Read bura-pabir Luka 7 Bible Online

Luka 7 - bura-pabir bible

Luka 7

¹Sakatə Yesu ku kuri pəla shanga su ngəni aka mji, antə tsa təra ka mwari ahar Kafarnahum.

²Anda soja laga aɗi na ka buɗarni tə tsa hir ka duna, amma buɗarni ni nggawa na mwavər ata mnya mta.

³Sakatə olər sojayeri ni ku nggata ata kəra Yesu, antə tsa ku thlentə mji ol'ola ar Yahudi ka da yu ni ka tsa si ka mbantə mafarni ni.

⁴Sakatə da ku si adzə Yesu, antə da ku kiɗə ni ka duna, ka pəla, “Jiri, mdə ngəni tsa ku mzhi ka gə dlar ni,

⁵kamnyar tsa ana hir mjir mburu, tsuwa tsa surni an hənta ala mburu mbwar vəngkər səli ni ni.”

⁶Antə Yesu ku mwari kəga da. Sakatə tsa si kudzəhə ka kəi ni, antə olər soja ni thlentə pazhayeri arni adzə Yesu ka da pəla alari abbər, “Mthlaku, ga aɗiya ghərantə kər ngə wa. Kamnyar I aɗi mzhi ka gə si aharngkəya wa.

⁷Tsuwa an su na hara tə I wuta abbər, I ka kərna amzhi si adzə ngə wa. Ar ngə pəla ndər ni daci, mafarna ata mbantədzi.

⁸Kamnyar wala I ma I akira kuthlikur, ka sojayeri akiri tsuwa, natə ma I ku pəla aka mdə laga, ‘Mwari,’ tsa ata mwari. Tsuwa ma I ku pəla aka mdə damwa, ‘Səra,’ tsa ata si. Tsuwa ma I ku pəla aka mafarna abbər, ‘Hara ngəni’, tsa ata haratari.”

⁹Sakatə Yesu ku nggatə gari ngəni antə tsa ndatədzi ata kəra mdə ni. Antə tsa shinardzi ka pəla aka dlamar mji na akwa nu ni ni abbər, “I akwa pəla ala giri, wala akwa Israila I aɗi ɗar wutə jili hamta jiri na ola apani ni wa.”

¹⁰Sakatə mji natə mdə thlentə ɗa ni ngka akwa kəyir olər sojayeri ni, təng da wutə mafa ni lapiya ndəlang.

¹¹Ɗarndzi aghəla nda, antə Yesu ku mwari akwa di laga natə mda ana pəla Nayin, da kəga mjirthlipərni, ka dlamar mji hang tsuwa.

¹²Sakatə tsa ku si kudzəhə ka nyarfur katanggar di nda, təng nggədza mji akwa səɓəla ka mshiyir ɓzərdakwi laga. Tsuwa tsa an ɓzər duku daci akəla mama'ni, tsuwa tsa mwala kughung. Antə mjir di ni tsaptədzi dlama dlama adzə mwala ni.

¹³Sakatə Mthlaku ku wutə mwala ni, antə tsa kətadzə ni akwa ɗəffari, ka pəla alari, “Ga aɗiya tuwa wa.”

¹⁴Antə tsa mwari ka tsəkwar algau ni, tə mji na akwa kəl mshi ni thləthlata. Antə Yesu pəla, “Ɓzər dakwi I akwa pəla ala ga, thlata.”

¹⁵Antə mdə na ku mtə ni thlatə ka ndzəndzi, ka baɗitə gari. Antə Yesu hamta ni aka mama'ni.

¹⁶Antə thlivər ku ngkəi shanga ɗa, tə da ku hu Hyel akwa pəla, “Naɓi na ola ku wutədzi akwa nca mburu!” Tsuwa “Hyel ku si kamnyar mbantə mjirni!”

¹⁷Antə labar ata kəra su tə Yesu hara ni ku titiləmtadzi akwa tsəɗi Yahudi ka shanga diyayeri na kalaktə ni.

¹⁸Mjir thlipər Yahwana ku pəla alari ata kəra shanga suayeri ngəni.

