Read bura-pabir Zwarəngkər Shariya 12 Bible Online

Zwarəngkər Shariya 12 - bura-pabir bible

Zwarəngkər Shariya 12

¹“Nayeri ni an suayeri tə mdə thlamta abbər ka mdə hara, ka tsawayeri tə giri ata ɓəlatari, akwa tsəɗi tə MTHLAKU na Hyelər giri ku hamta ala giri ka giri ndzi mthlakari, akwa shanga ndzəndziyir mpika giri akwa duniya ni.

²Giri ata huzamta shanga vəyayeri natə durayeri tə giri ata kədləmtari ni ana vəngkər səli aka haptayeri arɗa ata kəra garayeri, kəga ɗəɗəgəlayeri, kəga kir nfwayeri.

³Giri ata huzamta bagaɗiyir ɗa, ka giri pukthləmta shanggamayeri arɗa, ka mbamta haptu Ashera ka u'u, ka tadərəmta shanga haptayeri arɗa. Apani antə giri ata tsi thləma ɗa akwa vəyayeri ni.”

⁴“Giri aɗiya vəngkər səli aka MTHLAKU na Hyelər giri akwa laku tə mji nayeri ni ana vəngkər səli aka haptayeri arɗa wa.

⁵Amma giri ata paktə vəi tə MTHLAKU na Hyelər giri ku carɓəla akwa shanga bwar nyarmbwar mjir giri, kamnyar ka giri vəngkər səli alari ata, tsuwa ka tsa namtə vəi ni apa vəi ndzəndziyirni. Anda antə giri ata mwari,

⁶tsuwa anda antə giri ata mwantə saɗaka mbamba, ka mambila saɗakayeri, ka zaka ar giri, ka cautayeri na zum, ka suayeri tə giri kətə alkawalər hamtari, ka sur hamtar giri na ar hirər ɗəffu, kəga yarakəmayeri ar thla, ka təma, ka kwi.

⁷Anda akəma MTHLAKU na Hyelər giri ni, antə giri kəga mjir kutakəyir giri ata səm susəma ka hara kucali ata kəra shanga su tə giri wuta, tə MTHLAKU na Hyelər giri ku vədzə barka ata kər ala giri.”

⁸“Giri aɗiya hara apatə mburu akwa harari ashina ni wa, apatə waskəi akwa hara su tə ɗəffari hir ni wa,

⁹kamnyar giri aɗi mzhitə vəi ghərəmtaghəra ni katagu wa, giri aɗi dlu kifa tə MTHLAKU na Hyelər giri hamta ala giri ni katagu wa.

¹⁰Ma sakatə giri ku fəlɓəla Thlyagha Jodan, ka ndzəndzi akwa tsəɗi tə MTHLAKU na Hyelər giri akwa hamta ala giri apa kifa ni, antə tsa ata hamta ala giri futu akəla dawayeri ar giri na kalaktə giri, har ka giri wutə ndzəndzi lapiyakur.

¹¹Aghəla nda antə giri ata mwantə shanga suayeri tə I tsawa ala giri abbər ka giri mwantə ni akwa vəi tə MTHLAKU na Hyelər giri ku carɓəla abbər ka mdə vəngkər səli alari ata ni. Giri ata mwantə saɗaka mbamba, ka mambila saɗakayeri, ka zaka ar giri, ka cautayeri ar giri na zum, kəga mambila suayeri na ɓɗakɓɗaku tə giri hara alkawalər hamtari aka MTHLAKU.

¹²Anda antə giri ata hara kucali akəma MTHLAKU na Hyelər giri, giri kəga maɗa' giri, kəga buɗayeri ar giri shili ka mwanki, kəga mjir Lawi na ka ndzi akwa kauyayeri ar giri, təng tə da aɗi ka nəɓwar kifa ata kəma duku kəga giri wa.

¹³Giri aɗiya hamta saɗaka mbamba ar giri ata kəlara vəi tə ɗəffa giri hir wa.

¹⁴Amma tar akwa vəi tə MTHLAKU ata carɓəlari akwa bwar mjir nyarmbwa laga akwa nca giri. Anda antə giri ata hamta saɗaka mbamba ar giri, tsuwa anda antə giri ata hara shanga su tə I tsawa ala giri.”

¹⁵“Amma kəlara sakatə giri hira, giri ata mzhi thlamta wulya mwaɓi ka giri ɓɗa apatə giri hira, akwa shanga kauyayeri ar giri, ata kəra hangkur su tə MTHLAKU na Hyelər giri hamta ala giri. Tsuwa kəlara mda ata mzhi ɓɗə kum ni, wala tsa kəcəkəcari wala tsa aɗi kəcəkəcari wa, tsu apatə giri ana ɓɗə kumər jikəl wala kimar.

¹⁶Amma giri aɗiya səm mamshir ɗa wa, ka giri pumta mamshi ni ata di apa yimi.

