Read bura-pabir Zwarəngkər Shariya 1 Bible Online

Zwarəngkər Shariya 1 - bura-pabir bible

Zwarəngkər Shariya 1

¹Ngəni an ndərayeri natə Musa pəla aka shanga mjir Israila sakatə da abwar raghəi ka Thlyagha Jodan, akwa Mtakər Araba, na akwa wuldzi ka Suf, akwa daɓwa Paran ka Tofel, ka Laban, ka Hazeroth ka Dizahab.

²Ngəni an mwar vir kumkantang, thlata akwa Gar Horeb ka mwari akwa Kadesh Barneya atar Gar Seyir.

³Akwa vir na ntangkəma ar thliya na kumkantangkur akwa məva na nfwarkumarkur, aghəla səɓəlar ɗa akwa tsəɗi Masar, antə Musa gari aka mjir Israila ata kəra su tə MTHLAKU pəla alari ka tsa pəla ala ɗa.

⁴Ngəni an aghəla tə Musa ku mpa ka səm Sihon, na kuthlir mjir Amor, na akwa hara kuthlikur ahar Heshbon, ka Og na kuthlir Bashan, na akwa hara kuthlikur ahar Ashtaroth ka Edrai.

⁵Antə anda akwa bwar raghəi ka Thlyagha Jodan akwa tsəɗi Mowab, antə Musa ngkərɓəla surthlipər Hyel aka mjir Israila, ka pəla,

⁶“Ɗangtə giri laku tə MTHLAKU na Hyelər mburu gari ala mburu akwa Horeb, abbər ‘Ndzəndziyir giri azi ni ku mzhi apani.

⁷Thlatə giri ka giri təra mwari akwa tsəɗi garayeri ar mjir Amor, ka shanga ntəwul kauyayeri arɗa na akwa Araba. Ka giri ləkwa garayeri, ka Negev, ka bwar mnya manda, ka tsəɗi Kanana, ka garayeri ar Lebanon, har ka mwanta aka thlyagha na ola, watau Thlyagha Yufiretis.

⁸Nggədza I ku hamta tsəɗi ni akwa tsiya giri. Ləkwa giri ka giri ndzi mthlakər tsəɗi tə MTHLAKU hara alkawalər hamta aka kəkayeri ar giri, watau aka Ibrahim, ka Ishaku, ka Yakub, abbər tsa ata hamta ala ɗa kəga nyarmbwar ɗa shang na ata si akəmazi.’ ”

⁹Ata saka nda antə Musa pəla aka mji ni abbər, “Saka tə mburu ata Gar Sinai, I ku pəla ala giri abbər kəthlər ar pwar giri ni ku təra kərathli. I amzhi hara kəthlər ngəni I shira wa.

¹⁰MTHLAKU na Hyelər giri ku vu tə giri ku hara hang har tə ashina giri ku hara hang apa sasəlkayeri na amtazi.

¹¹Ka MTHLAKU na Hyelər kəkayeri ar giri jakə hangkurər giri har ka bwa dəpu dəpu, ka tsa vədza ala giri barka apatə tsa ku kəta ala giri alkawalari.

¹²Amma apa madi tə I ata mzhi kətə kələr pwar giri ka damitədzər giri, kəi shwalatə daɓwa giri ri?

¹³Akwa kəlara nyarmbwar giri, ka giri carɓəla mdə pal na ɗəɗu, ka na ana nggaɓəla su, ka tsuwa na ka səndər su hang, kəi namtə ɗa ka da ndzi ola ata kəra giri.

¹⁴Antə giri pəla ali abbər, ‘Sauriyir ngə ni ɓɗak ka duna.’

¹⁵Antə I fatə mji na ɗəɗu, ka na ka səndər su hang, akwa nyarmbwayeri ar giri ka putə ɗa tə da ndzi mji ol'olər giri. Antə mji laga ku ndzi ol'ola ata kəra mji dəpu dəpu, mji laga ata kəra mji aru aru, mji laga ata kəra mji ntəfkumari, ntəfkumari, laga tsuwa ata kəra kum kuma. Tsuwa I ku pwi mji na ol'ola damwa akwa shanga durayeri.”