¹⁹Antə tsa kəga mji suɗa akwa nca mjirthlipərni ni ka thlentə ɗa adzə Mthlaku, ka da yu ni abbər, “Ga an mdə na akwa si ni ya, nənga ka yeru sək mdə damwa ri?”

²⁰Sakatə mji nayeri ni ku si adzə Yesu, antə da pəla, “Yahwana na Mdər hara Baptizma an thlentə yeru adzə nga, ka yeru yu nga abbər, ‘Ga an mdə na akwa si ni ya, nənga ka yeru sək mdə damwa ri?’ ”

²¹Akwa saka nda Yesu ku mbantə mji hang akwa nggawakurayeri, ka shilkayeri, ka mambəlayeri na ɗimi ɗimi, tsuwa mji hang na mdlyang ku wutə su.

²²Antə Yesu shinau aka mji tə Yahwana thlentə ni abbər, “Mwar giri, ka giri pəla aka Yahwana su tə giri wuta, ka su tə giri nggata. Mji na mdlyang akwa wutə su, mji na nggurdəkəi akwa mwa, mji na ka shilkər kəsəm dza ku kəcimtadzi, mji na twangtwang akwa nggatə su, mji na mtəmtari akwa thlatə ka mpika, tsuwa mda akwa ngkər labar na msəra aka mjir bwani.

²³Hyel ata vədzə barka aka kəlara mdə na aɗi wutə sur tsamta səl akwa hamta jirərni ali wa.”

²⁴Aghəla sakatə mji tə Yahwana thlentə ni ku təra, antə Yesu baɗitə gari aka dlamar mji ata kəra Yahwana, abbər, “Man tə giri ləɓəla ra wulari akwa mtaku nə ri? Thlali kusar duwathlu tə shambar akwa kənggərari ya?

²⁵Ka man tə giri ləɓəla ra wulari ri? Kamnyar ka giri wutə mdə laga na hatə ləptu ɓɗaku ya? Ai mjir kutakəyir kuthli an ka ləptər kwaba, tsuwa da an mji na akwa ngga msərakur ni.

²⁶Ka man tə giri ləɓəla ra wulari ri? Ka giri wutə naɓi ya? I, I akwa pəla ala giri, har ma giri ku wutə mdə na ku təramta naɓi.

²⁷Kamnyar ngəni an Yahwana natə mdə rəbuta ata kərari akwa kakaɗu abbər, “ ‘Nggədza, I akwa thlentə mdərthlentərna akəma ga, na ata namta ala gə laku akəmata ga asi.’ ”

²⁸“I akwa pəla ala giri jirkur, akwa nca shanga mji natə mwanki an yaɓəla ɗa akwa duniya ni, mda aɗi na olta Yahwana wa. Amma wala apani, mdə na raka ta shang akwa kuthlikurər Hyel ku təramta Yahwana.”

²⁹Antə shanga mji na nggatə gari ni, har kəga mjir dlu tsəma, ku kələngkər abbər Hyel ka jirkur, kamnyar da antə mdə hara ala ɗa baptizmar Yahwana ni.

³⁰Amma mjir Farisi ka maləmayeri ar thlipə tsawur Musa ku nggəlar su tə Hyel ɗəmha ala ɗa, tə da aɗi hir dlu baptizma akəla Yahwana wa.

³¹“Ka mi antə I ata mzhi gira mjir zaman ngəni ri? Da ndzi apa mə ri?

³²Da ndzi apa maɗankyar akwa kasəku na akwa kəga nvwa ɗa akwa pəla, “ ‘Yeru ku mbur shwala ala giri, amma giri aɗi ɓathlə wa. Yeru ku tsa jikatuwa, amma giri aɗi hir tuwa wa.’ ”

³³“Kamnyar sakatə Yahwana na Mdər hara Baptizma si, tsa aɗi akwa səm susəm wala sa yimər anap wa. Antə giri pəla, ‘Ai tsa ka shatan akwa dzari!’

³⁴Sakatə Ɓzər Mda ku si tsuwa, akwa səm susəma ka sa yimər anap, antə giri pəla, ‘Wul giri mdər səm hang, ka sa hang ka wika ni, pazhir mjir dlu tsəma ka mjir biku!’