¹⁷Giri aɗiya səm su nayeri ni akwa kauyayeri tə giri ndzəndzi akwa wa, watau zaka ar mthlir giri, wala yimər anap na bilənari, wala mal zaitun, wala yarakəmar thla wala təmar giri, wala suayeri tə giri kətə alkawalər hamtari, wala sur hamta ar hirər ɗəffu, wala sur hamta na damwa.

¹⁸Amma giri ata səm ɗa akəma MTHLAKU na Hyelər giri akwa vəi tə tsa carɓəla, giri kəga maɗa' giri shili ka mwanki, kəga buɗayeri ar giri shili ka mwanki, kəga mjir Lawi na akwa kauyayeri ar giri. Tsuwa ka giri hara kucali akəma MTHLAKU na Hyelər giri ata kəra kəlara su tə tsa hamta ala giri.

¹⁹Ka giri hara hangkal, giri aɗiya nggəlar mjir Lawi wa, apatə giri akwa ndzəndzi akwa tsəɗiyir giri ni.”

²⁰“Ma sakatə MTHLAKU na Hyelər giri ku jakə olkur tsəɗiyir giri apatə tsa ku hara alkawalari, tə ma giri ku pəla, ‘I akwa bara ɓɗə kum’, kamnyar tə giri akwa bara ɓɗə kum, to, giri ata mzhi ɓɗə kum hang apatə giri hira.

²¹Ma vəi tə MTHLAKU na Hyelər giri ku carɓəla kamnyar ka mdə vəngkər alari səli ni ku hara ciju ka duna ala giri, to, giri ata mzhi thlamta wulya kəlara mwaɓi apatə I ku tsawa ala giri, wala akwa ciɓər thla wala ar təma, wala ar kwi, natə MTHLAKU ku hamta ala giri. Tsuwa giri ata mzhi səmari hang apatə giri hir akwa kauyayeri ar giri.

²²Jiri, tsu apatə giri ana ɓɗə kum jikəl wala kimar, antə giri ata səmari. Tsuwa kəlara mda ata mzhi səmari, wala tsa kəcəkəcari wala tsa aɗi kəcəkəcari wa.

²³Amma ka giri mbərsa abbər giri aɗi səm kum ka mamshi wa, kamnyar mamshi an mpikə ni, antə giri aɗiya səm kum ka mpikari wa.

²⁴Giri aɗiya səm mamshi wa, ka giri pumta ni ata di apa yimi.

²⁵Giri aɗiya səm mamshi wa, kamnyar ka shanga su mwa ala giri lapiya, giri kəga kəkayeri ar giri, kamnyar giri ata ləkəma ka hara su na kalkal ata nca MTHLAKU.

²⁶Amma ka giri fatə sur hamta ar giri kəga suayeri tə giri kətə alkawalər hamtari, ka giri mwanta akwa vəi tə MTHLAKU ata carɓəla ka mdə vəngkər alari səli ata.

²⁷Ka giri hamta kum ni ka mamshari ata kəma duku swakti apa saɗaka mbamba ata kəra bagaɗi aka MTHLAKU na Hyelər giri. Giri ata mzhi səm kum ar saɗakayeri laga, amma tar ka giri pungkər mamshari ata kəra bagaɗiyir hamta saɗaka aka MTHLAKU na Hyelər giri.

²⁸Ka giri hara hangkal, ka giri ɓəlatə shanga ndərayeri ngəni tə I akwa hamta ala giri ni, kamnyar ka shanga su mwa lapiya ala giri, giri kəga kəkayeri ar giri ba saka madi. Kamnyar tə giri ata ləkəma ka hara su na kalkal ka na ɓɗaku ata nca MTHLAKU na Hyelər giri.”

²⁹“MTHLAKU na Hyelər giri ata kurəmta ala giri durayeri natə giri akwa ra dlutsə tsəɗiyir ɗa ni. Amma ma sakatə giri ku kədləɓəla ɗa ka ndzəndzi akwa tsəɗiyir ɗa,

³⁰ka giri hara hangkal, giri aɗiya tsaf yu su ata kəra haptayeri arɗa wa abbər, ‘Laku madi antə mji ngəni ana vəngkər səli aka haptayeri arɗa akwa ri? Təng mburu ata harari tsu apa nda.’

³¹Giri aɗiya vəngkər səli aka MTHLAKU na Hyelər giri akwa laku tə da ana vəngkər səli aka haptayeri arɗa wa. Kamnyar akwa sakar vəngkər səliyir ɗa, da ana hara suayeri zumzum na sur cika natə MTHLAKU ku nggəlari. Har ma da ana mbamta maɗa' ɗa shili ka mwanki akwa u'u, apa saɗaka aka haptayeri arɗa.”

³²“Ka giri hara hangkal, ka giri wuta abbər giri ku ɓəlatə shanga suayeri tə I ku tsawa ala giri. Giri aɗiya jakəngkər su wa, wala kəmta su akwa wa.”