¹⁶“Ata saka nda I ku tsaktə mjir hara ala giri shariya ni ka pəla, ‘Ka giri psi thləma giri aka kəlara damitədzi na akwa daɓwa giri, ka giri hara shariyar jirkur akwa daɓwa mda ka ɓzərma'ni, wala damitədzər mdər tsəɗi wala ar mətəpi na ka ndzi akwa nca giri.

¹⁷Giri aɗiya nca zumzumkur akwa hara shariya wa. Ka giri psi thləm aka waskəi, wala tsa an mdə ola, wala ɓzəngkyar. Giri aɗiya thlivər nca mdə wa, kamnyar Hyel an vəi shariya ni. Kəlara su na ku ndzi mwavər ala giri, ka giri sənta ali kəi nggata.’

¹⁸Ata saka nda I ku pəla ala giri shanga suayeri tə ka giri hara.”

¹⁹Musa ku ləkəma ka gari ni abbər, “Ɗangtə giri laku tə mburu thlatə kazhar Gar Horeb akwa. Tsu apatə MTHLAKU ku tsawa ala mburu, antə mburu ku hara, ka nu təbwar mtaku na ola na ata thlivərantə mda, natə giri ka kər giri ku wuta, sakatə mburu ata lakur mwari akwa tsəɗi garayeri ar mjir Amor. Sakatə mburu mzhitə Kadesh Barneya,

²⁰antə I pəla ala giri, ‘Kulini mburu ku si akwa tsəɗiyir garayeri ar mjir Amor natə MTHLAKU na Hyelər mburu ku na ala mburu ni.

²¹Nggədza, MTHLAKU na Hyelər giri ku hamta tsəɗi ngəni akwa tsiya giri. Antə mwa giri ka giri ra dlutsari ka tsa ndzi ar giri tsu apatə MTHLAKU ku hara alkawalari aka kəkayeri ar giri. Giri aɗiya thlivər wa, wala hara shishiɓa wa.’ ”

²²“Antə shanga giri ku si adzə ra ka pəla, ‘Ndzi ka mburu thlentə mji akəma mburu, ka da mwari ra wulɓəla ashira tsəɗi ni katagu. Aghəla tə da ku wuli, ka da sənta ala mburu labar ata kər, ka sauri ar laku natə ka mburu nuwa, ka kauyayeri natə mburu ata ləkwari.’ ”

²³“Antə sauri ngəni ku ndzi ɓɗaku ali. Antə I carɓəla mji shili kumnya suɗa pal pal akwa kəlara nyarmbwa.

²⁴Antə da thlatə ka ndləɓəla akwa bwar garayeri. Sakatə da mzhitə Mular Eshkol, antə da wulɓəla kutari.

²⁵Antə da ɗəmtsə yar nfwayeri na akwa tsəɗi ni, ka səghəi kəgari ala mburu. Antə da hamta ala mburu labar ata kəra mwar ɗa ni abbər, ‘Tsəɗi tə MTHLAKU na Hyelər mburu akwa na mburu ni an tsəɗi na ɓɗaku.’ ”

²⁶“Amma giri ku nggəlar ndləɓəla akwa tsəɗi ni, ka hara kər ɓəɓalkur aka tsawur MTHLAKU na Hyelər giri.

²⁷Giri ləkwa nggungguni akwa tentayeri ar giri akwa pəla abbər, ‘Ai, kamnyar tə MTHLAKU ku nggəlar mburu, an su na hara tə tsa fwaɓəla mburu akwa Masar, ka tsa hamta mburu akwa tsiya mjir Amor ka da kurəmta mburu ni.

²⁸Vəi mwarər mburu aɗi kəra ja wa! Mjir wul ashira tsəɗi ku fəi shaha mburu ka labar tə da pəla ni, kamnyar da pəla, “Mjir tsəɗi ku təramta mburu ka duna, nggədza tsuwa da saɓəl saɓəl ta mburu. Da ka bərniyayeri na ol'ola, ka katanggar ɗa nal nal ahar hyel. Har ma yeru ku wutə mjir nyarmbwar Anak anda!” ’ ”

²⁹“Amma I ku pəla ala giri, ‘Giri aɗiya thlivər ɗa wa, wala ka hyala giri nthlə giri wa.

