Read bura-pabir Zwarəngkər Shariya 14 Bible Online

Zwarəngkər Shariya 14 - bura-pabir bible

Zwarəngkər Shariya 14

¹Antə Musa ku ləkəma ka gariyirni akwa pəla, “Giri an maɗa' MTHLAKU na Hyelər giri, antə giri aɗiya thləthlatə dza giri wa, wala shimta bwakəma kəra giri kamnyar tuwa mdə na ku mtə wa.

²Kamnyar giri an mji na ɓɗakkarkara aka MTHLAKU na Hyelər giri. Kamnyar akwa nca shanga durayeri na akwa duniya MTHLAKU na Hyelər giri ku carɓəla giri ka giri ndzi mjirni na ka daraja ta shang.”

³“Giri aɗiya səm kəlara su na adiya wa.

⁴Nayeri ni an mwaɓi tə giri ata mzhi səmari, thla, ka təma, ka kwi,

⁵ka jikəl, ka kimar, ka kwi mtaku, ka mina, ka kajal, kəga təmar gar.

⁶Giri ata mzhi ɓɗə kumər kəlara mwaɓi na ka mpəlari ndəkndəkari suɗa, ka na ana nggyara.

⁷Amma wala akwa nca mwaɓiyayeri na ana nggyara, ka na ka mpəla ɗa ndəkndəkari suɗa, giri aɗiya ɓɗə kumər dləkəmau, wala mti, wala pacata wa. Kamnyar wala tə da ana nggyara, da aɗi ka mpəla ɗa ndəkndəkari suɗə wa, antə da ku ndzi adiya ala giri.

⁸Tsuwa giri aɗiya ɓɗə kumər gadu wa, kamnyar wala tə mpəlari ndəkndəkari suɗa, tsa aɗi ana nggyara wa. Antə tsa ku ndzi adiya ala giri, antə giri aɗiya ɓɗə kumərni wa, wala tsəkwar mshiyir ɗa wa.”

⁹“Akwa nca shanga suayeri na ka mpika akwa yimi, giri ata mzhi ɓɗə kəlara akwa nca ɗa na ka kadzal ka bwatəla ata dzari.

¹⁰Amma kəlara su na kula kadzal ka kula bwatəla ata dzari, giri aɗiya ɓɗə wa. Kamnyar tsa ku ndzi adiya ala giri.”

¹¹“Giri ata mzhi ɓɗə kumər kəlara ɗika na kəcəkəcari kula adiyakur.

¹²Amma giri aɗi ata ɓɗə jili ɗika nayeri ni wa, watau duku, ka kutəkcivi, ka abəla,

¹³ka mbələm, ka kapthlaramwapu, ka shanga jiliyir ɗa,

¹⁴ka kəlara jili zəlaku,

¹⁵ka zhimnaku, ka ɗika kəga yimi aviri, ka ɗika kəra yimi, ka kadapu ka jiliyir ɗa,

¹⁶ka nghyinghyi na raka, ka nghyinghyi na ola, ka mtəkar yimi,

¹⁷ka nghyinghyi mtaku, ka kutəkcivər dlipa, ka ɗikar ngka kəlfa,

¹⁸ka nggaləm, ka shaduwar, ka shanga jiliyir ɗa, ka ɗika adiya, ka ntsəhəl.”

¹⁹“Shanga fəvəng na ka ɓəɓəku an adiya ala giri, antə giri aɗiya ɓɗə ɗa wa.

²⁰Amma shanga suayeri na ka ɓəɓəku, na aɗi adiya wa, giri ata mzhi səmari.”

²¹“Giri aɗiya ɓɗə kumər mwaɓi na ku mtə dlipa wa. Amma giri ata mzhi hamtari aka mətəpiyayeri na akwa nca giri ka da ɓɗəmnya, wala ka giri ɗələmta aka mətəpi laga. Kamnyar giri an mji na ɓɗakkarkara ar MTHLAKU na Hyelər giri.” “Giri aɗiya ɓwatə kumər ɓzər kwi wala təma akwa uwa mama'ni wa.”

²²“Ka giri kəɓəla duku akwa kuta kuma ar shanga su na ku ya akwa fakər giri kəlara məva.

²³Giri ata mwantə zaka ar giri akwa vəi tə MTHLAKU na Hyelər giri ku carɓəla kamnyar ka mdə vəngkər səli alari, ka giri səma anda akəmari. Antə giri ata səm zaka ar mthli, ka yimər anap, ka mal zaitun, ka yarakəmar thla ka təma ka kwi, kamnyar ka giri thliptə laku tə giri ata mwa ka thlivər ɗəffa MTHLAKU na Hyelər giri akwa ɗəffa giri ba saka madi.

²⁴Amma ma vəi vəngkər səli ni ku hara ciju ka duna ala giri, tə giri amzhi fatə zaka ar suayeri tə MTHLAKU ku hamta ala giri ni ka mwantə wa,

²⁵giri ata mzhi ɗələmta sur fakər giri ni, ka giri mwantə kwabari akwa vəi tə MTHLAKU na Hyelər giri ku carɓəla ni.

²⁶Ka giri tsi kwaba ni akwa kəlara su tə giri hira, wala ata kəra thla, wala təma, wala yimər anap, wala sur sa na mwavər, wala kəlara su tə ɗəffa giri hira. Anda akəma MTHLAKU na Hyelər giri, antə giri ka mjir kutakəyir giri ata səm susəma ka hara kucali.”

²⁷“Amma giri aɗiya fwari su ata kəra mjir Lawi na akwa kauyayeri ar giri wa, kamnyar arɗa da aɗi ka nəɓwa wala kifa ata kəma duku kəga giri wa.

²⁸Antə akwa kurər kəlara məva na makərkur, ka giri səntə zaka ar shanga sur fakər giri, ka giri pwi akwa kauyayeri ar giri.

²⁹Antə susəma ngəni ata ndzi aka mjir Lawi, kamnyar da aɗi ka nəɓwa wala kifa ata kəma duku kəga giri wa. Tsuwa susəm ni ata ndzi aka mutayeri, ka kughungayeri, ka mətəpiyayeri na akwa kauyayeri ar giri. Da ata si ka da səm susəma ka da ndli. Kamnyar ma giri ku hara apani, MTHLAKU na Hyelər giri ata vədzə barka aka shanga su tə giri ata harari.”