Read bura-pabir Zwarəngkər Shariya 11 Bible Online

Zwarəngkər Shariya 11 - bura-pabir bible

Zwarəngkər Shariya 11

¹Ka giri hir MTHLAKU na Hyelər giri, ka giri hara su tə tsa akwa barari, ka suayeri tə tsa thlamta abbər ka mdə hara, kəga tsawayeri arni tədəku.

²Antə ashina ka giri sənda abbər aɗi maɗa' giri an wutə wala səndə ɗiɓəladzi tə MTHLAKU na Hyelər giri hara ni wa, amma giri ka kəra giri. Giri ku wutə olkurərni ka kuthlikurərni ka surndatayeri tə tsa hara,

³ka seɗayeri, kəga kəthlərayeri natə tsa hara aka kuthlir Masar, ka aka shanga tsəɗiyirni.

⁴Giri an wutə su tə tsa hara aka sojayeri ar Masar, kəga takwayeri arɗa, kəga wagənayeri ar takur ɗa, ka laku tə MTHLAKU vu tə yimər Manda Duwathlu hartə ɗa ka shamta ɗa sakatə da akwa nu dəlpa giri, ka laku tə MTHLAKU kurəmta ɗa.

⁵Giri an wutə su tə tsa hara kamnyar giri akwa mtaku akəmata giri amzhəta azi,

⁶ka su tə tsa hara aka Dathlan ka Abiram, maɗa' Eliyab na akwa nyarmbwar Ruben, laku tə di kəlar mnyari akwa nca dlamar mjir Israila, ka ndasəmnya ɗa kəga mjir kutakəyir ɗa, kəga tentayeri arɗa, ka shanga suayeri na ka mpika na adzə ɗa.

⁷Ai giri ka nca giri an wutə shanga suayeri ngəni ol'ola tə MTHLAKU hara ni.

⁸Antə apani, ka giri ɓəlatə shanga tsawayeri natə I akwa hamta ala giri ashina ni, kamnyar ka giri wutə dunar fəlɓəla Thlyagha Jodan, ka ləkwa tsəɗi ni, ka dlutsa, ka ndzi mthlakari.

⁹Ka giri ɓəlata, antə far giri ata ndzi saɓəl akwa tsəɗi natə MTHLAKU ku hara alkawalər hamtari aka kəkayeri ar giri, kəga kəkayeri arɗa, tsəɗi na ɓɗaku, na ata ya su ni.

¹⁰Kamnyar tsəɗi tə giri ata ləkwari ka ndzi mthlakari ni, aɗi apa tsəɗi Masar tə giri thlata akwa ni wa, kamnyar anda ma giri ku thləka tar ka giri ghəra akwa pungkər yimi apa fakər gadina.

¹¹Amma tsəɗi tə giri ata fəlɓəla Jodan ka ləkwa ni an tsəɗi garayeri ka mularayeri, tsəɗi tə yimərhyel ana təra akwa hang.

¹²Tsuwa tsəɗi ngəni MTHLAKU na Hyelər giri an ata wul kərari, Tsa andər wul kəra tsəɗi ni təng akwa baɗitər məva har ka mwanta akwa tsikərari.

¹³Kamnyar ngəni ka giri ɓəlatə tsawayeri natə I akwa hamta ala giri ashina, ka giri hir MTHLAKU na Hyelər giri, ka giri hara kəthlər alari ka ɗəffa giri shang, ka mpika giri shang.

¹⁴Ma giri ku hara apani, tsa ata thlentə yimi ata kəra tsəɗiyir giri akwa sakari, antə giri ata wutə yimi na ntangkəma har ka na akwa tsikərari, kamnyar ka giri mzhi tsaptə mthli, ka yimər anap, ka mal zaitun.

¹⁵Tsuwa MTHLAKU ata vu ka kusar ptsa akwa mtaku kamnyar mwaɓiyayeri ar giri, tsuwa giri ata səm susəma har ka ndli.

¹⁶Giri aɗiya hir ka mji pwaktəmta giri ka giri ləkwa vəngkər səli aka haptayeri wa.