³⁰MTHLAKU na Hyelər giri na akwa mwa akəma giri, ka kərari surni an ata mpa kamnyar giri, tsu apatə tsa hara ala giri akwa Masar ata nca giri.

³¹Tsuwa akwa mtaku ni giri ku wutə laku tə MTHLAKU na Hyelər giri fatə giri akwa tsiyari apatə mda ana kətə ɓzərni, ka pwar giri akwa shanga mwar giri har tə giri mzhita azi.’

³²Amma ata kəra shanga suayeri ngəni tə I pəla ala giri, giri aɗi hir mbərsa ka MTHLAKU na Hyelər giri,

³³na mwa akəma giri akwa bara ala giri vəi na ɓɗaku tə ka giri fəli ata wa. Ma aviri tsa ana nca ala giri laku ka dlambar parakəu, ma təpci tsuwa tsa akwa pwar giri ka dlambar ləmbəku.”

³⁴“Saka tə MTHLAKU ku nggatə nggungguniyir giri, antə ɗəffari ku ɓzi ka duna, har tə tsa kahyel ka pəla,

³⁵‘Mda aɗi akwa nca mjir zaman ngəni ɗimi ni, na ata wutə tsəɗi na ɓɗaku tə I hara alkawalari aka kəkayeri ar giri ni wa,

³⁶tar Kaleb na ɓzər Yefunne. Arni tsa ata ləkwari, tsuwa kəlara vəi tə kuta səlari ku ntsari, I ata hamta alari kəga maɗa'ni, kamnyar arni tsa ku nu MTHLAKU ka ɗəffari duku.’

³⁷Kamnyar giri antə ɗəffa Hyel ku ɓzi adzə ra, har tə tsa pəla, ‘Wala gə ma, ga aɗi ata ləkwa tsəɗi alkawal ni wa.

³⁸Joshuwa na ɓzər Nun na mdər dlara ar nga an ata ləkwari. Antə ka gə dunautə ni, kamnyar tsa an ata pwar mjir Israila, ka da dlu tsəɗi ni ka ndzi arɗa.’ ”

³⁹“Antə MTHLAKU pəla ala mburu ata kəma duku abbər, ‘I ata hamta tsəɗi ni aka maɗa' giri na amzhi ndəkɓəla daɓwa su na ɓɗaku ka su na ɗimi wa, mji tə giri akwa dzama abbər nuhum mda ata dlutsə ɗa akwa mpa, da an ata ləkwa tsəɗi ni. I ata hamta ala ɗa, antə da an ata ndzi mthlakari.

⁴⁰Amma ar giri, shinar girdzi, ka giri ngka tsu akwa mtaku atar lakur Manda Duwathlu.’ ”

⁴¹“Antə giri pəla ali abbər, ‘Yeru ku hara biku aka MTHLAKU! Amma kulini yeru ata ləkwa tsəɗi ni ka yeru dlərəmta ɗa, apatə MTHLAKU na Hyelər mburu ku pəla.’ Antə waskəi akwa nca giri ku kətə kari mpa arni, giri akwa tamata abbər giri ata mzhi huksəmta mjir bwar garayeri ni kasəla.”

⁴²“Amma MTHLAKU ku pəla ali kəi tsaktə giri ta giri andləɓəla ka ra pwa ata kəra ɗa ka mpa, kamnyar tsa aɗi ata ndzi ata kəma duku kəga giri wa. Antə ma giri ku kar ka mwari, dawayeri ar giri ata dlərəmta giri.

⁴³Apani antə I pəla ala giri, amma giri aɗi psi thləm ali wa. Təng giri hara kər ɓəɓalkur aka tsawur MTHLAKU, ka təra ləkwa bwar garayeri ka mpa kamnyar kər olkur ar giri.

⁴⁴Antə mjir Amor na akwa gar ni ku pungkərdzi ala giri apa cirməma, ka nu giri ka mula ala giri akwa Seyir har ka mwanta ahar Horma.

⁴⁵Antə giri ku ngka, ka tuwa akəma MTHLAKU abbər ka tsa dlar giri, amma tsa aɗi psi thləm ala giri wa, zhar ka damitədzi ka giri wa.”

⁴⁶An su na hara tə giri ku fəi akwa Kadesh.