Read bura-pabir Zwarəngkər Shariya 10 Bible Online

Zwarəngkər Shariya 10 - bura-pabir bible

Zwarəngkər Shariya 10

¹“Ata saka nda MTHLAKU pəla ali, ‘Marəmta allowayeri ar pela suɗa tsu apa na ntangkəma nda, ka gə ndləɓəla adzə ra ata kəra gar ni. Tsuwa ka gə namta akwati ka udzəm akashiya.

²Antə I ata rəbuta ata allowayeri ni ndərayeri na ata allowayeri na ntangkəma, tə gə pukthləmta ni. Antə ga ata pu ɗa akwa akwati ni.’ ”

³“Antə I namta akwati ni ka udzəm akashiya, ka marəmta allowayeri suɗa ar pela tsu apa na ntangkəma ni, ka ndləɓəla ata kəra gar ni ka allowayeri na suɗə ni akwa tsi.

⁴Antə MTHLAKU ku jaktə rəbuta ata allowayeri ni su tə tsa rəbutə ntangkəma ni, watau Tsawayeri Kuma natə MTHLAKU psəmnyari ala giri ata kəra gar, akwa ɗəffa u'u, vir tə mji tsaptədzi ni. Antə MTHLAKU ku hamta ɗa ali.

⁵Antə I shinardzi ka ləghəi kazhar gar ni, ka pu allowayeri ni akwa akwati tə I namtə ni. Antə ndaga ɗa akwa akwati ni, kalkal apatə MTHLAKU ku tsawa ali.”

⁶“Antə mjir Israila ku ləkəma ka mwa baɗita adzə jiɓayeri ar mjir Yaakan har ka mzhitə Mosera. Anda antə Haruna ku mti, antə mdə ku harəmta ni. Antə ɓzər ni Eleyazar ku dlu tsiyari akwa kəthlər pristkur ni.

⁷Thlatər ɗa anda antə da mwari ahar Gudgoda, antə da zhar Gudgoda ka mwari ahar Yotbathla, vəi na ka zərkayeri hang.

⁸Ata saka nda, antə MTHLAKU carɓəla mjir nyarmbwar Lawi ka da an ndzi mjir kəl Akwati Alkawal arni ni. Tsuwa ka da thləthlata akəma MTHLAKU ka da hara kəthlər alari, ka vədza barka aka mji akwa thləmari, apatə mda ana hara ba ashina.

⁹Antə apani, mjir nyarmbwar Lawi aɗi ka nəɓwa wala kifa ata kəma duku kəga maɗama' ɗa wa. Kəthlər ar pristkur aka MTHLAKU an nəɓwar ɗa, apatə MTHLAKU na Hyelər giri ku pəla ala ɗa.”

¹⁰“I ku ndzi ata gar ni pci nfwarkumari ka viri nfwarkumari apatə I hara na ntangkəma ni. Antə MTHLAKU ku jaktə nggatə adduwarna akwa saka ngəni ka damwa, antə tsa aɗi hir kurəmta giri wa.

¹¹Antə MTHLAKU pəla ali, ‘Thlata, ka gə baɗitə mwa, ka gə pwakəma, ka pwar mji ngəni akwa lənggur ɗa ni, kamnyar ka da ləkwa tsəɗi tə I kahyel ar hamtari aka kəkayeri arɗa ni, ka da ndzi mthlakari.’ ”

¹²“Kulini, mjir Israila, man tə MTHLAKU na Hyelər giri akwa barari akəla giri ri? Tsa akwa bara ka giri thlivər ɗəffa MTHLAKU na Hyelər giri, ka giri mwa akwa lakurni, ka giri hir ni, ka giri hara kəthlər aka MTHLAKU na Hyelər giri ka ɗəffa giri shang, ka mpika giri shang,

¹³tsuwa ka giri ɓəlatə tsawayeri ar MTHLAKU, ka suayeri tə tsa thlamta abbər ka mdə hara, natə I akwa hamta ala giri ashina ni, kamnyar lapiyakur giri ka kəra giri.

¹⁴Wula, wala vəi na amtazi, ka na amta ta shang, ka duniya, ka shanga suayeri na akwa an ar MTHLAKU na Hyelər giri.

¹⁵Amma wala apani, MTHLAKU ku pəla abbər tsa ata hir kəkayeri ar giri, antə tsa ku hir ɗa, ka carɓəla giri na kəkayeri arni kazhar shanga mjir duniya, apatə giri aɗi ashina.

¹⁶Apani antə ka giri thla kaciya na ar ɗəffu ar ncanta abbər giri mjir kəsi alkawal, giri aɗiya jaktə hara kər ɓəɓalkur wa.

¹⁷Kamnyar MTHLAKU na Hyelər giri an Hyel na ka duna ata kəra shanga haptayeri, ka Mthlaku na olta shang. Tsa an Hyel na ola, ka na ka duna tə mda ana thlivərari. Tsa aɗi ana nca zumzumkur wala dlu sur dzəɓa mnya wa.

¹⁸Tsa ana hara shariya na ka jirkur aka mutayeri kəga kughungayeri, tsuwa tsa ana hir mətəpi, ka hamta alari susəma ka ləptu.

¹⁹Antə apani wala giri, ka giri hir mətəpi, kamnyar giri ma giri ku ɗar ndzi mətəpi akwa tsəɗi Masar.

²⁰Ka giri thlivər ɗəffa MTHLAKU na Hyelər giri, tsa antə giri ata vəngkər səli alari. Ka giri kəsi ni ɓɗaku, ka kahyel akwa thləmari.

²¹Tsa antə giri ata fwalari. Tsa an Hyelər giri, na hara suayeri na ol'ola ka surndatayeri na ata thlivərantə mda, tə giri wutə ka nca giri ni.

²²Sakatə kəkayeri ar giri ləghəi ahar Masar, da mji murfəkumari daci. Amma kulini MTHLAKU ku namtə hangkur giri apa sasəlkayeri na amtazi.”