maləmərni.

⁴¹“Kamnyar mi, antə ga ata wul mathlir na akwa nca ɓzərma' nga, amma ga aɗangtə gang na akwa nca ga wa ri?

⁴²Wala apa madi tə ga ata pəla aka ɓzərma' nga abbər, ‘Ndzi kəi kəɓəla ala gə kusar raka akwa nca ga,’ amma ar nga gang ana akwa nca gə ri? Gə shimnya! Ntangkəma, tar ka gə kəɓəla gang na akwa nca gə ni, antə ga ata mzhi wulɓəla su karkar, har ka gə mzhi kəɓəla kusar na raka akwa nca ɓzərma' nga.”

⁴³“Kamnyar nfu aɗi na ɓɗaku natə yarni ata ndzi ɗimi wa, wala nfu na ɗimi tə yarni ata ndzi ɓɗaku wa.

⁴⁴Kamnyar kəlara nfwa mda ana səndə ni atar yarni. Kamnyar mda aɗi ana ɗəm kamnda ata nfur mtəhəra wa, wala anap ata nfur mtəhəra wa.

⁴⁵Mdə na ɓɗaku ana kəɓəla su na ɓɗaku akwa gənar suayeri na ɓɗakɓɗaku akwa ɗəffari, antə mdə na ɗimi tsuwa ana kəɓəla su na ɗimi akwa gəna ar suayeri na ɗimi ɗimi akwa ɗəffari, kamnyar atar hangkur su na akwa ɗəffa mda antə mnyari ata pəlari.”

⁴⁶“Kamnyar mi tə giri ana kəga ra, Mthlaku, Mthlaku, amma giri aɗi ana hara su tə I pəla wa ri?

⁴⁷Kəlara mdə na ku si adzə ra, ka nggatə ndərərna, ka hara kəthlərari, I ata pəla ala giri dludzərni.

⁴⁸Tsa ndzi apa mdə na akwa hən mbwa, tə tsa lamta ku zurang, ka nci səla mbwa ni ata pirakthlya. Sakatə pərtu ku si ka tsa mbwa ndaga, tsa aɗi kənggərantə ni wa, kamnyar tsa ku ncidzi ɓəɓal.

⁴⁹Amma kəlara mdə na ata nggatə ndərərna, ka nggəlar hara kəthlərari, tsa ndzi apa mdə na həntə mbwarni ata di kula nci səlari ɓɗaku. Apani sakatə pərtu ku si ka tsa mbwa ndaga, tsa ku ndla, ka higəlantədzi ɗimi ɗimi.”