³⁵Wala apani mda ana wutə ɗəɗukurər Hyel atar shanga mjir nu ni ka jirkur.”

³⁶Antə pal akwa nca mjir Farisi yu Yesu abbər ka tsa ra səm susəma aharngkiɗa. Antə Yesu ku mwari ahar mdər Farisi ni, ka ndzəndzi ata vəi səm susəma.

³⁷Tsuwa mwala laga aɗi akwa kuta di ni, natə surhararni an karwakur. Sakatə tsa nggata abbər Yesu akwa səm susəma akwa kəyir mdər Farisi ni, antə tsa si ka kwalɓa laga raka tə mdə nam ka pela oniks, nghyinghyari ka mal shiwura na msəra.

³⁸Antə tsa thləthlata abwahila Yesu adzə səlari, akwa tuwa. Sakatə shimwiyirni baɗitə putədzi ata səla Yesu, antə tsa zuzuri ka fwavumta səlari ni ka shishir kərari, ka vədzə mnyari aka səla Yesu, ka kəkərtə səla Yesu ni ka mal na akwa shiwur msəra ni.

³⁹Sakatə mdər Farisi na kəga ni akwa səm susəm ni, wutə su tə mwala ni akwa harari ni, antə tsa pəla akwa ɗəffari abbər, “Ma mdə ngəni an naɓi jiri, sakani tsa ata səndə jili mwala ngəni na akwa tsəkwar ni ni, ka nggaɓəla tsuwa abbər tsa mdər biku!”

⁴⁰Antə Yesu shinau alari ka pəla, “Siman, I ka su tə I akwa bara pəla ala ga.” Antə tsa pəla, “Ka pəla bu, Maləm.”

⁴¹Antə Yesu pəla, “Mdə laga aɗi na ku təpata kwaba aka mji suɗa. Mdə na pal dlu təmbəl ar kwabar adzərfa aru ntəfu, mdə na duku tsuwa kwabar adzərfa ntəfkumari.

⁴²Sakatə da aɗi mzhi ntəmtari wa, antə tsa yafita ala ɗa kwaba ni japwa ɗa. Akwa wutər nga, mdə madi akwa nca ɗa ni an ata hir mdə ni təramta nvwani ri?”

⁴³Antə Siman pəla, “Akwa wutərna, mdə tə mdə yafita alari hang ni.” Antə Yesu pəla alari, “Yauwa, ga ku shinau kalkal”

⁴⁴Antə Yesu ku shinardzi abwar mwala ni ka pəla aka Siman, “Ga ku wutə mwala ngəni ya? I ku si aviyar ngkiri amma ga aɗi na ali yimi kamnyar kəcimta səli wa, amma mwala ngəni ku kəcimta səli ka shimwiyir ni ka fwavumta səli ka shishir kərari.

⁴⁵Ga aɗi alitəra atar fəfahə ra wa, amma arni tsu akwa sakatə I ku si har ba kulini tsa aɗi zhar ta vədzə mnyari aka səli wa.

⁴⁶Ga aɗi kəkərtə kəri ka mal wa, amma tsa ku kəkərtə səli ka mal na ata shiwura msəra.

⁴⁷Kamnyar ngəni antə I akwa pəla ala ga, wala tə tsa ka biku hang, mdə ku yafitə ni, kamnyar tsa ka hirkur hang. Kəlara mdə tə mdə ku yafita alari raka tsuwa, tsa ana ncantə hirkurərni raka.”

⁴⁸Antə Yesu pəla aka mwala ni, “Mdə ku yafitə nga ata kəra bikər nga.”

⁴⁹Amma mji na andzəndzi ata vəi səm susəma kəga Yesu ni baɗitə pəla aka nvwa ɗa abbər, “Wa ngəni ri, natə wala biku tsa ata mzhi tifəmta aka mdə ni?”

⁵⁰Amma Yesu pəla aka mwala ni, “Hamta jirər nga ku mbantə nga, Ka Hyel mwantə ngə lapiya.”