¹⁷Kamnyar ma giri ku hara apani, ɗəffa MTHLAKU ata ɓzi adzə giri. Antə tsa ata hartə vəi na amtazi, antə giri aɗi ata wutə yimərhyel wa, antə di aɗi ata ya su wa. Antə giri ata kurəmtadzi taktar akwa tsəɗi na ɓɗaku tə MTHLAKU ata na ala giri ni.

¹⁸Antə ka giri kəsi ndərayeri ngəni akwa ɗəffa giri, akwa shanga ndzəndziyir mpika giri. Ka giri mbwatə ɗa ata tsiya giri apa seɗa, ka ata murkəma giri, ka da ndzi apa sur ɗangta.

¹⁹Ka giri thlipə ɗa aka maɗa' giri, ka gari ata kər sakatə giri andzəndzi avi, ka sakatə giri akwa mwa, ka sakatə giri apəpəi, ka sakatə giri ku thlata.

²⁰Ka giri rəbutə ɗa ata udzəm nyarmbwar giri, ka ata nyarfayeri ar giri,

²¹kamnyar ka far giri ka na ar maɗa' giri hara saɓəl akwa tsəɗi tə MTHLAKU na Hyelər giri ku kahyel ar hamtari aka kəkayeri ar giri, apatə vəi na amtazi an amta duniya.

²²Ka giri ɓəlatə shanga tsawayeri ngəni tə I akwa hamta ala giri ni, ka giri hir MTHLAKU na Hyelər giri, ka giri mwa akwa lakurni, ka giri bartə ni ɓɗaku.

²³Ma giri ku hara apani, tsa ata kədləɓəla shanga durayeri ni akəma giri, tsuwa giri ata dlutsə tsəɗiyir durayeri na təramta giri duna ka tsuwa hangkur.

²⁴Antə shanga vəi tə səla giri ku ntsari, tsa ata ndzi ar giri. Antə kəla tsəɗiyir giri ata baɗita akwa mtaku na abwar anəm ka mwari akwa garayeri ar Lebanon na abwar yala, ka baɗita ata mnya Thlyagha Yufiretis təbwar raghəi ka pudza aka Manda Meditereniya təbwar ramta.

²⁵Mda aɗi na ata mzhi nggitə ndəra ala giri wa. MTHLAKU na Hyelər giri ata vu ka shanga mjir tsəɗi tə giri ata pu səla giri ni, yakata ka thlivər giri, apatə tsa ku hara ala giri alkawalari.

²⁶Nggədza ashina, I akwa na giri saka ka giri carɓəla akwa daɓwa barka ka shushukur.

²⁷Giri ata wutə barka ma giri ku ɓəla tsawayeri ar MTHLAKU na Hyelər giri, natə I akwa hamta ala giri ashina ni.

²⁸Giri ata ndzi shushuwari ma giri aɗi ɓəlatə tsawayeri ar MTHLAKU na Hyelər giri wa, ma giri ku shinamta kəma giri kazhar laku tə I pəla ala giri ashina ni, ka nu haptayeri natə hwatu giri asəndə wa.

²⁹Ma sakatə MTHLAKU ku mwantə giri akwa tsəɗi tə giri ata ləkwari ka ndzi mthlakari ni, ka giri ra psəmnya barkayeri ngəni ata Gar Gerizim, ka psəmnya shushukur ni ata kəra Gar Ebal.

³⁰Garayeri ngəni suɗə ni da aɓəla bwanda Thlyagha Jodan təbwar ramta ka tsəɗiyir mjir Kanana na ka ndzi akwa mular Araba, awul Gilgal, təbwar mələm ar mjir Moreh.

³¹Kamnyar giri ata fəlɓəla Thlyagha Jodan, ka giri dlutsə tsəɗi tə MTHLAKU na Hyelər giri akwa na ala giri ni. Ma sakatə giri ku dlutsə tsəɗi ni, ka ndzəndzi akwa,

³²ka giri mbərsa abbər giri ku ɓəlatə tsawayeri tə I hamta ala giri ashina ni.