Read bura-pabir Zwarəngkər Shariya 13 Bible Online

Zwarəngkər Shariya 13 - bura-pabir bible

Zwarəngkər Shariya 13

¹Vir laga nuhum naɓi laga wala mdər suni laga asə thlata akwa nca giri, ka hamta ala giri seɗa laga, wala seɗata ala giri abbər surndatə laga ata sə hara,

²antə seɗa ni wala surndatə ni ku hara apatə tsa pəla ni. Ma tsa pəla, “Sər giri ka mburu nu hyelayeri laga bilən, ka mburu vəngkər səli ala ɗa, hyelayeri natə giri aɗi ɗar səndə su ata kər wa.”

³Giri aɗiya psə thləm aka naɓi wala mdər suni ndaga wa. Kamnyar MTHLAKU na Hyelər giri akwa ngkərtə giri ka tsa nggaɓəla wala giri hir ni ka ɗəffa giri duku ka hangkala giri shang.

⁴MTHLAKU na Hyelər giri shini antə giri ata nuwari, ka thlivər ɗəffari, ka ɓəlatə tsawayeri arni, ka kələngkər alari. Tsa antə giri ata hara buɗakur alari, ka giri bartə tsiyari ɓɗaku.

⁵Amma ka giri tsi naɓi wala mdər suni ndaga, kamnyar tsa akwa thlipa ala giri sur thlentə hangkala MTHLAKU na Hyelər giri, na fwaɓəla giri akwa tsəɗi Masar, tsuwa na pəli giri akwa kəyir mafakur. Tsa akwa bara ka giri pəra kazhar laku tə MTHLAKU na Hyelər giri tsawa ala giri abbər ka giri nuwa. Apani antə giri ata kəɓəla ɗimikur ni akwa nca giri.

⁶Ma ɓzərma nga, ɓzər tə mama' giri duku ka tsa, wala ɓzər nga, wala ngkwar nga, wala mwalankiri tə gə hira, wala pazhir nga na kudzəha, ata si ka pwaktəmta nga akwa ɗuwari abbər, “Sər ka mwa ra vəngkər səli aka hyelayeri laga bilən, natə giri wala kəkayeri ar giri aɗi ɗar səndə su ata kəra ɗa wa.”

⁷Nuhum mdə laga akwa nca ɗa pəla ka giri ra vəngkər səli aka haptayeri ar mji na kudzəhə ka giri wala na ciju ka giri, baɗita akwa ngəni ar duniya har ka mwanta abwanda.

⁸Giri aɗiya kələngkər alari wa, wala psi thləm alari wa. Giri aɗiya kətadzə ni wala səzə ni wa, wala ɗuwar ni wa.

⁹Ka giri tsi ni! Ka ga an ndzi mdə na ntangkəma na ata baɗitə ndzəhə ni ka pela, kambəla mji damwa ndzəndzəhtə ni har ka tsa mta.

¹⁰Ka giri ndzəndzəhtə ni ka pela har ka tsa mta, kamnyar tsa ku bara ka tsa shinamta kəma giri kazhar MTHLAKU na Hyelər giri, na fwaɓəla giri akwa mafakur ahar Masar.

¹¹Apani antə shanga mjir Israila ata nggatari, tsuwa ka da thlivəra, har tə mda aɗi ata sə jaktə hara jili ɗimikur ngəni akwa nca giri wa.

¹²Sakatə giri akwa ndzəndzi akwa kauyayeri natə MTHLAKU na Hyelər giri ku na ala giri, ma ku giri nggatə

¹³abbər mji laga na hilhilari ku səɓəla akwa nca giri ka ndəndatə hangkala mjir di laga akwa pəla, “Sər giri ka mburu ra vəngkər səli aka haptayeri natə giri aɗi ɗar səndə su ata kəra ɗa wa.”

¹⁴To, ka giri yuɓəla, ka pakɓəla, ka nggaɓəla su ata kər ɓɗaku laga. Antə ma ku ndzi jiri abbər mji laga akwa nca giri ku hara sur cika ngəni,

¹⁵to, ka giri kurəmta shanga mji na akwa di nda ka katsakar, ka tsəgəi shanga mwaɓiyayeri, ka hilantə di ni purəm.

¹⁶Shanga su tə giri fata akəla ɗa ka giri tsaptə shang akwa bəbalər kuta di. Ka giri mbamta di ni kəga suayeri tə giri tə giri fatə ni, ka hamta ni swakti apa saɗaka mbamba aka MTHLAKU na Hyelər giri. Antə ka di ni ndzi fya ba saka madi, mda aɗiya jaktə hənɓəla ni wa.

¹⁷Giri aɗiya kəsi aka kəra giri kəlara su tə MTHLAKU ku nggəlari wa, antə apani ɗəffa MTHLAKU ata pwi ata kəra giri, har ka tsa kətadzə giri. Tsa ata kətadzə giri ka namtə ka hangkur giri jakjaka apatə tsa ku hara alkawalari ka kəkayeri ar giri.

¹⁸MTHLAKU na Hyelər giri ata hara ala giri apani, ma giri ku ɓəlatə shanga tsawayeri arni natə I hamta ala giri ashina, ka hara su na kalkal ata ncari.